బీజేపీ నేతలకు కౌంటర్‌ ఇచ్చిన టీఆర్ఎస్‌ నాయకులు..

నిన్న వరంగల్‌లో బీజేపీ శ్రేణులు వచ్చి అధికార టీఆర్‌ఎస్‌పై విమర్శలు గుప్పించారు. ఈ నేపథ్యంలో బీజేపీ నేతల వ్యాఖ్యలకు టీఆర్‌ఎస్‌ నాయకులు కౌంటర్‌ ఇచ్చారు. సోమవారం మాజీ డిప్యూటీ సీఎం, ఎమ్మెల్సీ కడియం శ్రీహరి, చీఫ్ విప్ వినయ్ భాస్కర్, ఎంపీ దయాకర్, ఎమ్మెల్సీ బండ ప్రకాష్ మీడియా సమావేశం నిర్వహించారు. ఈ సందర్భంగా కడియం శ్రీహరి మాట్లాడుతూ.. వరంగల్‌లో సభ పెట్టే అర్హత బీజేపీకి లేదని, మేడారం జాతరకు జాతీయ హోదా తీసుకురాలేని చవటలు బీజేపీ నాయకులు అంటూ తీవ్రంగా విమర్శించారు.

గిరిజన యూనివర్సిటీ, బయ్యారం ఉక్కు ఫ్యాక్టరీ, కాజీపేట రైల్వే కోచ్ ఫ్యాక్టరీ ఏమైంది..? అని ఆయన ప్రశ్నించారు. బీజేపీ తెలంగాణకు చేసిన అభివృద్ధి ఏంటీ..? బిడ్డా సంజయ్.. ఇది ఉద్యమాల గడ్డా, టీఆర్ఎస్ గడ్డా, ఖబడ్దార్..? అంటూ అగ్రహం వ్యక్తం చేశారు. కేసీఆర్‌ను విమర్శించే అర్హత సంజయ్‌కు లేదని, మధ్యప్రదేశ్, అస్సాం సీఎంలకు మతి ఉందా..? అంటూ ఆయన వ్యాఖ్యానించారు.

అభివృద్ధి సూచీలో మీరెక్కడున్నారో తెలుసా..? మోదీ ప్రభుత్వం ప్రజాస్వామ్యాన్ని భ్రష్టు పట్టిస్తోంది, ఇది ప్రమాదకకరం. మతోన్మాదులకు తెలంగాణలో చోటు లేదు. తెలంగాణ బాహుబలి కేసీఆర్. అభివృద్ధిని ఓర్వలేకనే బీజేపీ రాష్ట్రంపై దాడి చేస్తోంది. బీజేపీ సీఎంలు, మంత్రులు, నాయకులు సీఎం కేసీఆర్‌పై ఇష్టం వచ్చినట్లు మాట్లాడటాన్ని తీవ్రంగా ఖండిస్తున్నామన్నారు. తెలంగాణలో జరుగుతున్న అభివృద్ధిని గతంలో మెచ్చుకున్న వారే ఇప్పుడు దూషిస్తున్నారని, బీజేపీ నాయకులు పగటివేషగాళ్లలా వ్యవహరిస్తున్నారని ఎద్దేవా చేశారు. బీజేపీ బలహీన పడటంతోనే ఇలాంటి చర్యలకు దిగుతున్నారన్నారు.