RCB: ప్లేఆఫ్స్ ముందు ఆర్సీబీకి బిగ్ షాక్.. స్టార్ బ్యాటర్ సీజన్‌ మొత్తానికి దూరం

RCB: ఐపీఎల్ 2026 ప్లేఆఫ్స్ ముందు రాయల్ ఛాలెంజర్స్ బెంగళూరు (RCB) జట్టుకు ఊహించని షాక్ తగిలింది. ఆ జట్టు స్టార్ బ్యాటర్ జాకబ్ బెథెల్ గాయం కారణంగా ఈ సీజన్‌లోని మిగిలిన మ్యాచ్‌లన్నింటికీ దూరమయ్యాడు. శుక్రవారం సన్‌రైజర్స్ హైదరాబాద్‌తో జరిగిన ఆఖరి లీగ్ మ్యాచ్‌కు సైతం దూరమైన బెథెల్, త్వరలోనే ఇంగ్లాండ్‌కు తిరిగి వెళ్లనున్నాడు. అక్కడ తన జాతీయ జట్టు సిరీస్‌ల కంటే ముందు కోలుకునేందుకు వీలుగా ఈ నిర్ణయం తీసుకున్నాడు. ప్లేఆఫ్స్‌లో గుజరాత్ టైటాన్స్‌తో అత్యంత కీలకమైన ‘క్వాలిఫైయర్ 1’ మ్యాచ్ ఆడటానికి ఆర్‌సీబీ సిద్ధమవుతున్న తరుణంలో ఈ వార్త రావడం ఆ జట్టుకు పెద్ద ఎదురుదెబ్బే. రజత్ పాటిదార్ కెప్టెన్సీలోని బెంగళూరు జట్టు… తమ ఆఖరి లీగ్ మ్యాచ్‌లో హైదరాబాద్ చేతిలో ఘోర పరాజయాన్ని చవిచూసినప్పటికీ, పాయింట్ల పట్టికలో అగ్రస్థానంలో నిలిచి ప్లేఆఫ్స్ చేరింది.

అసలు జాకబ్ బెథెల్‌కు ఏం జరిగిందంటే..?
పంజాబ్ కింగ్స్‌తో జరిగిన మ్యాచ్‌లో ఫీల్డింగ్ చేస్తూ, ఒక క్యాచ్ అందుకోవడానికి డైవ్ చేసిన సమయంలో అతని ఎడమచేతి ఉంగరపు వేలికి బలమైన గాయమైంది. వైద్య పరీక్షల అనంతరం, ఇంగ్లాండ్‌తో జరగబోయే టెస్ట్ సిరీస్ దృష్ట్యా తదుపరి చికిత్స కోసం అతను స్వదేశానికి తిరిగి వెళ్తున్నట్లు శనివారం (మే 23న) ఆర్‌సీబీ యాజమాన్యం అధికారికంగా ప్రకటించింది. ఇటు ఇంగ్లాండ్ అండ్ వేల్స్ క్రికెట్ బోర్డు (ECB) సైతం ఈ విషయాన్ని ధృవీకరించింది. బెథెల్‌ను విడుదల చేసేందుకు ఆర్‌సీబీతో ఒప్పందం కుదిరిందని, జూన్ 4 నుంచి లార్డ్స్ మైదానంలో న్యూజిలాండ్‌తో ప్రారంభం కానున్న మొదటి టెస్ట్ మ్యాచ్‌కు అతను అందుబాటులో ఉంటాడా లేదా అనేది వైద్య బృందం పరిశీలన తర్వాత తెలుస్తుందని ఈసీబీ పేర్కొంది.

బెథెల్ దూరం కావడం మైనస్ అయినప్పటికీ, ఆర్‌సీబీ జట్టుకు ఒక భారీ ఊరట లభించింది. గుజరాత్ టైటాన్స్‌తో జరిగే మొదటి ప్లేఆఫ్ మ్యాచ్ సమయానికి స్టార్ ఓపెనర్ ఫిల్ సాల్ట్ తిరిగి జట్టులోకి రానున్నాడు. దాంతో అతను నేరుగా తుది జట్టులో స్థానం సంపాదించే అవకాశం ఉంది. సన్‌రైజర్స్‌తో జరిగిన గత మ్యాచ్‌లో సాల్ట్ అందుబాటులో లేకపోవడంతో, ఆల్‌రౌండర్ వెంకటేష్ అయ్యర్ ఓపెనర్‌గా బరిలోకి దిగి కేవలం 19 బంతుల్లోనే 44 పరుగులతో మెరుపు ఇన్నింగ్స్ ఆడాడు. అయితే, ఇప్పుడు ఫిల్ సాల్ట్ ఫిట్‌నెస్ సాధించి జట్టులోకి వస్తుండటంతో, వచ్చే మ్యాచ్‌లో వెంకటేష్ అయ్యర్‌ను మిడిల్ ఆర్డర్‌లో పంపి, సాల్ట్‌తో ఇన్నింగ్స్ ప్రారంభించేలా ఆర్‌సీబీ వ్యూహాలు రచిస్తోంది.