కన్న తండ్రి కాదు.. కర్కోటకుడు

మద్యం మత్తులో కన్నకొడుకు ఫై దాడి చేశాడో తండ్రి. కనికరం లేకుండా కొడుకుని చావబాదాడు. పప్పా.. పప్పా కొట్టొద్దు పప్పా . అంటూ ఓ పసి బాలుడు బ్రతిమిలాడుతూ మంచం కిందికి వెళ్లి దాక్కున్నా, తలగడ అడ్డం పెట్టుకున్నా, కూతురు వద్దు పప్పా అని ప్రాధేయపడుతున్నా కనికరించలేదు. ఆ కర్కోటక కన్న తండ్రికి హృదయం చలించలేదు. రెండున్నర నిమిషాలు ఆగకుండా చేతిలోని కట్టె విరిగేలా ఒళ్లంతా హూనం చేసిన హృదయవిదారక ఘటన పాతబస్తీ ఛత్రినాక పోలీస్​స్టేషన్​పరిధిలో చోటు చేసుకుంది.

ఛత్రినాక ఇన్​స్పెక్టర్​సయ్యద్ అబ్దుల్ ఖాదర్​జిలానీ వివరాలు అందచేశారు. గౌలిపురాకు చెందిన జి. అశోక్​కు ఇద్దరు సంతానం. ఒక కుమారుడు (8), కుమార్తె. అశోక్​ట్రూప్​ బజార్​లో ఎలక్ట్రికల్ షాపులో పనిచేస్తూ కుటుంబాన్ని పోషిస్తున్నాడు. శనివారం మధ్యాహ్నం 3 గంటల సమయంలో కొడుకు బాగా అల్లరి చేస్తున్నాడని అప్పుడే ఇంటికి వచ్చిన భర్త అశోక్​కు భార్య చెప్పింది. తాగిన మత్తులో ఉన్న అశోక్​కన్న కొడుకుపై వీరంగం సృష్టించాడు. కట్టెతో ఇష్టం వచ్చినట్టు రెండున్నర నిమిషాలపాటు చితకబాదాడు.

ఇదంతా కూతురు సెల్​ఫోన్​లో రికార్డు చేస్తూనే … కొట్టొద్దు పప్పా అంటూ బ్రతిమిలాడింది. బాలుడి ఒళ్లంతా హూనం కావడంతో తల్లి ఛత్రినాక పోలీసులకు ఫిర్యాదు చేసింది. తల్లి జీజాబాయి ఇచ్చిన ఫిర్యాదు మేరకు కేసును నమోదు చేసకున్న పోలీసులు తండ్రి అశోక్​ను అదుపులోకి తీసుకున్నారు. తీవ్ర గాయాలపాలైన బాలుడిని చికిత్స నిమిత్తం ఉస్మానియా ఆసుపత్రికి తరలించారు. తన కొడుకుకు బుద్ధి చెన్నానని సాక్ష్యం చూపించేందుకు కూతురుతో వీడియో తీయించి అందరికి తండ్రి అశోక్ వీడియో షేర్ చేశాడు. ఈ ఘటన స్థానికంగా కలకలం రేపింది.