Panchayat Raj Act : పంచాయతీలకు తెలంగాణ సర్కార్ గుడ్‌న్యూస్.. నిధులపై కొత్త రూల్

గ్రామ స్థాయి అభివృద్ధికి పెద్దపీట వేస్తూ తెలంగాణ ప్రభుత్వం కీలక నిర్ణయం తీసుకుంది. గ్రామ పంచాయతీలు తమ సొంత వనరుల ద్వారా సమకూర్చుకున్న ఆదాయాన్ని ఇకపై ప్రభుత్వ ఖజానా ద్వారా మళ్లించాల్సిన అవసరం లేకుండా, నేరుగా ఆయా పంచాయతీల బ్యాంకు ఖాతాల్లోనే జమ చేసుకునేందుకు వీలుగా చట్ట సవరణ చేసింది. ఈ మేరకు పంచాయతీ రాజ్ , గ్రామీణాభివృద్ధి శాఖ, తెలంగాణ పంచాయతీ రాజ్ (నాల్గవ సవరణ) చట్టం, 2026ను అక్టోబర్ 9, 2026 నుండి అమలులోకి తెస్తూ జీవో ఎంఎస్ నెం. 43ను జారీ చేసింది. ప్రభుత్వ తీసుకున్న ఈ చారిత్రాత్మక నిర్ణయంతో గ్రామాల్లో అభివృద్ధి పనులు మరింత వేగవంతం కానున్నాయి.

నిధుల విడుదలలో జాప్యానికి చెక్

గతంలో గ్రామ పంచాయతీలు వివిధ మార్గాల ద్వారా సమకూర్చుకున్న సొంత ఆదాయాన్ని ప్రభుత్వ ఖజానాకు జమ చేసి, ఆ తర్వాత నిధులను పొందాల్సి వచ్చేది. ఈ సంక్లిష్టమైన విధానం వల్ల గ్రామాల్లో అత్యవసరంగా చేపట్టాల్సిన అభివృద్ధి పనులకు నిధులు మంజూరు కావడంలో తీవ్రమైన జాప్యం జరిగేది. ఫలితంగా పారిశుధ్య పనులు, తాగునీటి సరఫరా, వీధి దీపాల నిర్వహణ, రహదారుల మరమ్మతులు వంటి ప్రాథమిక అవసరాలను తీర్చడంలో గ్రామ పంచాయతీలు తరచూ ఇబ్బందులను ఎదుర్కొనేవి. స్థానిక సంస్థల ఆర్థిక స్వయంప్రతిపత్తికి ఈ విధానం కొంత అడ్డంకిగా మారడంతో, ప్రభుత్వం ఈ శాసన సవరణను తీసుకువచ్చింది.

వేగవంతం కానున్న స్థానిక అభివృద్ధి పనులు

ఇప్పుడు కొత్త నిబంధనల ప్రకారం నిధులు నేరుగా గ్రామ పంచాయతీల బ్యాంకు ఖాతాల్లోనే జమ అవుతుండటంతో, స్థానిక సర్పంచ్‌లు లేదా పాలకవర్గాలు ఆ ఆదాయాన్ని ఎవరి అనుమతి కోసం ఎదురుచూడకుండా తక్షణమే వినియోగించుకునే అవకాశం ఏర్పడింది. ప్రజల తక్షణ స్థానిక అవసరాలను ఇట్టే తీర్చడానికి ఈ సంస్కరణ ఎంతగానో దోహదపడుతుందని అధికారులు తెలిపారు. నిధుల కొరత లేదా సాంకేతిక జాప్యం లేకుండా గ్రామాల్లో మౌలిక సదుపాయాల కల్పన, అభివృద్ధి ప్రాజెక్టులు శరవేగంగా ముందుకు సాగనున్నాయి. ఈ నిర్ణయంతో గ్రామ పంచాయతీలు ఆర్థికంగా మరింత పటిష్టంగా మారడంతో పాటు, పాలనలో పారదర్శకత పెరుగుతుందని భావిస్తున్నారు.