Axar Patel: కెప్టెన్ అక్షర్ పటెల్ బిగ్ మిస్టెక్స్.. ఏకంగా 2 పాయింట్స్ కోల్పోయిన ఢిల్లీ!

Axar Patel: ఐపీఎల్ 2026 సీజన్‌లో ఢిల్లీ క్యాపిటల్స్ (DC) పరిస్థితి దారుణంగా తయారైంది. ఏప్రిల్ 5న అరుణ్ జైట్లీ స్టేడియంలో చెన్నై సూపర్ కింగ్స్ (CSK)తో జరిగిన మ్యాచ్‌లో అక్షర్ పటేల్ తీసుకున్న తప్పుడు నిర్ణయాలు జట్టుకు భారీ మూల్యాన్ని మిగిల్చాయి. ఎనిమిది వికెట్ల తేడాతో ఓటమి పాలైన ఢిల్లీ, అక్షర్ ‘కెప్టెన్సీ డిజాస్టర్’ కారణంగా రెండు విలువైన పాయింట్లను చేజార్చుకుంది. ఈ మ్యాచ్‌లో అక్షర్ తీసుకున్న తొలి తప్పుడు నిర్ణయం టాస్ గెలిచినప్పుడు మొదలైంది. పిచ్ నెమ్మదిస్తుందని అంచనా వేసి బ్యాటింగ్ ఎంచుకున్నాడు. కానీ కేవలం 156 పరుగులకే ఢిల్లీ పరిమితమైంది. ఆ పిచ్‌పై కనీసం 175-180 పరుగులు ఉంటేనే ప్రత్యర్థిని ఒత్తిడిలోకి నెట్టడం సాధ్యమని కోచ్ హేమంగ్ బదానీ స్వయంగా ఒప్పుకున్నారు. తాము 15 పరుగులు తక్కువ చేశామని అక్షర్ సైతం మ్యాచ్ తర్వాత అంగీకరించాడు. అంతేకాదు.. బ్యాటింగ్ ఆర్డర్ విషయంలో ఢిల్లీ గందరగోళం ఈ మ్యాచ్‌లోనూ స్పష్టంగా కనిపించింది. గత మ్యాచ్‌లో పోరాడిన అభిషేక్ పోరెల్‌ను పక్కన పెట్టి, ఫామ్‌లో లేని కరుణ్ నాయర్‌ను మూడో స్థానంలో పంపడం అందరినీ ఆశ్చర్యపరిచింది. నాయర్ స్ట్రైక్ రొటేట్ చేయడంలో ఇబ్బంది పడటంతో ఇన్నింగ్స్ నెమ్మదించింది. మరోవైపు స్పిన్‌ను సమర్థవంతంగా ఎదుర్కోగల యువ ఆటగాడు సమీర్ రిజ్వీని ఇంపాక్ట్ ప్లేయర్‌గా చాలా ఆలస్యంగా మైదానంలోకి పంపారు. రిజ్వీ 24 బంతుల్లో 40 పరుగులు చేసి స్కోరును 150 దాటించినప్పటికీ, అతడిని ముందే పంపి ఉంటే ఫలితం మరోలా ఉండేదని విశ్లేషకులు భావిస్తున్నారు.

ఇక ఈ పరిణామాల నేపథ్యంలో అక్షర్ పటేల్ కెప్టెన్సీ భారం మోయలేకపోతున్నాడా? అనే సందేహాలు వస్తున్నాయి. టీ20 ప్రపంచకప్ గెలిచిన జట్టులో సభ్యుడిగా ఉన్న అక్షర్ నుంచి మెరుగైన వ్యూహాలు ఆశించిన అభిమానులకు నిరాశే ఎదురవుతోంది. బౌలింగ్ మార్పులు, ఫీల్డ్ ప్లేస్‌మెంట్స్ విషయంలో అక్షర్ చాలా తడబడుతున్నాడు. సీజన్ ఆరంభంలో వరుస విజయాలు సాధించిన ఢిల్లీ, ఇప్పుడు వరుస ఓటములతో లయ తప్పింది. ఢిల్లీ క్యాపిటల్స్ ఇంకా ప్లే ఆఫ్ రేసులో ఉన్నప్పటికీ, పొరపాట్లను సరిదిద్దుకోవడానికి సమయం తక్కువగా ఉంది. ఆటగాళ్ల ఫామ్‌ను బట్టి నిర్ణయాలు తీసుకోవడంలో ఒత్తిడిలో సరైన వ్యూహాలు రచించడంలో అక్షర్ విఫలమైతే.. ఈ సీజన్ ఢిల్లీకి చేజారిపోయే ప్రమాదం ఉంది. తదుపరి మ్యాచ్‌లలోనైనా ఈ గందరగోళానికి తెరదించి, స్పష్టమైన ప్రణాళికతో బరిలోకి దిగితేనే ఢిల్లీకి మనుగడ ఉంటుంది.