El Nino: ఎల్‌నినో ఎదుర్కొనేందుకు తెలంగాణ సర్కార్‌ రంగంలోకి ..10 జిల్లాలకు ప్రత్యేక ఐఏఎస్‌లు

రాష్ట్రంలో తీవ్రరూపం దాల్చుతున్న ఎల్ నినో ప్రభావం, తాగు, సాగునీటి కొరత , ముంచుకొస్తున్న వాతావరణ అత్యవసర పరిస్థితులను అధిగమించేందుకు తెలంగాణ ప్రభుత్వం కీలక నిర్ణయం తీసుకుంది. ఎల్ నినో పరిస్థితులను క్షేత్రస్థాయిలో పర్యవేక్షించి, తగిన అత్యవసర చర్యలు చేపట్టేందుకు వీలుగా ఉమ్మడి పది జిల్లాలకు సీనియర్ ఐఏఎస్ అధికారులను ప్రత్యేక అధికారులుగా నియమిస్తూ ఉత్తర్వులు జారీ చేసింది.

రాష్ట్రవ్యాప్తంగా జిల్లాల బాధ్యతలు చేపట్టిన సీనియర్ అధికారులు

జిల్లాల వారీగా పర్యవేక్షణ బాధ్యతలను ప్రభుత్వం అనుభవజ్ఞులైన అధికారులకు అప్పగించింది. ఉమ్మడి హైదరాబాద్ జిల్లాకు జయేష్ రంజన్, రంగారెడ్డి జిల్లాకు వికాస్ రాజ్, కరీంనగర్ జిల్లాకు బెనహర్ మహేష్ దత్తా ఎక్కా, మెదక్ జిల్లాకు ఎ. వాణి ప్రసాద్ ప్రత్యేక అధికారులుగా వ్యవహరిస్తారు. అలాగే నిజామాబాద్ జిల్లాకు యోగితా రాణా, నల్గొండ జిల్లాకు హరిచందన దాసరి, ఆదిలాబాద్ జిల్లాకు ఇలాంబర్తి కె., వరంగల్ జిల్లాకు ఎ. శ్రీదేవిసేన, మహబూబ్‌నగర్ జిల్లాకు వి.పి. గౌతమ్, ఖమ్మం జిల్లాకు అనుదీప్ దురిశెట్టి నియమితులయ్యారు.

క్షేత్రస్థాయిలో నిరంతర పర్యవేక్షణ, కార్యాచరణ

నియమితులైన ప్రత్యేక ఐఏఎస్ అధికారులు తమకు కేటాయించిన ఉమ్మడి జిల్లాల్లో నిరంతరం పర్యటిస్తూ ప్రతికూల వాతావరణ పరిస్థితులు, తాగునీటి ఎద్దడి, సాగునీటి లభ్యత, వర్షపాతం నమోదు స్థితిగతులను సమీక్షిస్తారు. వీటితో పాటు వ్యవసాయం, గృహ అవసరాలకు అందుతున్న విద్యుత్ సరఫరా తీరుపై క్షేత్రస్థాయి యంత్రాంగాన్ని సమన్వయం చేస్తారు. ఎలాంటి అత్యవసర పరిస్థితి తలెత్తినా తక్షణ ఉపశమన చర్యలు చేపట్టడంతో పాటు, ప్రభుత్వానికి ఎప్పటికప్పుడు సమగ్ర నివేదికలు అందించేలా కార్యాచరణను సిద్ధం చేశారు.