Duleep Trophy 2026: వైభవ్ సూర్యవంశీ చెలరేగుతాడా?.. షమీ, పృథ్వీ, సర్ఫరాజ్లకు కీలక పరీక్ష..
- Follow Us :
-
-
Add as a preferred
source on google
Duleep Trophy 2026: ఐపీఎల్ సూపర్ స్టార్.. యూనివర్సల్ బేబీ బాస్ వైభవ్ సూర్యవంశీ ఏ మ్యాచ్ ఆడినా.. దానిపై క్రికెట్ ఫ్యాన్స్కు ఆసక్తి పెరుగుతుంది.. ఇప్పుడు మరోసారి బుడ్డోడు బ్యాట్ అందుకునే సమయం వచ్చేసింది.. భారత దేశవాళీ క్రికెట్ సీజన్కు నాంది పలుకుతూ 2026-27 దులీప్ ట్రోఫీ ఆదివారం, ఆగస్టు 23 నుంచి ప్రారంభం కానుంది. ఈసారి టోర్నమెంట్పై భారీ అంచనాలు ఉన్నాయి. 15 ఏళ్ల యువ సంచలనం వైభవ్ సూర్యవంశీ నుంచి 35 ఏళ్ల అనుభవజ్ఞుడు మహమ్మద్ షమీ వరకు పలువురు ఆటగాళ్లకు తమ సత్తా నిరూపించుకునే కీలక వేదికగా దులీప్ ట్రోఫీ మారనుంది. వైభవ్ సూర్యవంశీ ఈ టోర్నమెంట్లో ప్రధాన ఆకర్షణగా నిలవనున్నాడు. ఈస్ట్ జోన్ తరఫున బరిలోకి దిగనున్న వైభవ్.. నార్త్ ఈస్ట్ జోన్తో ఆగస్టు 23న ఉదయం 9:30 గంటలకు బెంగళూరులోని బీసీసీఐ సెంటర్ ఆఫ్ ఎక్సలెన్స్ గ్రౌండ్-2లో ఆడనున్నాడు. ఈస్ట్ జోన్ జట్టుకు ఇషాన్ కిషన్ నాయకత్వం వహిస్తున్నాడు.
ఐపీఎల్లో అదరగొట్టడంతో పాటు ఇటీవల ఇంగ్లండ్ పర్యటనలో టీ20 అంతర్జాతీయ అరంగేట్రం చేసిన వైభవ్కు ఇప్పుడు రెడ్ బాల్ క్రికెట్ అసలైన పరీక్షగా మారనుంది. ఇప్పటివరకు రంజీ ట్రోఫీ ప్లేట్ లీగ్లో మూడు ఎడిషన్లలో 12 ఇన్నింగ్స్లు ఆడిన అతడు 17.25 సగటు మాత్రమే నమోదు చేశాడు. దీంతో దులీప్ ట్రోఫీలో తన వైట్ బాల్ ఫామ్ను రెడ్ బాల్ క్రికెట్లోనూ కొనసాగించగలడా అన్నది ఆసక్తికరంగా మారింది. జింబాబ్వేతో జరిగిన టీ20 సిరీస్లో వైభవ్ మూడు ఇన్నింగ్స్ల్లో రెండు అర్ధ సెంచరీలు సాధించి ప్లేయర్ ఆఫ్ ద సిరీస్గా నిలిచాడు. అనంతరం తలేగావ్లోని రాజస్థాన్ రాయల్స్ హై-పెర్ఫార్మెన్స్ సెంటర్లో రెండు వారాల పాటు రెడ్ బాల్ బూట్క్యాంప్లో శిక్షణ పొందాడు. భారత మాజీ బ్యాటింగ్ కోచ్ విక్రమ్ రాథోర్ పర్యవేక్షణలో అతని శిక్షణ కొనసాగింది. మాజీ కోచ్ మనీష్ ఓఝా కూడా సన్నాహాల్లో సహకరించారు. స్పిన్ను ఎదుర్కోవడం, టర్నింగ్ పిచ్లపై బ్యాక్ఫుట్ ఆటను మెరుగుపరచడంపై ప్రత్యేకంగా శిక్షణ ఇచ్చారు.
