IAS Transfers : తెలంగాణలో 13 మంది ఐఏఎస్ ల బదిలీ
- తెలంగాణలో 13 మంది ఐఏఎస్‌ల బదిలీ
- సీఎం కార్యాలయంలో కీలక నియామకాలు
- ప్రధాన శాఖలకు అదనపు బాధ్యతలు
- మున్సిపల్, పర్యాటక విభాగాల్లో కొత్త పోస్టింగులు
- Follow Us :
-
-
Add as a preferred
source on google
IAS Transfers : తెలంగాణ రాష్ట్రంలో ఐఏఎస్ (IAS) అధికారుల పరిపాలన విభాగంలో ప్రభుత్వం పెద్ద ఎత్తున మార్పులు చేపట్టింది. రాష్ట్రవ్యాప్తంగా మొత్తం 13 మంది కీలక ఐఏఎస్ అధికారులను బదిలీ చేస్తూ ప్రభుత్వం అధికారిక ఉత్తర్వులు జారీ చేసింది. ఇందులో భాగంగానే, ప్రస్తుత ప్రభుత్వ ప్రధాన కార్యదర్శి (సీఎస్) కె. రామకృష్ణారావుకు పదవీ విరమణ అనంతరం ప్రభుత్వ సలహాదారుగా బాధ్యతలు అప్పగిస్తూ ప్రభుత్వం నిర్ణయం తీసుకుంది.
ముఖ్యమంత్రి కార్యాలయం , విపత్తుల నిర్వహణలో కీలక మార్పులు
ఈ తాజా బదిలీల్లో భాగంగా ముఖ్యమంత్రి కార్యాలయంలో అత్యంత కీలక నియామకం జరిగింది. సీనియర్ ఐఏఎస్ అధికారి ఎన్. శ్రీధర్‌ను ముఖ్యమంత్రి ప్రధాన కార్యదర్శిగా నియమిస్తూ ప్రభుత్వం ఉత్తర్వులు జారీ చేసింది. అలాగే, సెలవుల నుంచి తిరిగి విధుల్లో చేరిన రాహుల్ బొజ్జాను విపత్తుల నిర్వహణ శాఖ ప్రధాన కార్యదర్శిగా నియమించారు. దీనితో పాటు ఆయనకు వెనుకబడిన తరగతుల (బీసీ) సంక్షేమ శాఖ ప్రధాన కార్యదర్శిగా అదనపు బాధ్యతలను ప్రభుత్వం కొనసాగించింది.
ప్రధాన శాఖలకు అదనపు బాధ్యతల కేటాయింపు
పరిపాలనా సౌలభ్యం కోసం పలువురు సీనియర్ అధికారులకు అదనపు బాధ్యతలను అప్పగించారు. సబ్యసాచి ఘోష్‌కు హ్యాండ్లూమ్స్, టెక్స్‌టైల్స్ & హ్యాండీక్రాఫ్ట్స్ ప్రత్యేక ప్రధాన కార్యదర్శిగా పూర్తి అదనపు బాధ్యతలు (FAC) ఇవ్వడంతో పాటు, టీజీ హ్యాండీక్రాఫ్ట్స్ డెవలప్‌మెంట్ కార్పొరేషన్ వీసీ & ఎండీగా, టీజీకో (TGCO) ఎండీగా బాధ్యతలు అప్పగించారు. శైలజా రామయ్యర్‌ను ఎండోమెంట్స్ (దేవాదాయ) శాఖ ప్రధాన కార్యదర్శిగా బదిలీ చేస్తూనే, ఈపీటీఆర్‌ఐ (EPTRI) డైరెక్టర్ జనరల్‌గా అదనపు బాధ్యతలు ఇచ్చారు. అహ్మద్ నదీమ్‌ను రాజకీయ వ్యవహారాల (పొలిటికల్) ప్రధాన కార్యదర్శిగా నియమించి, మైనారిటీల సంక్షేమ శాఖకు అదనపు బాధ్యుడిగా చేర్చారు. అలాగే ఎం. రఘునందన్ రావుకు గనులు & భూగర్భ శాఖ కార్యదర్శిగా అదనపు బాధ్యతలు దక్కాయి.
మున్సిపల్, పర్యాటక రంగాల్లో నూతన పోస్టింగులు
రాష్ట్రంలోని వివిధ కార్పొరేషన్లు, మున్సిపల్ విభాగాల్లో కూడా బదిలీలు జరిగాయి. బి. అజిత్ రెడ్డిని ‘ఇన్వెస్ట్ తెలంగాణ’ చీఫ్ ఎగ్జిక్యూటివ్ ఆఫీసర్ (CEO)గా బదిలీ చేయగా, ముషర్రఫ్ అలీ ఫారూకీకి టీజీఆర్‌ఈడీసీవో (TGREDCO) వీసీ & ఎండీగా అదనపు బాధ్యతలు అప్పగించారు. పి. కాత్యాయనీ దేవిని హ్యాండ్లూమ్స్, టెక్స్‌టైల్స్ & హ్యాండీక్రాఫ్ట్స్ ప్రత్యేక కార్యదర్శిగా నియమిస్తూ, ఆమెకు స్టేట్ ఫైనాన్స్ కార్పొరేషన్ జాయింట్ ఎండీగా అదనపు బాధ్యతలు ఇచ్చారు. అలాగే కె. గంగాధర్‌ను రోడ్లు & భవనాల (R&B) శాఖ ప్రత్యేక కార్యదర్శిగా బదిలీ చేశారు. నగరాల విషయానికి వస్తే, ఇప్పటివరకు హెచ్‌ఎండీఏ జాయింట్ మెట్రోపాలిటన్ కమిషనర్‌గా ఉన్న టి. వెంకన్నను గ్రేటర్ వరంగల్ మున్సిపల్ కమిషనర్ (GWMC)గా బదిలీ చేశారు. ఆయన స్థానంలో హెచ్‌ఎండీఏ జాయింట్ మెట్రోపాలిటన్ కమిషనర్‌గా కే. చంద్రకళకు పూర్తి అదనపు బాధ్యతలు అప్పగించగా, రాష్ట్ర పర్యాటక శాఖ (Tourism) డైరెక్టర్‌గా కె. విద్యాసాగర్‌ను నియమిస్తూ ప్రభుత్వం ఉత్తర్వులు జారీ చేసింది.