Vaibhav Suryavanshi: Vaibhav Suryavanshi:మూడో టీ20కి ముందు టీమిండియాకు షాక్.. నెట్స్‌లో గాయపడ్డ ఓపెనర్ వైభవ్! ఇప్పుడు ఎలా ఉన్నాడంటే?

Vaibhav Suryavanshi: ఇంగ్లాండ్‌తో జరగబోయే కీలకమైన మూడో టీ20 మ్యాచ్‌కు ముందు టీమిండియా క్యాంప్‌లో తీవ్ర కలకలం రేగింది. టీమిండియా యువ సంచలనం, ఓపెనర్ వైభవ్ సూర్యవంశీ (Vaibhav Suryavanshi) నెట్స్ ప్రాక్టీస్ చేస్తుండగా ఒక భయానక ప్రమాదం జరిగింది. బ్యాటింగ్ ప్రాక్టీస్ సమయంలో బంతి బలంగా తగలడంతో ఈ 15 ఏళ్ల ‘బేబీ బాస్’ తీవ్రమైన నొప్పితో పిచ్‌పైనే కుప్పకూలిపోయాడు. ట్రెంట్ బ్రిడ్జ్ మైదానంలో టీమిండియా ఆటగాళ్లు నెట్స్‌లో తీవ్రంగా శ్రమిస్తున్నారు. ఈ క్రమంలో వైభవ్ సూర్యవంశీ బ్యాటింగ్ చేస్తుండగా, టీమిండియా థ్రో డౌన్ స్పెషలిస్ట్ రఘు అత్యంత వేగవంతమైన షార్ప్ బౌన్సర్‌ను విసిరాడు. ఆ బంతిని పుల్ షాట్ ఆడేందుకు వైభవ్ ప్రయత్నించగా.. టైమింగ్ మిస్ అవ్వడంతో బంతి నేరుగా వచ్చి అతని ఛాతి, పొట్ట మధ్య భాగంలో బలంగా తాకింది. బంతి తగిలిన వెంటనే వైభవ్ నొప్పితో విలవిలలాడుతూ కింద కూర్చుండిపోయాడు. దీంతో వెంటనే ప్రాక్టీస్ సెషన్‌ను నిలిపివేసి, అతనికి ప్రాథమిక చికిత్స అందించి నీళ్లు తాగించారు.

ఇప్పుడు వైభవ్ పరిస్థితి ఎలా ఉందంటే..

టీమిండియా మేనేజ్‌మెంట్‌తో పాటు అభిమానులందరూ ఊపిరి పీల్చుకునే విషయం ఏమిటంటే.. ఈ యంగ్ సెన్సేషన్‌కు ఎలాంటి తీవ్రమైన గాయం కాలేదు. బంతి బలంగా తాకినప్పటికీ.. కేవలం 5 నుంచి 6 నిమిషాల వ్యవధిలోనే కోలుకున్న వైభవ్, మళ్లీ పట్టుదలతో బ్యాట్ పట్టి బరిలోకి దిగాడు. గాయానికి ముందు ఎంత దూకుడుగా ఆడాడో, కోలుకున్న తర్వాత కూడా అదే ఉత్సాహంతో షార్ట్ పిచ్ బంతులను బౌండరీలకు తరలిస్తూ కనిపించాడు. తన డెబ్యూ మ్యాచ్‌లో ఇంగ్లాండ్ బౌలర్లు షార్ట్ బాల్స్‌తో ఇబ్బంది పెట్టడంతో, ఈసారి దానికి గట్టి కౌంటర్ ఇచ్చేందుకు వైభవ్ నెట్స్‌లో గట్టిగా శ్రమిస్తున్నాడు. వైభవ్ సూర్యవంశీ ప్రాక్టీస్ సెషన్‌లో మరో ఆసక్తికరమైన దృశ్యం కనిపించింది. ఈ 15 ఏళ్ల వండర్ కిడ్ బ్యాటింగ్ చేస్తుంటే, మరో ఓపెనర్ అభిషేక్ శర్మ పక్కనే నిలబడి అత్యంత నిశితంగా గమనించాడు. వైభవ్ ఏ బంతిని ఎలా ఎదుర్కొంటున్నాడు, ఎలాంటి షాట్లు ఆడుతున్నాడనే దానిపై దృష్టి పెట్టాడు. వైభవ్‌కు ఎలాంటి సలహాలు ఇవ్వనప్పటికీ.. అతడిని చూసి నేర్చుకునే ప్రయత్నం చేస్తున్నట్లు అనిపించింది. వైభవ్ ఒక్కో షాట్ కొట్టిన ప్రతిసారీ.. అభిషేక్ కూడా పక్కనే షాడో ప్రాక్టీస్ చేస్తూ కనిపించడం విశేషం.

భారత్‌కు చావో రేవో సమరం..

ఇంగ్లాండ్‌తో జరగనున్న మూడో టీ20 మ్యాచ్ టీమిండియాకు అత్యంత కీలకంగా మారింది. ఇప్పటికే సిరీస్‌లో వెనుకబడిన భారత్.. ఈ మ్యాచ్‌లో ఓడిపోతే ఐర్లాండ్ సిరీస్ తర్వాత ఈ సిరీస్ కూడా చేజారిపోయే ప్రమాదం ఉంది. ఒకరకంగా చెప్పాలంటే మిగిలిన మూడు మ్యాచ్‌లు భారత్‌కు ‘చావో రేవో’ లాంటివే. ఈ నేపథ్యంలో పవర్‌ప్లేలో జట్టుకు మెరుపు ఆరంభాన్ని ఇవ్వడంలో వైభవ్ సూర్యవంశీ పాత్ర అత్యంత కీలకం కానుంది. ఈ మ్యాచ్‌లో ‘బేబీ బాస్’ బ్యాట్ ఝుళిపిస్తేనే టీమిండియా విజయావకాశాలు మెరుగవుతాయని విశ్లేషకులు భావిస్తున్నారు.