తెలంగాణ ‘CETs’ షెడ్యూల్ విడుదల.. పూర్తి వివరాలు ఇవే.!

తెలంగాణ రాష్ట్రంలో ఉన్నత చదువుల కోసం సిద్ధమవుతున్న విద్యార్థులకు కీలక సమాచారాన్ని అందిస్తూ, 2026-27 విద్యాసంవత్సరానికి సంబంధించిన ఉమ్మడి ప్రవేశ పరీక్షల (CETs) షెడ్యూల్‌ను ఉన్నత విద్యా మండలి అధికారికంగా ప్రకటించింది. ఈ తాజా ప్రకటన ప్రకారం, మే 4వ తేదీ నుండి జూన్ 3వ తేదీ వరకు నెల రోజుల పాటు వివిధ వృత్తి విద్యా కోర్సుల ప్రవేశ పరీక్షలు విడతల వారీగా జరగనున్నాయి. ఈ విద్యా సందడికి అత్యంత కీలకమైన TG EAPCET (ఎప్ సెట్) తో శ్రీకారం చుట్టనున్నారు. ఇందులో భాగంగా మే 4, 5 తేదీల్లో అగ్రికల్చర్ , ఫార్మసీ విభాగాలకు పరీక్షలు నిర్వహించగా, మే 9, 10 , 11 తేదీల్లో ఇంజనీరింగ్ స్ట్రీమ్ విద్యార్థులకు పరీక్షలు జరగనున్నాయి.

New Year 2026-Vizag: న్యూ ఇయర్ వేడుకలకు సిద్దమైన విశాఖ.. ఈసారి డబుల్ టార్గెట్!

ఇది ముగిసిన వెంటనే మే 12న బి.ఎడ్ కోర్సుల్లో ప్రవేశాల కోసం ఉద్దేశించిన TG EDCET పరీక్షను నిర్వహించనున్నారు. వ్యాపార , సాంకేతిక నిర్వహణ రంగాల్లో రాణించాలనుకునే విద్యార్థుల కోసం నిర్వహించే TG ICET (ఎంబీఏ, ఎంసీఏ) పరీక్షలు మే 13, 14 తేదీల్లో జరగనున్నాయి. పాలిటెక్నిక్ పూర్తి చేసి నేరుగా ఇంజనీరింగ్ రెండో సంవత్సరంలో చేరాలనుకునే లాటరల్ ఎంట్రీ విద్యార్థుల కోసం TG ECETను మే 15న నిర్వహించనున్నారు. న్యాయ విద్యపై ఆసక్తి ఉన్న అభ్యర్థుల కోసం మే 18వ తేదీన TG LAWCET , TG PGLCET పరీక్షలను ఖరారు చేశారు.

ఇక ఉన్నత స్థాయి సాంకేతిక విద్య అయిన ఎంటెక్ , ఎం.ఫార్మసీ కోర్సుల ప్రవేశాల కోసం నిర్వహించే TG PGECET పరీక్షలు మే 28 నుంచి 31 వరకు నాలుగు రోజుల పాటు సాగనున్నాయి. ఈ ప్రవేశ పరీక్షల పరంపర చివరగా వ్యాయామ విద్య కోర్సుల కోసం నిర్వహించే TG PECET తో మే 31 నుంచి జూన్ 3వ తేదీ వరకు జరగనున్న పరీక్షలతో ముగియనుంది. ఉన్నత విద్యా మండలి ప్రకటించిన ఈ సమగ్ర షెడ్యూల్ ద్వారా విద్యార్థులు తమ లక్ష్యాలకు అనుగుణంగా ముందస్తు ప్రణాళికలు సిద్ధం చేసుకునే అవకాశం కలిగింది.

Anil Ravipudi-Chiranjeevi: చిరుని చూసి.. చరణ్‌కు తమ్ముడా అని అడుగుతున్నారు!