Harish Rao : డాక్టర్ మమతకు హరీష్ రావు సెల్యూట్.. ‘దేవుళ్లు ఎందుకంటారో నిరూపించారు.!’

మాజీ ఎమ్మెల్యే పెద్ది సుదర్శన్ రెడ్డికి ప్రాణాపాయం తప్పించి, ఆయన ప్రాణాలను కాపాడిన డాక్టర్ మమతా రెడ్డిపై మాజీ మంత్రి, బీఆర్ఎస్ నాయకుడు హరీష్ రావు ప్రశంసల వర్షం కురిపించారు. ఈ మేరకు ఆయన సోషల్ మీడియా ప్లాట్‌ఫామ్ ‘ఎక్స్’ (ట్విట్టర్) వేదికగా డాక్టర్ మమతా రెడ్డికి తన హృదయపూర్వక కృతజ్ఞతలు తెలియజేశారు. పెద్ది సుదర్శన్ రెడ్డి ప్రాణాలను కాపాడటంలో ఆమె అసాధారణమైన అంకితభావంతో, తీవ్రమైన ఒత్తిడిలో కూడా అచంచలమైన నిబద్ధతను, సమయస్ఫూర్తిని ప్రదర్శించారని హరీష్ రావు కొనియాడారు.

అనేక దఫాలుగా సీపీఆర్ (CPR) చేసిన తర్వాత కూడా ఆశ వదులుకోకుండా, నిరంతర శ్రమతో సుదర్శన్ రెడ్డి గుండెచప్పుడును విజయవంతంగా పునరుద్ధరించడం ఒక వైద్య అద్భుతమని ఆయన అభివర్ణించారు. డాక్టర్ మమతా రెడ్డి ప్రదర్శించిన కరుణ, పట్టుదల, పోరాట స్ఫూర్తి వైద్యులను సమాజంలో ఎందుకు సజీవ దేవుళ్లుగా భావిస్తారో మరోసారి నిరూపించాయని హరీష్ రావు పేర్కొన్నారు. వైద్య వృత్తికే ఆదర్శంగా నిలిచిన డాక్టర్ గారికి తన ప్రగాఢ గౌరవ వందనాలు తెలుపుతూ.. పెద్ది సుదర్శన్ రెడ్డి త్వరగా కోలుకోవాలని “త్వరగా కోలుకోండి, పెద్ది అన్న” అని ఆకాంక్షించారు.