ఆదాయం పై బీసీసీఐ ఫోకస్…

ఆదాయం పెంపొందించుకోవడంపై బీసీసీఐ ఫోకస్ పెట్టింది. ఐపీఎల్ 2022 ఎడిషన్‌లో కొత్తగా రెండు జట్లకు అనుమతి ఇవ్వడం ద్వారా.. ఏకంగా 5 వేల కోట్లు ఆర్జించనుంది. మరోవైపు.. ఫ్రాంచైజీల కొనుగోలుకు వ్యాపారదిగ్గజాలు పోటీ పడుతున్నట్లు సమాచారం.

వచ్చే ఏడాది ఐపీఎల్‌ నిర్వహణకు సంబంధించి బీసీసీఐ.. భారీ ప్రణాళికలు వేసింది. 2022 ఎడిషన్‌ ఐపీఎల్‌లో కొత్తగా రెండు జట్లకు అనుమతి ఇవ్వడం ద్వారా ఏకంగా 5 వేల కోట్లు ఆర్జించనుంది. ప్రస్తుతం ఐపీఎల్‌లో 8 జట్లు మాత్రమే ఉన్నాయి. 2022 ఎడిషన్‌లో వీటి సంఖ్య 10కి పెరగనుంది. ఇందుకు సంబంధించిన బిడ్డింగ్ విధివిధానాలు ఇప్పటికే ఖరారు కాగా, బీసీసీఐ …ఐపీఎల్ ఫ్రాంచైజీల కోసం టెండర్లు పిలిచింది. ఫ్రాంచైజీ కొనుగోలుకు అక్టోబరు 5 వరకు గడువు ఉంది.

10 లక్షల రూపాయలు చెల్లించి ఏ కంపెనీ అయిన బిడ్ డాక్యుమెంటును కొనుగోలు చేసుకోవచ్చు. రెండు కొత్త జట్లకు కనీస ధరను గతంలో 1700 కోట్లుగా నిర్ణయించిన బీసీసీఐ …తాజాగా, ఆ ధరను 2 వేల కోట్లకు పెంచింది. అంతా అనుకున్నట్టు జరిగితే రెండు జట్లకు అనుమతి ఇవ్వడం ద్వారా బీసీసీఐకి 5 వేల కోట్లు, అంతకుమించి వచ్చే అవకాశం ఉంది. ఐపీఎల్ వచ్చే సీజన్‌లో 74 గేమ్స్ ఉంటాయి. దీంతో బరిలో నిలవాలంటే ప్రతీ జట్టుకు విజయం తప్పనిసరి కానుంది.

వార్షిక టర్నోవరు 3 వేల కోట్ల రూపాయలు కలిగిన కంపెనీ మాత్రమే బిడ్‌లో పాల్గొనేందుకు అనుమతి ఉంటుందని బీసీసీఐ వర్గాలు తెలిపాయి. కొత్త జట్ల వేదికలలో అహ్మదాబాద్, లక్నో, పూణె ఉండే అవకాశం ఉంది. అదానీ గ్రూప్, ఆర్‌పీజీ సంజీవ్ గోయెంక గ్రూప్‌తోపాటు ఫార్మా కంపెనీ టోరెంట్.. కొత్త ఫ్రాంచైజీల కొనుగోలుకు ఆసక్తి చూపిస్తున్నట్టు సమాచారం.