Anakapalli: అవినీతి, నిర్లక్ష్యం ప్రదర్శించే అధికారులపై కలెక్టర్ విజయ కృష్ణన్ కొరడా

చట్టాలను అనుసరించాల్సిన అధికారులే అడ్డదార్లు తొక్కుతున్నారు. తక్కువ సమయంలో ఎక్కువ డబ్బులు సంపాదించాలని అవినీతికి పాల్పడుతున్నారు. పేదలను అందినకాడికి దోచుకుంటున్నారు. అలాంటి అధికారులపై చర్యలు తీసుకుంటున్నప్పటికీ ఏమాత్రం మార్పు రావడం లేదు. తాజాగా ఓ డాక్టర్ పై వేటుపడింది. డెలివరీ కోసం వచ్చిన వారి నుంచి డబ్బులు గుంజుతున్న వైద్యురాలిని కలెక్టర్ సస్పెండ్ చేశారు. అనకాపల్లి జిల్లా కలెక్టర్ విజయ కృష్ణన్ అవినీతి, నిర్లక్ష్యం వహించే అధికారులపై కొరడా ఝుళిపిస్తున్నారు. ఉద్యోగులపై ఫిర్యాదులు చేస్తే కఠిన చర్యలు తీసుకుంటున్నారు.

NTR హాస్పిటల్ లో గైనిక్‌ సివిల్‌సర్జన్‌ గా డాక్టర్‌ శోభాదేవి విధులు నిర్వహిస్తున్నారు. రోగులకు అండగా ఉండాల్సిన వైద్యురాలు వసూళ్లకు తెరలేపారు. ప్రసవం కోసం వస్తున్న వారి నుంచి డబ్బులు గుంజుతున్నారు. ఒక్కో ఆపరేషన్ కు రూ. 5 నుంచి రూ. 10 వేలు రేటు పెట్టీ మరీ వసూళ్లకు పాల్పడుతున్నారు. ఇక ఈ వ్యవహారంపై బాధితులు ఆధారాలతో సహా కలెక్టర్ కు ఫిర్యాదు చేశారు. దీంతో ఆమెపై వేటుపడింది. అనకాపల్లి జిల్లా కలెక్టర్ విజయ కృష్ణన్ డాక్టర్‌ శోభాదేవిని విధుల నుంచి సస్పెండ్ చేశారు. కాగా ఇటీవల మద్యం తాగి విధులకు హాజరైనట్లు గుర్తించిన కలెక్టర్ పరవాడ ఎంపీడీవో పై వేటు వేశారు.