Viral News: రీల్‌ కోసం నీటిలో దూకాడు.. నెక్ట్స్‌ ఏం జరిగిందో తెలిస్తే తల పట్టుకుంటారు..!

Viral News: ఒక్క రీల్ కోసం చేసిన ఆ ఒక్క జంప్.. ప్రాణాల మీదకు తెచ్చింది. కెమెరా ముందు కొన్ని సెకన్ల పాటు కనిపించే సాహసం.. జీవితాంతం మర్చిపోలేని గాయంగా మారింది. ఉత్తరప్రదేశ్‌లోని ఝాన్సీలో 32 ఏళ్ల ఓ వ్యక్తి సోషల్ మీడియా రీల్ కోసం దాదాపు 30 అడుగుల ఎత్తు నుంచి డ్యామ్‌లోకి దూకాడు. నీళ్లలో పడగానే సీన్ మారిపోయింది. రెండు కాళ్లు విరిగి, నీటిలో నుంచి బయటకు రావడం కూడా కష్టంగా మారింది.

ఝాన్సీలోని పహుజ్ డ్యామ్ ప్రాంతానికి ఆదివారం సాయంత్రం పుష్పేంద్ర కుమార్ మనౌరియా తన స్నేహితులతో కలిసి వెళ్లాడు. అక్కడి వ్యూ పాయింట్ వద్ద ఉన్న భద్రతా రెయిలింగ్‌ను దాటి నీటిలోకి దూకాలని నిర్ణయించుకున్నాడు. స్నేహితులు అతడి స్టంట్‌ను వీడియో తీస్తుండగా పుష్పేంద్ర రెయిలింగ్ ఎక్కాడు. ఆ సమయంలో వారిలో ఒకరు సరదాగా గాడ్ బ్లెస్ యువర్ సోల్ అంటూ కామెంట్ చేయడం కూడా వీడియోలో వినిపించింది. ఆ తర్వాత పుష్పేంద్ర దాదాపు 30 అడుగుల ఎత్తు నుంచి నీటిలోకి దూకాడు.

అయితే అతడు ఊహించినట్లుగా లోతైన నీటిలో పడలేదు. నీటి అడుగున ఉన్న రాళ్లపై బలంగా పడటంతో రెండు కాళ్లకు తీవ్ర గాయాలయ్యాయి. కాళ్లను కదపలేని పరిస్థితిలో నీటిలోనే కొంతసేపు ఉండిపోయాడు. బయటకు రావడానికి ప్రయత్నించినా గాయాల కారణంగా నడవలేకపోయాడు. చివరకు చేతుల సాయంతో కదులుతూ అక్కడ కనిపించిన ఓ ఇనుప రాడ్‌ను పట్టుకున్నాడు. దాన్ని ఆసరాగా చేసుకుని ఒడ్డువైపు చేరేందుకు ప్రయత్నించాడు. అతడి స్నేహితులు, అక్కడున్న కొంతమంది వ్యక్తులు సహాయం చేయడంతో చివరకు అతడిని నీటిలో నుంచి బయటకు తీసుకురాగలిగారు.

ప్రమాదం గురించి సమాచారం అందడంతో పోలీసులు అక్కడికి చేరుకున్నారు. పుష్పేంద్రను వెంటనే ఓ ప్రైవేట్ ఆసుపత్రికి తరలించారు. కుటుంబ సభ్యులకు సమాచారం అందడంతో వారు కూడా ఆసుపత్రికి చేరుకున్నారు. కాళ్లకు అయిన గాయాల తీవ్రతను పరిశీలించిన వైద్యులు ఒక కాలికి శస్త్రచికిత్స చేసి రెండు రాడ్లు అమర్చారు. మరో కాలికి కూడా ఆపరేషన్ చేయాల్సి ఉంటుందని వైద్యులు తెలిపారు.

తాను గతంలో కూడా పలు ప్రాంతాల్లో ఇలాంటి స్టంట్లు చేశానని పుష్పేంద్ర చెప్పాడు. అందుకే ఈసారి కూడా తాను సులభంగా చేయగలనని భావించినట్లు తెలిపాడు. అయితే తాను దూకిన ప్రాంతంలో నీరు తక్కువ లోతులో ఉందన్న విషయం తనకు తెలియదని చెప్పాడు. అదే అతడి జీవితాన్ని ప్రమాదంలోకి నెట్టింది.

సోషల్ మీడియాలో కొన్ని సెకన్ల వీడియో కోసం ప్రమాదకరమైన స్టంట్లు చేయడం ఇప్పుడు చాలామందికి సరదాగా మారుతోంది. కానీ కెమెరా ఆగిపోయిన తర్వాత ఎదురయ్యే పరిణామాలు మాత్రం రీల్‌లో కనిపించవు. అదృష్టవశాత్తూ పుష్పేంద్ర ప్రాణాలతో బయటపడ్డాడు. అయితే రెండు కాళ్లకు తీవ్రమైన గాయాలు కావడంతో ఆ ఒక్క స్టంట్ ఎంత పెద్ద మూల్యం తీసుకురాగలదో అతడే స్వయంగా అనుభవించాడు. ఇకపై ఇలాంటి స్టంట్ ఎప్పటికీ చేయనని పుష్పేంద్ర చెప్పడం ఈ ఘటనలో మిగిలిన అతిపెద్ద పాఠం.