జమ్మూ కాశ్మీర్ ఆటగాళ్లకు ప్రత్యేక గుర్తింపు
ఈసారి నార్త్ జోన్ జట్టులో జమ్మూ కాశ్మీర్ ఆటగాళ్ల ప్రాతినిధ్యం ప్రత్యేకంగా కనిపించనుంది. గతంలో ఢిల్లీ, పంజాబ్, హర్యానా ఆటగాళ్ల ఆధిపత్యం ఉండగా.. జమ్మూ కాశ్మీర్ తొలిసారి రంజీ ట్రోఫీ గెలవడంతో పరిస్థితి మారింది. జట్టు కెప్టెన్ కన్హయ్య వధావన్తో పాటు మొత్తం ఆరుగురు జమ్మూ కాశ్మీర్ ఆటగాళ్లు నార్త్ జోన్లో చోటు దక్కించుకున్నారు. ఓపెనర్ కమ్రాన్ ఇక్బాల్ కథ కూడా ఆసక్తికరమే. రంజీ ట్రోఫీ ఫైనల్ ఉదయం వరకు జమ్మూ కాశ్మీర్ జట్టులో లేని అతడికి శుభమ్ ఖజూరియా గాయపడటంతో చివరి నిమిషంలో అవకాశం లభించింది. కర్ణాటకతో జరిగిన ఫైనల్లో రెండో ఇన్నింగ్స్లో అజేయంగా 160 పరుగులు చేసి జమ్మూ కాశ్మీర్ విజయాన్ని ఖాయం చేయడంలో కీలక పాత్ర పోషించాడు. ఇప్పుడు నార్త్ జోన్ తరఫున సనత్ సంగ్వాన్తో కలిసి ఓపెనింగ్ చేసే అవకాశం ఉంది.
నార్త్ జోన్ ఫాస్ట్ బౌలింగ్ విభాగంలోనూ జమ్మూ కాశ్మీర్ ప్రభావం కనిపిస్తోంది. సునీల్ కుమార్, యుధ్వీర్ సింగ్ జట్టులో ఉన్నారు. గత రంజీ సీజన్లో సునీల్ తొమ్మిది మ్యాచ్ల్లో 31 వికెట్లు పడగొట్టి సత్తా చాటాడు. ఆకిబ్ నబీ కూడా కీలక ఆటగాడే. గత రెండు రంజీ సీజన్లలో 104 వికెట్లు తీసిన నబీ అందుబాటుపై భారత్–శ్రీలంక టెస్టు సిరీస్ ముగిసిన తర్వాత నిర్ణయం తీసుకునే అవకాశం ఉంది.
షమీకి మరోసారి టీమిండియా తలుపు తట్టే ఛాన్స్
35 ఏళ్ల మహమ్మద్ షమీకి ఈ దులీప్ ట్రోఫీ అత్యంత కీలకంగా మారనుంది. 2023 తర్వాత భారత తరఫున టెస్టు మ్యాచ్ ఆడని షమీ.. ఇటీవల గాయాలతో ఇబ్బంది పడ్డాడు. అయితే 2025-26 రంజీ ట్రోఫీలో ఏడు మ్యాచ్ల్లో 37 వికెట్లు తీసి తనలో ఇంకా టెస్టు క్రికెట్కు అవసరమైన సామర్థ్యం ఉందని నిరూపించాడు. భారత ఫాస్ట్ బౌలింగ్ విభాగంలో పలువురు ఆటగాళ్లు గాయాలతో అందుబాటులో లేని సమయంలో దులీప్ ట్రోఫీలో షమీ మంచి ప్రదర్శన చేస్తే మరోసారి సెలెక్టర్ల దృష్టిలో పడే అవకాశం ఉంది. టీమిండియాలోకి పునరాగమనం చేయాలనే అతడి ఆశలకు ఈ టోర్నమెంట్ కీలక మలుపుగా మారవచ్చు.
అర్ష్దీప్, ఆకిబ్ నబీలకు కూడా కీలక వేదిక
అర్ష్దీప్ సింగ్కు కూడా రెడ్ బాల్ క్రికెట్లో తన స్థానాన్ని బలోపేతం చేసుకునేందుకు దులీప్ ట్రోఫీ మంచి అవకాశం. స్వింగ్, సీమ్ మూవ్మెంట్ను సద్వినియోగం చేసుకునే సామర్థ్యం ఉన్న అర్ష్దీప్.. టెస్టు క్రికెట్లోనూ ఉపయోగకరమైన బౌలర్గా మారే అవకాశం ఉంది. అక్టోబర్–నవంబర్లో భారత్ న్యూజిలాండ్లో పర్యటించనున్న నేపథ్యంలో దులీప్ ట్రోఫీలో అతడి ప్రదర్శనపై సెలెక్టర్ల దృష్టి ఉండనుంది. ఆకిబ్ నబీ కూడా తన అవకాశాన్ని ఉపయోగించుకోవాలని చూస్తున్నాడు. గత రెండు రంజీ సీజన్లలో 104 వికెట్లు తీసిన అతడు జాతీయ జట్టు ఎంపికకు తన వాదనను మరింత బలంగా వినిపించేందుకు దులీప్ ట్రోఫీని వేదికగా చేసుకోనున్నాడు.
భారత భవిష్యత్ బ్యాటింగ్ లైనప్కు ఇక్కడే పునాది?
