SRH Vs KKR: ఆరో విజయానికి కళ్లెం వేసిన కేకేఆర్.. ఓటమిలోనూ అభిషేక్ శర్మ రికార్డు..

ఐపీఎల్ 2026 సీజన్ అత్యంత ఉత్సాహభరితంగా సాగుతోంది. ముఖ్యంగా సన్‌రైజర్స్ హైదరాబాద్ (SRH) యువ బ్యాటర్ అభిషేక్ శర్మ తన అద్భుతమైన ఫామ్‌తో అందరి దృష్టిని ఆకర్షిస్తున్నాడు. కోల్‌కతా నైట్ రైడర్స్ (KKR) తో జరిగిన 45వ మ్యాచ్‌లో సన్‌రైజర్స్ హైదరాబాద్ ఓటమి పాలైనప్పటికీ, వ్యక్తిగత ప్రదర్శనలో అభిషేక్ శర్మ తన ముద్రను వేయగలిగాడు. తన దూకుడుతో కూడిన బ్యాటింగ్ శైలి ద్వారా అత్యధిక పరుగులు సాధించిన ఆటగాళ్ల జాబితాలో మొదటి స్థానానికి చేరుకుని, ప్రతిష్టాత్మకమైన ‘ఆరెంజ్ క్యాప్’ ను దక్కించుకున్నాడు. అంతక ముందు ఇది కేఎల్ రాహుల్ దగ్గర ఉండగా.. నేడు 15 పరుగులు చేసిన అభిషేక్ శర్మకు ఈ క్యాప్ మళ్లీ వచ్చింది. జట్టు విజయానికి దూరమైనా, అతని వ్యక్తిగత ప్రతిభ మాత్రం ఈ సీజన్‌లో హాట్ టాపిక్ గా మారింది.

ప్రస్తుత ఐపీఎల్ 2026 సీజన్‌లో అభిషేక్ శర్మ ఒక పవర్‌హౌస్‌లా కనిపిస్తున్నాడు. అతని గణాంకాలు చూస్తే ఈ విషయం స్పష్టమవుతుంది. 10 మ్యాచ్‌లలో అభిషేక్ శర్మ మొత్తం 440 పరుగులు చేసి ఆరెంజ్ క్యాప్ రేసులో అగ్రస్థానంలో ఉన్నాడు. 48.89 సగటుతో పరుగులు సాధిస్తూ నిలకడను ప్రదర్శిస్తున్నాడు. టీ20 ఫార్మాట్‌కు తగ్గట్టుగా 206.57 అద్భుతమైన స్ట్రైక్ రేట్‌తో ప్రత్యర్థి బౌలర్లపై విరుచుకుపడుతున్నాడు. ఈ సీజన్‌లో అతని అత్యుత్తమ స్కోరు 135 నాటౌట్. ఇప్పటివరకు 1 సెంచరీ మరియు 3 హాఫ్ సెంచరీలు నమోదు చేశాడు. తన ఇన్నింగ్స్‌లలో మొత్తం 41 ఫోర్లు మరియు 32 సిక్సర్లు బాదాడు.

కేఎల్ రాహుల్ (433 పరుగులు), హెన్రిచ్ క్లాసెన్ (425 పరుగులు) వంటి దిగ్గజ ఆటగాళ్లను వెనక్కి నెట్టి అభిషేక్ నంబర్ 1 స్థానాన్ని కైవసం చేసుకున్నాడు. కేకేఆర్ జట్టు 7 వికెట్ల తేడాతో విజయం సాధించినప్పటికీ.. అభిషేక్ వ్యక్తిగత పోరాటం ఆరెంజ్ క్యాప్ రూపంలో ఫలించింది. సన్‌రైజర్స్ హైదరాబాద్ జట్టుకు అతడు ప్రధాన బలంగా మారాడు. అతని దూకుడు ఇలాగే కొనసాగితే ఈ సీజన్ ముగిసేసరికి మరిన్ని రికార్డులు సృష్టించే అవకాశం ఉంది.

ఇక మ్యాచ్ విషయానికి వస్తే.. వరుస విజయాలతో దూసుకుపోతూ, ఈ మ్యాచ్‌లో గెలిచి ఆరో విజయాన్ని తన ఖాతాలో వేసుకోవాలని భావించిన సన్‌రైజర్స్ హైదరాబాద్ (SRH) ఆశలపై కేకేఆర్ నీళ్లు చల్లింది. తొలుత బ్యాటింగ్ చేసిన సన్‌రైజర్స్‌ను తక్కువ స్కోరుకే పరిమితం చేసిన కోల్‌కతా, అనంతరం 18.2 ఓవర్లలోనే లక్ష్యాన్ని ఛేదించింది. అంగ్క్రిష్ రఘువంశీ (59) బాధ్యతాయుతమైన ఇన్నింగ్స్ ఆడగా, అజింక్య రహానే (43) అతనికి చక్కని సహకారం అందించారు. ఈ ఓటమితో సన్‌రైజర్స్ విజయ పరంపరకు బ్రేక్ పడటమే కాకుండా, పాయింట్ల పట్టికలో అగ్రస్థానానికి వెళ్లే అవకాశం చేజారింది. కేకేఆర్ బౌలర్లు, బ్యాటర్లు సమిష్టిగా రాణించి హైదరాబాద్ జట్టుకు చుక్కలు చూపారు.