SRH vs CSK: నేడు ఉప్పల్ మైదానంలో ఆసక్తికర పోరు.. ధోనీ దిగుతాడా?, మ్యాచ్ సజావుగా సాగేనా?

Will MS Dhoni Return IPL 2026 with SRH vs CSK: ఐపీఎల్‌ 2026లో నేడు ఆసక్తికర పోరుకు రంగం సిద్ధమైంది. ఉప్పల్ మైదానంలో సన్‌రైజర్స్‌ హైదరాబాద్‌ (ఎస్‌ఆర్‌హెచ్), చెన్నై సూపర్‌ కింగ్స్‌ (సీఎస్‌కే) అమీతుమీ తేల్చుకోనున్నాయి. మిడ్‌ టేబుల్‌లో ఉన్న ఈ రెండు జట్లు తమ తమ స్థానాలను మెరుగుపరుచుకోవడానికి ఈ మ్యాచ్‌లో విజయంను అత్యంత కీలకంగా భావిస్తున్నాయి. ఎస్‌ఆర్‌హెచ్ ఇప్పటివరకు ఆడిన 5 మ్యాచ్‌లలో రెండు గెలవగా.. సీఎస్‌కే కూడా రెండు విజయాలు అందుకుంది. అయితే ఎస్‌ఆర్‌హెచ్, సీఎస్‌కే మ్యాచ్ నేపథ్యంలో అభిమానుల దృష్టి మాజీ కెప్టెన్ ఎంఎస్ ధోనీ ఉప్పల్ స్టేడియంలో దిగుతాడా?, వాతావరణ పరిస్థితుల కారణంగా మ్యాచ్ సజావుగా సాగేనా? అనే వాటిపై ఉన్నాయి.

గాయం కారణంగా ఐపీఎల్ 2026లో ఎంఎస్ ధోనీ ఇప్పటివరకు ఆడలేదు. సీఎస్‌కే తొలి 5 మ్యాచ్‌ల్లో ఆడని మహీ.. ఈ మ్యాచ్‌లో అయినా ఆడతాడా లేదా అన్నది ఆసక్తిగా ఉంది. రెండు రోజుల క్రితమే హైదరాబాద్‌కు చేరుకున్న ధోనీ.. ఉప్పల్ మైదానంలో ప్రాక్టీస్ కూడా చేశాడు. మహీ రాకతో మ్యాచ్‌ టిక్కెట్లు హాట్‌ కేకుల్లా అమ్ముడయ్యాయి. ధోనీ ప్రాక్టీస్ చూస్తే మాత్రం ఈరోజు ఆడే అవకాశాలు ఎక్కువుగా ఉన్నాయి. ఎస్‌ఆర్‌హెచ్ మ్యాచ్ ధోనీ ఆడేది లేనిది మరికొద్ది గంటల్లో తేలిపోనుంది. రెండు వరుస విజయాలతో ఫామ్‌లోకి వచ్చిన చెన్నై.. సన్‌రైజర్స్‌ను ఓడించి హ్యాట్రిక్ కొట్టాలని చూస్తోంది.

హైదరాబాద్ వాతావరణ శాఖ అంచనాల ప్రకారం.. మ్యాచ్‌కు వర్షం అంతరాయం కలిగించే అవకాశాలు చాలా తక్కువ. కొన్ని ప్రాంతాల్లో మేఘావృతం ఉన్నప్పటికీ.. మ్యాచ్ జరుగుతున్న సమయంలో ఆకాశం నిర్మలంగా ఉండే అవకాశం ఉంది. ఏప్రిల్‌లో అప్పుడప్పుడు వచ్చే సమ్మర్ షవర్స్ ఈ మ్యాచ్‌ను ప్రభావితం చేసే అవకాశాలు లేవు. మ్యాచ్ సమయంలో తేమ సుమారు 45 శాతం వరకు ఉండే అవకాశం ఉంది. దీనివల్ల రెండో ఇన్నింగ్స్‌లో డ్యూ ప్రభావం ఉంటుంది. ఈ పరిస్థితుల్లో బౌలర్లకు, ముఖ్యంగా స్పిన్నర్లకు బంతిని పట్టుకోవడం కష్టమవుతుంది. అందుకే టాస్ గెలిచిన జట్టు ముందుగా బౌలింగ్ ఎంచుకోనుంది.

Also Read: Shubman Gill: గ్రీన్‌ బ్యాటింగ్‌తో కంగారు పడ్డా.. ఆ ఇద్దరినీ అడిగి మరీ బంతినిచ్చా!

మధ్యాహ్నం సమయంలో హైదరాబాద్‌లో తీవ్ర ఉష్ణోగ్రతలు నమోదవుతున్నాయి. గరిష్టంగా 40 డిగ్రీల సెల్సియస్ వరకు ఉష్ణోగ్రతలు చేరుతుండగా.. మ్యాచ్ ప్రారంభానికి సమయానికి 27 డిగ్రీలకు తగ్గే అవకాశం ఉంది. అయినప్పటికీ పగటి వేడి ప్రభావం ఆటగాళ్ల శారీరక సామర్థ్యాన్ని పరీక్షించనుంది. ఉప్పల్ పిచ్ సాధారణంగా బ్యాట్స్‌మెన్‌కు అనుకూలంగా ఉంటుంది. ప్రస్తుతం ఉన్న ఎండల కారణంగా పిచ్ వేగంగా, బౌన్స్ ఎక్కువగా ఉండే అవకాశం ఉంది. దీంతో హై స్కోరింగ్ మ్యాచ్ కావచ్చని అంచనా వేస్తున్నారు.