దులీప్ ట్రోఫీ కేవలం బౌలర్లకే కాదు.. భారత భవిష్యత్ బ్యాటింగ్ లైనప్ను గుర్తించేందుకు కూడా సెలెక్టర్లకు కీలక వేదిక. కర్ణాటకకు చెందిన ఆర్. స్మృతి 2025-26 రంజీ ట్రోఫీలో 950 పరుగులు చేసి అత్యధిక పరుగులు చేసిన ఆటగాడిగా నిలిచాడు. 23 ఏళ్ల ఈ బ్యాటర్ ఇప్పటికే ఇండియా ‘ఎ’ జట్టులో చోటు దక్కించుకున్నాడు. దులీప్ ట్రోఫీలో అతడి ప్రదర్శన భవిష్యత్ ఎంపికలకు కీలకం కానుంది.
పృథ్వీ షాకు పునరాగమన అవకాశం
టీమిండియాకు చాలా కాలంగా దూరంగా ఉన్న పృథ్వీ షాకు కూడా దులీప్ ట్రోఫీ మరో మంచి అవకాశం. 2020-21 ఆస్ట్రేలియా పర్యటన తర్వాత భారత్ తరఫున టెస్టు క్రికెట్ ఆడని షా.. ఫిట్నెస్, క్రమశిక్షణకు సంబంధించిన సమస్యల కారణంగా కెరీర్లో వెనుకబడ్డాడు. అయితే గత రంజీ సీజన్లో పునరాగమన సంకేతాలు ఇచ్చాడు. చండీగఢ్తో జరిగిన మ్యాచ్లో కేవలం 156 బంతుల్లో 222 పరుగుల విధ్వంసకర ఇన్నింగ్స్ ఆడాడు. దులీప్ ట్రోఫీలోనూ అదే దూకుడును కొనసాగించి సెలెక్టర్లకు తనను మరోసారి గుర్తు చేయాలని షా భావిస్తున్నాడు.
సర్ఫరాజ్ ఖాన్కు రెగ్యులర్ టెస్ట్ స్థానం కోసం పోరాటం
సర్ఫరాజ్ ఖాన్ కూడా ఈ టోర్నమెంట్లో ప్రత్యేకంగా నిలవనున్నాడు. రెండేళ్ల తర్వాత భారత టెస్టు జట్టులోకి తిరిగి వచ్చిన సర్ఫరాజ్.. వెస్ట్ జోన్ తరఫున దులీప్ ట్రోఫీ సెమీఫైనల్ దశలో బరిలోకి దిగనున్నాడు. టీమిండియా టెస్టు బ్యాటింగ్ లైనప్లో రెగ్యులర్ స్థానాన్ని సంపాదించుకోవడానికి ఈ టోర్నమెంట్ అతడికి మరో కీలక అవకాశం. వచ్చే ఏడాది ఆరంభంలో భారత్, ఆస్ట్రేలియాతో ఐదు టెస్టుల సిరీస్ ఆడనుంది. దీంతో సర్ఫరాజ్ ప్రదర్శనపై సెలెక్టర్ల దృష్టి ఉండనుంది. ముఖ్యంగా స్పిన్ను సమర్థంగా ఎదుర్కొనే అతడి సామర్థ్యం ఇప్పటికే బలంగా పరిగణించబడుతోంది.
మొత్తంగా.. బెంగళూరులో ప్రారంభమయ్యే 2026-27 దులీప్ ట్రోఫీ కేవలం దేశవాళీ సీజన్కు ఆరంభం మాత్రమే కాదు. వైభవ్ సూర్యవంశీకి రెడ్ బాల్ క్రికెట్లో తన సత్తా నిరూపించుకునే అవకాశం కాగా, షమీ, పృథ్వీ షా, సర్ఫరాజ్, అర్ష్దీప్, ఆకిబ్ నబీ వంటి ఆటగాళ్లకు టీమిండియాలో చోటు కోసం తమ వాదనను బలపరిచే వేదిక. వీరి ప్రదర్శనలు రాబోయే నెలల్లో భారత టెస్టు జట్టు రూపురేఖలను ప్రభావితం చేసే అవకాశముంది.
దులీప్ ట్రోఫీ 2026 షెడ్యూల్
క్వార్టర్ ఫైనల్: ఈస్ట్ జోన్ vs నార్త్ ఈస్ట్ జోన్ — ఆగస్టు 23 నుంచి, బెంగళూరు
క్వార్టర్ ఫైనల్: నార్త్ జోన్ vs వెస్ట్ జోన్ — ఆగస్టు 23 నుంచి, బెంగళూరు
మొదటి సెమీఫైనల్: సెంట్రల్ జోన్ vs TBA — ఆగస్టు 30 నుంచి, బెంగళూరు
రెండో సెమీఫైనల్: సౌత్ జోన్ vs TBA — ఆగస్టు 30 నుంచి, బెంగళూరు
ఫైనల్: సెప్టెంబర్ 6 నుంచి, చెన్నై