Telangana Cabinet: తెలంగాణలో కరువు టెన్షన్.. 235 మండలాల్లో వర్షభావం..

తెలంగాణ రాష్ట్రంలో ఏర్పడిన ఎల్ నినో (El Niño) ప్రభావం, దానివల్ల తలెత్తిన పరిస్థితులపై ముఖ్యమంత్రి ఏ. రేవంత్ రెడ్డి అధ్యక్షతన జరిగిన కేబినెట్ సమావేశంలో సుదీర్ఘంగా చర్చించారు. రాష్ట్రవ్యాప్తంగా దాదాపు 235 మండలాల్లో తీవ్ర వర్షభావం కారణంగా కరువు పరిస్థితులు నెలకొన్నట్లు ప్రభుత్వం ప్రాథమికంగా గుర్తించింది. రైతాంగం ఎదుర్కొంటున్న ఇబ్బందులు, తాగునీరు, సాగునీటి ఎద్దడిపై మంత్రులు లోతుగా సమీక్షించారు. బాధితులను ఆదుకునేందుకు తక్షణమే చేపట్టాల్సిన ఉపశమన చర్యలపై ప్రత్యేకంగా చర్చించేందుకు కేబినెట్ సబ్ కమిటీని రంగంలోకి దించాలని నిశ్చయించారు.

సలహాలు, సూచనల కోసం త్వరలోనే అఖిలపక్ష సమావేశం

రాష్ట్రంలో నెలకొన్న ఈ క్లిష్టమైన ఎల్ నినో పరిస్థితులను ఎదుర్కొనేందుకు, కరువు నివారణ ఉపశమన చర్యలపై అన్ని రాజకీయ పక్షాల అభిప్రాయాలను తీసుకోనున్నారు. ఇందులో భాగంగా త్వరలోనే అఖిలపక్ష సమావేశాన్ని ఏర్పాటు చేయాలని ముఖ్యమంత్రి రేవంత్ రెడ్డి అధికారులను ఆదేశించారు. అన్ని పార్టీల నాయకులు, నిపుణుల నుంచి సలహాలు, సూచనలు స్వీకరించి సమగ్ర ప్రణాళికతో ముందుకు వెళ్లాలని ప్రభుత్వం నిర్ణయించింది.

కేంద్రం నుంచి సహాయం కోసం ఢిల్లీకి పయనం

రాష్ట్రంలోని వర్షభావ మండలాలను అధికారికంగా కరువు మండలాలుగా ప్రకటించడంతో పాటు, బాధిత ప్రాంతాలకు తగినంత ఆర్థిక సాయం అందించాలని కేంద్ర ప్రభుత్వాన్ని విజ్ఞప్తి చేయాలని కేబినెట్ తీర్మానించింది. రాష్ట్రంలో ఉన్న వాస్తవ పరిస్థితులు, పంట నష్టం, కరువు తీవ్రతపై త్వరలోనే రాష్ట్ర మంత్రులు, అధికారుల బృందం ఢిల్లీకి వెళ్లనుంది. అక్కడ సంబంధిత కేంద్ర మంత్రులను కలసి రాష్ట్ర పరిస్థితిని సమగ్ర నివేదిక రూపంలో అందించి, కేంద్రం నుంచి తక్షణ ఉపశమన నిధులు రాబట్టేందుకు విన్నవించాలని కేబినెట్ నిర్ణయించింది.