హమాలి పని వ్యాఖ్యలపై క్లారిటీ ఇచ్చిన మంత్రి

తెలంగాణ వ్యవసాయశాఖ మంత్రి సింగిరెడ్డి నిరంజన్ రెడ్డి ఇటీవల చేసిన వ్యాఖ్యలు వివాదాస్పదం అయిన సంగతి తెలిసిందే. చదువుకున్నోళ్ళందరికీ సర్కార్ ఉద్యోగం రాదని.. హమాలీ పని చేసుకోవాలని సూచించారు. అయితే తాజాగా ఆయన మాట్లాడుతూ.. ‘నా కామెంట్స్ తప్పుగా అన్వయించారని తెలిపారు. యువత మనోభావాలను దెబ్బతీసేలా నేను ఎప్పుడూ మాట్లాడలేదు, యువత ఎవరు బాధ పడవద్దన్నారు. చదువుకున్న నిరుద్యోగ యువత ప్రిపేర్ అవ్వండి.. నోటిఫికేషన్లు రాబోతున్నాయి అంటూ చెప్పుకొచ్చారు.

ఇక ఏపీ-తెలంగాణ జల వివాదంపై మాట్లాడుతూ.. కేంద్రం అవసరం అయిన పని చేయకుండా, ఏక పక్షంగా గెజిట్ విడుదల చేసిందన్నారు. కేంద్రం గెజిట్ రాజ్యాంగ విరుద్ధమని, కేంద్రం గెజిట్ పై రెండు జాతీయ పార్టీలకు స్పష్టమైన వైఖరి లేదన్నారు. కృష్ణ నది జలాలపై తెలంగాణ బీజేపీ, కాంగ్రెస్ ఎంపీలు వైఖరి చెప్పాలన్నారు మంత్రి నిరంజన్ రెడ్డి.

ఎరువులకు సంబంధించి ఎటువంటి కొరత లేదు, ఎరువుల సరఫరాలో జాప్యం లేకుండా ఉండేందుకు చర్యలు తీసుకోవాలని కేంద్ర మంత్రిని రేపు ఢిల్లీలో కలుస్తామన్నారు. తెలంగాణ ప్రతి ఏటా పంట విస్తీర్ణం పెరుగుతోంది. వ్యవసాయ శాఖలో ఖాళీలను గుర్తిస్తున్నారు. వ్యవసాయ శాఖకు అవసరం అయితే అదనంగా వెయ్యి పోస్టులు మంజూరు చేస్తామని కేసీఆర్ అన్నారు’ అని మంత్రి నిరంజన్ రెడ్డి తెలిపారు.