MAUD: బిల్డర్లకు గుడ్ న్యూస్.. టీడీఆర్ (TDR) వినియోగంపై ప్రభుత్వం సడలింపులు.!

తెలంగాణ ప్రభుత్వం మున్సిపల్ పరిపాలన, పట్టణాభివృద్ధి శాఖ (MAUD) ద్వారా రాష్ట్ర భవన నిర్మాణ నిబంధనలు-2012కు అత్యంత కీలకమైన సవరణలు చేస్తూ సమగ్రమైన ఉత్తర్వులను జారీ చేసింది. రాష్ట్రంలో రియల్ ఎస్టేట్ రంగాన్ని మరింత బలోపేతం చేయడంతో పాటు, గతంలో టీడీఆర్ (TDR – Transferable Development Rights) వినియోగంపై ఉన్న కఠిన నిబంధనల వల్ల బిల్డర్లు, డెవలపర్ సంస్థలు ఎదుర్కొంటున్న ఇబ్బందులను తొలగించడమే లక్ష్యంగా ఈ నిర్ణయం తీసుకున్నారు. ప్రభుత్వం జారీ చేసిన ఈ కొత్త జీవో ప్రకారం, ట్రాన్స్‌ఫరబుల్ డెవలప్‌మెంట్ రైట్స్ వినియోగంపై గతంలో ఉన్న 10 శాతం నిబంధనను సడలిస్తూ, భవనం అంతస్తుల సంఖ్యను బట్టి వర్గీకరించారు. దీని ప్రకారం 10 నుండి 20 అంతస్తుల వరకు నిర్మించే భవనాలకు 10వ అంతస్తు పైన ఉన్న మొత్తం బిల్ట్-అప్ ఏరియాలో కేవలం 3 శాతం టీడీఆర్ వినియోగిస్తే సరిపోతుంది. అలాగే 21 అంతస్తులకు పైగా నిర్మించే భారీ భవనాల విషయంలో 20వ అంతస్తు పైన ఉన్న ఏరియాలో 5 శాతం టీడీఆర్ వినియోగాన్ని తప్పనిసరి చేశారు. ఈ టీడీఆర్ సమర్పణలో కూడా బిల్డర్లకు వెసులుబాటు కల్పిస్తూ, మొత్తం టీడీఆర్‌లో 50 శాతాన్ని భవన నిర్మాణ అనుమతి (Building Permission) పొందే సమయంలో, మిగిలిన 50 శాతాన్ని భవనం పూర్తయిన తర్వాత ఆక్యుపెన్సీ సర్టిఫికేట్ (OC) జారీకి ముందు సమర్పించేలా నిబంధనలను రూపొందించారు.

Box Office : ధురంధర్ – 2 దాటికి విలవిలలాడిన ఉస్తాద్ భగత్ సింగ్

భవనాల ఎత్తు , నిర్వచనాల విషయంలో కూడా ప్రభుత్వం స్పష్టతనిస్తూ, ఇకపై 21 మీటర్లు లేదా అంతకంటే ఎక్కువ ఎత్తు ఉన్న భవనాలను మాత్రమే ‘హై-రైజ్’ (High-Rise) భవనాలుగా పరిగణించనున్నారు. అయితే ఈ ఎత్తును లెక్కించేటప్పుడు భవనం పైన ఉండే చిమ్నీలు, వాటర్ ట్యాంకులు , లిఫ్ట్ మెషిన్ రూమ్‌ల ఎత్తును మినహాయించారు. ప్లాట్ పరిమాణం , ఎత్తుకు సంబంధించి, 750 చదరపు మీటర్ల నుండి 2000 చదరపు మీటర్ల లోపు వైశాల్యం గల ప్లాట్లలో 18 మీటర్ల నుండి 21 మీటర్ల ఎత్తు వరకు భవన నిర్మాణానికి టీడీఆర్ వినియోగం ద్వారా మాత్రమే అనుమతి లభిస్తుంది. సెట్‌బ్యాక్ నిబంధనల విషయంలో కూడా టీడీఆర్ వినియోగానికి ప్రాధాన్యతనిస్తూ, హై-రైజ్ భవనాలలో గరిష్టంగా 10 శాతం వరకు సెట్‌బ్యాక్ సడలింపు పొందేందుకు అవకాశం కల్పించారు, కానీ భవనం చుట్టూ కనీసం 7 మీటర్ల ఖాళీ స్థలం ఉండాలనే నిబంధనను మాత్రం యథాతథంగా కొనసాగించారు. నాన్-హై-రైజ్ భవనాలకు కూడా టీడీఆర్ ద్వారా ఇలాంటి సడలింపులు వర్తిస్తాయి.

Jeevan Reddy: హస్తం పార్టీకి సీనియర్ నేత జీవన్‌రెడ్డి గుడ్‌బై.. రాజీనామా డేట్ ఫిక్స్!

మరోవైపు రోడ్డు వెడల్పును బట్టి అదనపు అంతస్తుల అనుమతికి సంబంధించి ప్రభుత్వం కొత్త వెసులుబాటు కల్పించింది. 2000 చదరపు మీటర్ల కంటే ఎక్కువ విస్తీర్ణం ఉన్న ప్లాట్లలో, 40 అడుగుల రోడ్డు ఉంటే 3 అదనపు అంతస్తుల వరకు, 60 అడుగుల రోడ్డు ఉంటే 4 అదనపు అంతస్తుల వరకు, , 80 అడుగుల కంటే ఎక్కువ వెడల్పు ఉన్న రోడ్ల పక్కన 5 అదనపు అంతస్తుల వరకు నిర్మించుకునే అవకాశం ఉంటుంది. మాస్టర్ ప్లాన్ రోడ్ల మార్పు లేదా తొలగింపు వంటి సందర్భాల్లో దరఖాస్తుదారులు నిర్ణీత ఛార్జీలు చెల్లించవచ్చు లేదా దానికి సమానమైన టీడీఆర్‌ను సమర్పించవచ్చు. రాష్ట్ర ప్రభుత్వ ప్రత్యేక ప్రధాన కార్యదర్శి జయేష్ రంజన్ ద్వారా జారీ చేయబడిన ఈ ఉత్తర్వులు తక్షణమే అమల్లోకి రానున్నాయి. ఈ సవరణల వల్ల టీడీఆర్ లభ్యత లేక నిలిచిపోయిన అనేక ప్రాజెక్టులకు మోక్షం లభించడమే కాకుండా, రాష్ట్రవ్యాప్తంగా భవన నిర్మాణ రంగం మరింత వేగంగా అభివృద్ధి చెందుతుందని ప్రభుత్వం ఆశిస్తోంది.