Liam Livingstone: ఎస్‌ఆర్‌హెచ్‌ తుది జట్టు ఎంపికలో యజమానుల జోక్యం.. ఆ ప్లేయర్ కోసం నన్ను తొక్కేశారు!

Liam Livingstone Alleges SRH Owners Over Playing 11: ‘ఐపీఎల్‌లో జట్టు యజమానులు ఆటగాళ్ల ఎంపికలో జోక్యం చేసుకుంటారా?’.. అనే ప్రశ్నకు సంవత్సరాలుగా స్పష్టమైన సమాధానం దొరకలేదు. అయితే తాజాగా సన్‌రైజర్స్ హైదరాబాద్ (ఎస్‌ఆర్‌హెచ్‌) మాజీ ఆటగాడు లియామ్ లివింగ్‌స్టోన్‌ చేసిన వ్యాఖ్యలు ఈ చర్చకు మరింత ఊతమిచ్చాయి. ఐపీఎల్ 2026 సీజన్‌లో తనకు ఎదురైన అనుభవాన్ని వెల్లడిస్తూ.. జట్టు యజమానుల అభిప్రాయం కూడా తుది జట్టు ఎంపికపై ప్రభావం చూపుతుందని పేర్కొన్నాడు. ఇంగ్లండ్‌కు చెందిన స్టార్ ఆల్‌రౌండర్ లివింగ్‌స్టోన్‌ ఐపీఎల్ 2026లో ఎస్‌ఆర్‌హెచ్‌ తరఫున కేవలం రెండు మ్యాచ్‌లు మాత్రమే ఆడాడు. ఆ రెండు మ్యాచ్‌ల్లో 1, 14 పరుగులు చేశాడు.

తాజాగా ఒక క్రికెట్ పోడ్‌కాస్ట్‌లో మాట్లాడిన లియామ్ లివింగ్‌స్టోన్‌.. తాను సన్‌రైజర్స్ హైదరాబాద్ జట్టులో స్థానం కోల్పోవడానికి ప్రధాన కారణం యజమానులకు ఇష్టమైన ఓ ఆటగాడే అని చెప్పాడు. ‘వేలంలో ముంబై ఇండియన్స్ ఎంతో ఆసక్తిగా కోరుకున్న సలీల్ అరోరాను మేము ఎక్కువ డబ్బు పెట్టి కొనుగోలు చేశాం. యజమానులకు అతను చాలా నచ్చాడు. అందుకే అతనికి జట్టులో స్థానం దాదాపు ఖాయమైంది. పాట్ కమిన్స్ అందుబాటులో లేని సమయంలో కూడా మేము కేవలం ముగ్గురు విదేశీ ఆటగాళ్లతోనే ఆడుతున్నాం. అప్పుడు నేను కోచ్ డేనియల్ వెటోరిని అడిగాను. నాలుగో విదేశీ ఆటగాడిగా నన్నెందుకు ఆడించడం లేదని’ అని లివింగ్‌స్టోన్‌ వివరించాడు.

తన ప్రశ్నకు కోచ్ డేనియల్ వెటోరి ఇచ్చిన సమాధానం అక్కడి పరిస్థితిని స్పష్టంగా అర్థమయ్యేలా చేసిందని లియామ్ లివింగ్‌స్టోన్‌ తెలిపాడు. ‘యజమానులకు ఆ ఆటగాడు (సలీల్ అరోరా) చాలా ఇష్టం. కెప్టెన్ ప్యాట్ కమిన్స్ తిరిగి వచ్చినా కూడా మా ప్రణాళికలో మార్పు ఉండదు’ అని వెటోరి చెప్పాడని లివింగ్‌స్టోన్‌ వెల్లడించాడు. దీంతో తనకు అవకాశం రావాలంటే ఎవరైనా గాయపడాల్సిందేనని అర్థమైందని, ఆ తర్వాత తన మానసిక పరిస్థితి పూర్తిగా మారిపోయిందని చెప్పాడు. ఈ సందర్భంగా ప్రముఖ క్రికెట్ విశ్లేషకుడు డేవిడ్ లాయిడ్ ‘ఈ యజమానులకు జట్టు ఎంపిక గురించి ఎంత అవగాహన ఉంటుంది?’ అని ప్రశ్నించగా.. మాజీ ఇంగ్లండ్ కెప్టెన్ అలిస్టర్ కుక్ ‘వారి దగ్గర చాలా డబ్బు ఉంటుంది’ అని సరదాగా సమాధానం ఇచ్చాడు. దీనికి స్పందించిన లివింగ్‌స్టోన్‌ .. ‘యజమానులు పూర్తిగా నిర్ణయాలు తీసుకుంటారో లేదో తెలియదు. కానీ వారికి తప్పకుండా ఓ మాట ఉంటుంది. అయితే వెటోరి పరిస్థితిని నాతో నిజాయితీగా చెప్పడం నాకు నచ్చింది’ అని అన్నాడు.

కావ్య మారన్ సహ యజమానిగా ఉన్న సన్‌రైజర్స్ హైదరాబాద్ జట్టు ఐపీఎల్ 2026లో ప్లేఆఫ్స్‌కు చేరుకుంది. అయితే ఎలిమినేటర్ మ్యాచ్‌లో రాజస్థాన్ రాయల్స్ చేతిలో ఓడి.. టోర్నీ నుంచి నిష్క్రమించింది. సలీల్ అరోరా 2026 ఐపీఎల్ సీజన్‌లో సన్‌రైజర్స్ హైదరాబాద్ తరఫున 14 మ్యాచ్‌లలో 156 పరుగులు చేశాడు. లియామ్ లివింగ్‌స్టోన్‌ వ్యాఖ్యలు ఇప్పుడు ఐపీఎల్ వర్గాల్లో చర్చనీయాంశంగా మారాయి. జట్టు ఎంపికలో యజమానుల పాత్ర ఎంత వరకు ఉండాలి? అనే అంశంపై మళ్లీ చర్చ మొదలైంది.