RCB vs MI : RCB బౌలర్ల ధాటికి ముంబై తడబాటు.. భువనేశ్వర్ కుమార్ ‘నాలుగు’ వికెట్ల పంజా.!

RCB vs MI : ఐపీఎల్ 2026లో భాగంగా వాంఖడే స్టేడియం వేదికగా ముంబై ఇండియన్స్ , రాయల్ ఛాలెంజర్స్ బెంగళూరు (RCB) మధ్య జరుగుతున్న పోరు ఉత్కంఠ భరితంగా సాగుతోంది. టాస్ ఓడి మొదట బ్యాటింగ్‌కు దిగిన ముంబై ఇండియన్స్ నిర్ణీత 20 ఓవర్లలో 7 వికెట్ల నష్టానికి 166 పరుగులు చేసింది. ఆర్‌సీబీ వెటరన్ పేసర్ భువనేశ్వర్ కుమార్ తన పాత రోజులను గుర్తు చేస్తూ అద్భుతమైన స్వింగ్‌తో ముంబై బ్యాటర్లను బెంబేలెత్తించాడు. ఇన్నింగ్స్ మూడో ఓవర్లోనే వరుస బంతుల్లో రోహిత్ శర్మ (22), సూర్యకుమార్ యాదవ్ (0)లను అవుట్ చేసి ముంబైని కోలుకోలేని దెబ్బతీశాడు. ముఖ్యంగా సూర్యకుమార్ యాదవ్ ఎదుర్కొన్న మొదటి బంతికే విరాట్ కోహ్లీకి క్యాచ్ ఇచ్చి గోల్డెన్ డకౌట్‌గా వెనుదిరగడం మైదానంలోని ప్రేక్షకులను షాక్‌కు గురిచేసింది. భువనేశ్వర్ తన నాలుగు ఓవర్ల కోటాలో కేవలం 23 పరుగులే ఇచ్చి 4 కీలక వికెట్లు పడగొట్టి ఈ సీజన్‌లో తన ఆధిపత్యాన్ని చాటుకున్నాడు.

ప్రారంభంలోనే మూడు వికెట్లు కోల్పోయి 28 పరుగులకే కష్టాల్లో పడ్డ ముంబైని యువ సంచలనం తిలక్ వర్మ , నమన్ ధీర్ ఆదుకున్నారు. వీరిద్దరూ ఆచితూచి ఆడుతూనే వీలు చిక్కినప్పుడల్లా బౌండరీలతో స్కోరు బోర్డును ముందుకు నడిపించారు. నమన్ ధీర్ 32 బంతుల్లో 47 పరుగులు చేసి రసిక్ సలామ్ బౌలింగ్‌లో అవుట్ అవ్వగా, తిలక్ వర్మ మరోసారి జట్టుకు సంక్షోభ రక్షకుడిగా నిలిచాడు. 37 బంతుల్లో అర్ధశతకాన్ని పూర్తి చేసుకున్న తిలక్, మొత్తం 42 బంతుల్లో 57 పరుగులు చేసి జట్టుకు గౌరవప్రదమైన స్కోరును అందించాడు. అయితే ఇన్నింగ్స్ చివరలో భువనేశ్వర్ కుమార్ మళ్లీ విజృంభించి తిలక్ వర్మను క్లీన్ బౌల్డ్ చేయడంతో ముంబై భారీ స్కోరు చేసే అవకాశం కోల్పోయింది. ముంబై ఇన్నింగ్స్‌లో తిలక్, నమన్ మినహా మిగిలిన బ్యాటర్లు ఎవరూ కనీసం 20 పరుగుల మార్కును కూడా దాటలేకపోయారు.

చివరి ఓవర్లలో ఆర్‌సీబీ బౌలర్లు కట్టుదిట్టంగా బౌలింగ్ చేయడంతో ముంబై ఆశించిన స్థాయిలో పరుగులు రాబట్టలేకపోయింది. రసిక్ సలామ్ వేసిన ఆఖరి ఓవర్లో ముంబై కేవలం 5 పరుగులు మాత్రమే చేయగలిగింది. జోష్ హేజిల్‌వుడ్ , రొమారియో షెపర్డ్ తలో వికెట్ తీసి భువనేశ్వర్‌కు సహకరించారు. ముంబై నిర్దేశించిన 167 పరుగుల లక్ష్యం ఆర్‌సీబీ లాంటి పటిష్టమైన బ్యాటింగ్ లైనప్‌కు పెద్ద కష్టమేమీ కాకపోయినా, ముంబై బౌలింగ్ విభాగంలో జస్ప్రీత్ బుమ్రా లాంటి ప్రపంచ స్థాయి బౌలర్లు ఉండటం మ్యాచ్‌ను ఆసక్తికరంగా మార్చింది. విరాట్ కోహ్లీ , రజత్ పాటిదార్‌లు ఆరంభంలోనే జోరు కనబరిస్తే ఆర్‌సీబీకి విజయం సులభం అవుతుంది, లేదంటే వాంఖడే పిచ్‌పై ఈ స్వల్ప లక్ష్యాన్ని కాపాడుకోవడానికి ముంబై బౌలర్లు శతవిధాలా ప్రయత్నించడం ఖాయం.