Bank Strike Alert: బ్యాంక్ ఖాతాదారులకు అలర్ట్! సెప్టెంబర్ 11న బ్యాంకులు బంద్..

Bank Strike Alert: దేశవ్యాప్తంగా బ్యాంకింగ్ సేవలకు సెప్టెంబర్ 11న అంతరాయం ఏర్పడే అవకాశం ఉంది. యునైటెడ్ ఫోరం ఆఫ్ బ్యాంక్ యూనియన్స్ (UFBU) పిలుపు మేరకు ప్రభుత్వ, ప్రైవేట్, ప్రాంతీయ గ్రామీణ బ్యాంకులకు చెందిన సుమారు 10 లక్షల మంది ఉద్యోగులు, అధికారులు ఆ ఒక్క రోజు దేశవ్యాప్త సమ్మెకు సిద్ధమవుతున్నారు. వారానికి ఐదు రోజుల పనిదినాలను అమలు చేయడంతో పాటు అన్ని శనివారాలను సెలవులుగా ప్రకటించాలన్నది వారి ప్రధాన డిమాండ్. 2024 మార్చిలో కుదిరిన 12వ ద్వైపాక్షిక వేతన ఒప్పందంలో ఇండియన్ బ్యాంక్స్ అసోసియేషన్ (IBA), బ్యాంకు ఉద్యోగ సంఘాల మధ్య 5 డేస్ వర్కింగ్ వీక్‌పై అంగీకారం కుదిరినట్లు యూనియన్లు చెబుతున్నాయి. అయితే దీనికి సంబంధించి కేంద్ర ఆర్థిక మంత్రిత్వ శాఖ, రిజర్వ్ బ్యాంక్ ఆఫ్ ఇండియా (RBI) నుంచి అధికారిక గెజిట్ నోటిఫికేషన్ వెలువడలేదని పేర్కొంటున్నాయి. వారంలో మిగిలిన రోజుల్లో రోజుకు అదనంగా 40 నిమిషాలు పనిచేసి శనివారం పనిని సర్దుబాటు చేసేందుకు ఉద్యోగులు సిద్ధంగా ఉన్నారని వెల్లడించాయి.

సమ్మెలో పాల్గొనే సంఘాలు ఇవే

UFBUలో AIBEA, AIBOC, NCBE, AIBOA, BEFI, INBEF, INBOC తదితర ప్రధాన బ్యాంకింగ్ ఉద్యోగ, అధికారుల సంఘాలు ఉన్నాయి. 5 డేస్ వర్కింగ్ వీక్‌తో పాటు ఉద్యోగుల సంక్షేమానికి సంబంధించిన ఇతర అంశాలపై కూడా ఇవి ప్రభుత్వంపై ఒత్తిడి తెస్తున్నాయి. సెప్టెంబర్ 11న చేపట్టనున్న సమ్మెను ఆందోళనల తొలి దశగా UFBU పేర్కొంది. డిమాండ్లపై సానుకూల నిర్ణయం రాకపోతే సెప్టెంబర్ 28, 29, 30 తేదీల్లో మూడు రోజుల సమ్మెకు దిగుతామని ప్రకటించింది. అప్పటికీ సమస్య పరిష్కారం కాకపోతే అక్టోబర్ 26 నుంచి నిరవధిక సమ్మె చేపట్టే అవకాశం ఉందని ప్రభుత్వానికి హెచ్చరిక జారీ చేసింది. మరోవైపు ప్రభుత్వ రంగ బ్యాంకుల అధికారులకు 2025-26 ఆర్థిక సంవత్సరానికి సంబంధించిన పనితీరు ఆధారిత ప్రోత్సాహకం (PLI) చెల్లింపును తదుపరి ఆదేశాలు వచ్చే వరకు నిలిపివేసినట్లు నివేదికలు పేర్కొంటున్నాయి. ఈ అంశం కూడా బ్యాంకు ఉద్యోగ సంఘాల ఆందోళనకు మరింత ఊతమిచ్చే అవకాశం ఉందని చెబుతున్నారు. ఐటీ, బహుళజాతి సంస్థలు, ఇతర ఆర్థిక సంస్థల్లో ఇప్పటికే 5 డేస్ వర్కింగ్ విధానం అమల్లో ఉందని యూనియన్లు గుర్తుచేస్తున్నాయి. ఉద్యోగుల వర్క్-లైఫ్ బ్యాలెన్స్, మానసిక ఒత్తిడి తగ్గింపు కోసం బ్యాంకింగ్ రంగంలోనూ ఇదే విధానాన్ని అమలు చేయాలని డిమాండ్ చేస్తున్నాయి.

ఏ సేవలకు అంతరాయం అంటే..
సమ్మె ప్రభావంతో బ్యాంకుల్లో నగదు డిపాజిట్లు, విత్‌డ్రాయల్స్, చెక్ క్లియరెన్స్, ట్రేడ్ ఫైనాన్స్, రుణాల పంపిణీ వంటి సేవలకు అంతరాయం కలగవచ్చని యూనియన్లు చెబుతున్నాయి. అయితే UPI, నెట్ బ్యాంకింగ్, మొబైల్ బ్యాంకింగ్ యాప్స్, ఏటీఎం సేవలు సాధారణంగానే అందుబాటులో ఉండే అవకాశం ఉంది.