సీఎం కేసీఆర్ నిన్న మీడియా సమావేశం నిర్వహించి మొయినాబాద్ ఎమ్మెల్యేల కొనుగోలు వ్యవహారంపై వీడియోలు విడుదల చేశారు. అంతేకాకుండా.. బీజేపీ అగ్రనేతలతో పాటు అవలంభిస్తున్న తీరుపై విమర్శలు గుప్పించారు. ఈనేపథ్యంలో సీఎం కేసీఆర్ వ్యాఖ్యలకు బీజేపీ జాతీయ ఉపాధ్యక్షురాలు డీకే అరుణ కౌంటర్ ఇచ్చారు. తాజాగా డీకే అరుణ మాట్లాడుతూ.. మీ ఎమ్మెల్యేలను కొనడానికి వచ్చారో? ఇంకా దేనికి వచ్చారో ఇప్పటి వరకు మీకే క్లారిటీ లేదని ఆమె విమర్శించారు. కానీ కేసీఆర్ కు మాత్రం చాలా క్లారిటీ ఉందని, ఎందుకంటే ఇదంతా చేయించింది ఆయనే కాబట్టి అంటూ ఆమె మండిపడ్డారు. ముఖ్యమంత్రి ప్రజాస్వామ్యం గురించి మాట్లాడుతుంటే నవ్వాలో.. ఏడవాలో తెలియడంలేదని ఆమె ఎద్దేవా చేశారు. ప్రెస్ మీట్ లో మిమ్మల్ని ఎవరూ ప్రశ్నించొద్దా? అని ఆమె ధ్వజమెత్తారు. దళితులంటే చాలా గౌరవమన్నారు.. మరి కొప్పుల ఈశ్వర్ ను ఎందుకు సమావేశం నుంచి పక్కకు పంపించారు అని ఆమె ప్రశ్నించారు. అంతేకాకుండా.. దళిత వ్యక్తులు, ఎమ్మెల్యేలంటే కనీస గౌరవం లేదని ఆమె దుయ్యబట్టారు.
Also Read : Kishan Reddy: మీ ఎమ్మెల్యేలను కొనే ఖర్మ మాకు లేదు
వారికే కాదు ఇతర ఎమ్మెల్యేలు, మంత్రులకు కూడా విలువ లేదని, ఫాంహౌజ్ లోని నలుగురు ఎమ్మెల్యేలను మాత్రం వెంటే పెట్టుకుని తిరుగుతున్నారని ఆమె వ్యాఖ్యానించారు. ఇదేనా ప్రజాస్వామం, స్వేచ్ఛ అని ఆమె ప్రశ్నించారు. ఇదంతా డ్రామా అని ప్రతిఒక్కరికీ అర్థమైందని, బీజేపీని విమర్శించే అర్హత కేసీఆర్ కు లేదని ఆమె అన్నారు. రాజ్యాంగాన్ని మార్చేంతటి ఘనుడు కేసీఆర్ అని ఆమె చురకలు అంటించారు. ఆయన నీతిమంతుడైతే మాట్లాడాలని, నువ్వెన్ని లక్షల కోట్లు సంపాదించావో.. గతంలో నీ కుటుంబం పరిస్థితి ఎలా ఉంది? ఇప్పుడెలా సంపాదించావు అని, ప్రజలు మీకు భయపడి, అహంకారానికి గురై సైలెంట్ గా ఉండొచ్చని, ఆ నలుగురు ఎమ్మెల్యేల్లో ముగ్గురు మీరు కొనుక్కున్న వారే ఉన్నారని ఆమె అన్నారు. మీరు కొంటే తప్పులేదు.. మేము రాజీనామా చేయించి గెలిస్తే అప్రజాస్వామ్యమా? అని ఆమె అన్నారు. ఆడియోలో ఏముందో.. వీడియోలో కూడా అదే ఉందని, ప్రధాని మోడీ.. నీలాగ మోసపు మాటలు మాట్లాడలేదని, నువ్వు ఇచ్చిన హామీల వీడియోలు ఒకసారి చూడు అంటూ ఆమె హితవు పలికారు.
