ఐసీసీ తాజాగా టీ20 ర్యాంకులను ప్రకటించింది. టీమ్ ర్యాంకుల్లో ఇంగ్లండ్ అగ్రస్థానంలో కొనసాగుతోంది. ఇండియా, పాకిస్థాన్, న్యూజిలాండ్, దక్షిణాఫ్రికా, ఆస్ట్రేలియా, వెస్టిండీస్, ఆఫ్ఘనిస్తాన్, శ్రీలంక తదుపరి స్థానాల్లో ఉన్నాయి. అటు బౌలర్ల ర్యాంకుల్లో దక్షిణాఫ్రికా స్పిన్నర్ షాంసీ అగ్రస్థానంలో ఉండగా… ఆస్ట్రేలియా పేసర్ హేజిల్వుడ్ రెండో స్థానానికి దూసుకెళ్లాడు. శ్రీలంకతో టీ20 సిరీస్లో మెరుగ్గా రాణించడంతో అతడు నాలుగు స్థానాలు మెరుగుపర్చుకున్నాడు. టాప్-10 బౌలర్లలో టీమిండియా నుంచి ఒక్కరు కూడా లేరు.
ఇక బ్యాటింగ్ ర్యాంకుల్లో పాకిస్థాన్ క్రికెటర్లు బాబర్ ఆజమ్, రిజ్వాన్ తొలి రెండు స్థానాల్లో ఉన్నారు. టాప్-10లో భారత్ నుంచి కేఎల్ రాహుల్ నాలుగో స్థానంలో, విరాట్ కోహ్లీ పదో స్థానంలో కొనసాగుతున్నారు. ఆల్రౌండర్ల విషయానికి వస్తే.. అఫ్ఘనిస్తాన్ క్రికెటర్ మహ్మద్ నబీ అగ్రస్థానంలో ఉండగా.. షకీబ్, మొయిన్ అలీ, మ్యాక్స్వెల్, హసరంగ టాప్-5లో ఉన్నారు. టాప్-10 ఆల్రౌండర్లలోనూ టీమిండియాకు చెందిన క్రికెటర్లు లేకపోవడం గమనార్హం.
