Virat Kohli Records: 110 పరుగులు, 2 సెంచరీలు.. సచిన్ నాలుగు రేర్ రికార్డులపై ‘కింగ్’ కోహ్లీ కన్ను!

Virat Kohli Eyes Sachin Tendulkar’s Rare Records: టీమిండియా స్టార్ బ్యాటర్, రికార్డుల రారాజు విరాట్ కోహ్లీ మరలా రికార్డుల వేటకు సిద్ధమయ్యాడు. మూడు వన్డేల సిరీస్‌లో భాగంగా వెస్టిండీస్‌తో ఈరోజు తిరువనంతపురంలో జరగనున్న తొలి వన్డేలో బరిలోకి దిగనున్న కింగ్.. ఒకేసారి నాలుగు భారీ రికార్డులను బద్దలు కొట్టే అవకాశం ఉంది. ముఖ్యంగా క్రికెట్ దిగ్గజం సచిన్ టెండూల్కర్ పేరిట ఉన్న రికార్డులను బ్రేక్ చేయనున్నాడు. ఆ రేర్ రికార్డులు ఏంటో ఓసారి చూద్దాం.

మరో 59 పరుగులు:

వెస్టిండీస్‌పై విరాట్ కోహ్లీకి అద్భుతమైన రికార్డు ఉంది. ఆ జట్టుపై ఇప్పటివరకు 43 మ్యాచ్‌ల్లో 41 ఇన్నింగ్స్ ఆడిన కోహ్లీ.. 66.50 సగటుతో 2,261 పరుగులు చేశాడు. ఇందులో 9 సెంచరీలు, 11 అర్ధసెంచరీలు ఉన్నాయి. వన్డే క్రికెట్‌లో భారత్ తరఫున అత్యధిక పరుగులు చేసిన రెండో బ్యాటర్‌గా ఉన్న విరాట్.. ప్రస్తుతం 14,941 పరుగులతో ఉన్నాడు. మరో 59 పరుగులు చేస్తే 15,000 వన్డే పరుగుల మైలురాయిని అందుకుంటాడు. ఈ ఘనత సాధించిన రెండో భారత బ్యాటర్‌గా, మొత్తంగా ఈ మార్క్‌ను అందుకున్న ఆటగాళ్ల జాబితాలో విరాట్ చేరనున్నాడు.

తిరువనంతపురంలో అద్భుత రికార్డు:
అంతర్జాతీయ క్రికెట్‌లో 100 సెంచరీల మైలురాయిపై కూడా విరాట్ కోహ్లీ కన్నేశాడు. ప్రస్తుతం మూడు ఫార్మాట్లలో కలిపి 85 సెంచరీలు చేసిన కోహ్లీ.. 100 శతకాల మార్కుకు ఇంకా 15 సెంచరీల దూరంలో ఉన్నాడు. వెస్టిండీస్‌పై ఇప్పటికే 41 ఇన్నింగ్స్‌లో 9 సెంచరీలు చేసిన నేపథ్యంలో ఈ సిరీస్‌లో మరో శతకం కోసం అభిమానులు ఆసక్తిగా ఎదురుచూస్తున్నారు. తిరువనంతపురంలో కూడా కోహ్లీకి అద్భుతమైన రికార్డు ఉంది. ఈ మైదానంలో ఇప్పటివరకు రెండు వన్డేలు ఆడిన విరాట్.. 199 పరుగులు చేసి ఒక్కసారి కూడా ఔట్ కాలేదు. 2023 జనవరిలో శ్రీలంకతో జరిగిన మ్యాచ్‌లో ఏకంగా 166 పరుగులతో నాటౌట్గా నిలిచాడు. 110 బంతుల్లో 13 ఫోర్లు, 8 సిక్సర్లతో విరుచుకుపడిన కోహ్లీ.. 85 బంతుల్లో సెంచరీ పూర్తి చేసుకున్నాడు. ఆ తర్వాత మరింత వేగం పెంచి కేవలం 25 బంతుల్లో మరో 66 పరుగులు సాధించాడు.

మరో రెండు శతకాలు:
ఇక లిస్ట్-ఏ క్రికెట్‌లో అత్యధిక సెంచరీల విషయంలోనూ విరాట్ కోహ్లీ మరో అడుగు దూరంలో ఉన్నాడు. ప్రస్తుతం 59 లిస్ట్-ఏ శతకాలతో ఉన్న కోహ్లీ.. మరో రెండు సెంచరీలు చేస్తే సచిన్ టెండూల్కర్ పేరిట ఉన్న 60 లిస్ట్-ఏ సెంచరీల రికార్డును అధిగమిస్తాడు. సొంత గడ్డపై అంతర్జాతీయ సెంచరీల విషయంలోనూ కోహ్లీని మరో రికార్డు ఊరిస్తోంది. భారత్‌లో ఇప్పటివరకు 41 అంతర్జాతీయ సెంచరీలు చేసిన విరాట్.. మరో రెండు శతకాలు చేస్తే సచిన్ పేరిట ఉన్న 42 హోమ్ సెంచరీల రికార్డును బద్దలు కొట్టనున్నాడు.

మరో 110 పరుగులు:
భారత్‌లో వన్డేల్లో అత్యధిక పరుగులు చేసిన బ్యాటర్‌గా ఉన్న సచిన్ రికార్డు పైనా విరాట్ కన్నేశాడు. సొంత గడ్డపై సచిన్ 164 మ్యాచ్‌ల్లో 6,976 వన్డే పరుగులు సాధించాడు. ప్రస్తుతం కోహ్లీ 130 మ్యాచ్‌ల్లో 6,867 పరుగులతో ఉన్నాడు. అంటే మరో 110 పరుగులు చేస్తే సచిన్ రికార్డును విరాట్ అధిగమిస్తాడు. ఇందులో కింగ్ సగటు 62.42 కాగా.. 27 సెంచరీలు, 36 అర్ధసెంచరీలు ఉన్నాయి.

మంచి ఫామ్‌లో కింగ్:
ఈ ఏడాది కూడా విరాట్ కోహ్లీ మంచి ఫామ్‌లో ఉన్నాడు. 2026లో ఇప్పటివరకు ఆరు ఇన్నింగ్స్‌లో 64.00 సగటుతో 384 పరుగులు చేశాడు. స్ట్రైక్ రేట్ 106కు పైగా ఉండగా.. ఒక సెంచరీతో పాటు మూడు అర్ధసెంచరీలు సాధించాడు. వెస్టిండీస్‌తో వన్డే సిరీస్‌లో విరాట్ బ్యాట్ నుంచి భారీ ఇన్నింగ్స్ వస్తే.. ఒకేసారి పలు రికార్డులు అతని ఖాతాలో చేరే అవకాశం ఉంది. ముఖ్యంగా సచిన్ టెండూల్కర్‌ నాలుగు కీలక రికార్డులపై కోహ్లీ కన్నేయడంతో తొలి వన్డేపై అభిమానుల్లో ఆసక్తి మరింత పెరిగింది.