కోలీవుడ్ లో కొంత కాలంగా దళితవాద చిత్రాల హవా సాగుతోంది. టాప్ డైరెక్టర్స్ మాత్రమే కాదు నవతరం దర్శకులు సైతం దళితవాదాన్ని తమ చిత్రాల ద్వారా గట్టిగా తెలియచెప్పే ప్రయత్నం చేస్తున్నారు. అయితే ప్రస్తుత ప్రభుత్వాలు అడ్డంకులు సృష్టించకుండా ఉండేందుకు మూడు నాలుగు దశాబ్దాల క్రితం జరిగిన సంఘటనలు ఇవంటూ పేర్కొంటున్నారు. ఆ కోవకు చెందిన సినిమానే ‘సాని కాయిదం’. శుక్రవారం నుండి ఈ మూవీ అమెజాన్ ప్రైమ్ లో స్ట్రీమింగ్ అవుతోంది. తెలుగులో దీన్ని ‘చిన్ని’ పేరుతో అనువదించారు.
చిన్ని (కీర్తి సురేశ్) ఓ కానిస్టేబుల్. ఆమె భర్త మారెప్ప రైస్ మిల్ లో పనిచేస్తుంటాడు. వారికో పాప. రాజకీయ నేపథ్యం ఉన్న రైస్ మిల్ ఓనర్ కారణంగా మారప్ప తరచూ అవమానాలకు, కుల వివక్షకు గురవుతుంటాడు. ఒకానొక సంఘటనతో ఉద్యోగం కూడా పోగొట్టుకుంటాడు. ప్రశాంతంగా చక్కటి కుటుంబ జీవితాన్ని గడపాలని భావించే చిన్ని ఆ విషయంలో భర్తనే తప్పు పడుతుంది. రైస్ మిల్ ఓనర్ ను క్షమాపణ కోరి, తిరిగి ఉద్యోగం పొందితే తప్పేమిటని అంటుంది. కానీ సమాజంలోని వ్యక్తులు, ఈ వ్యవస్థ ఆమె ఆలోచించే విధంగా లేదనే తత్త్వం ఆలస్యంగా బోధపడుతుంది. చిన్ని భర్త, బిడ్డ ఇద్దరూ కుల దురహంకారానికి, అధికార దాహానికి బలైపోతారు. ఆమె సైతం అత్యాచారానికి గురై జీవచ్చవంలా తయారవుతుంది. తమలాంటి బడుగు జీవులకు కోర్టులలోనూ న్యాయం దక్కదని తెలిసిన తర్వాత తన సోదర సమానుడైన రంగయ్య (సెల్వ రాఘవన్) సాయంతో చిన్ని ఎలా ప్రతీకారం తీర్చుకుందన్నదే మిగతా కథ.
దర్శకుడు అరుణ్ మాథేశ్వరన్ గతంలో ‘రాకీ’ అనే రివేంజ్ డ్రామాను తెరకెక్కించాడు. ఈ కథను ఎంచుకున్న తీరు, దాన్ని నడిపిన విధానం చూస్తే ‘రాకీ’ సీరిస్ లో ఇది రెండో సినిమా అనిపించక మానదు. ఎటువంటి ట్విస్టుల జోలికీ పోకుండా చిన్ని అనే ఓ అట్టడుగు వర్గానికి చెందిన మహిళకు జరిగిన అన్యాయం, దానికి ఆమె పగ తీర్చుకోవడం ఇందులో చూపించారు. అయితే ఆమెకు జరిగిన అన్యాయానికి కారణం కులోన్మాదం కావడంతో దాన్ని దర్శకుడు అడ్వాంటేజ్ గా తీసుకుని, దళిత వాదాన్ని బలంగా తెరపై చూపించాడు. ఆడది అబల ఎంత మాత్రం కాదని, తన కలలను ఎవరైనా భగ్నం చేస్తే పర్యవసానం ఎవరూ ఊహించని విధంగా ఉంటుందని దర్శకుడు చెప్పాలనుకున్నాడు. దానిని చాలా గాఢంగా చెప్పాడు. ఈ సినిమా టీజర్, ట్రైలర్ ను చూసిన వారికి వయలెన్స్ ఏ స్థాయిలో ఉంటుందో అవగాహన కలిగి ఉంటుంది. అయితే అది కేవలం శాంపిల్ మాత్రమే. అంతకు మించిన వయలెన్స్ సినిమాలో ఉంది. ఓటీటీలో స్ట్రీమింగ్ అవుతోంది కదాని ఇంటిల్లిపాది కలిసి ఈ మూవీని చూద్దామనుకుంటే తట్టుకోవడం కష్టమే. బట్… చిన్ని ఆవేశంలోనూ, ఆక్రోశంలోనూ అర్థం ఉందనే విషయాన్ని దర్శకుడు విడమర్చి చూపడంతో ఆ వయెలెన్స్ ను ఆడియెన్స్ యాక్సెప్ట్ చేసే ఆస్కారం ఉంది.
నటీనటుల విషయానికి వస్తే… గత కొంత కాలంగా కీర్తి సురేశ్ కు ఏ మాత్రం కలిసి రావడం లేదు. ‘మహానటి’తో జాతీయ అవార్డును అందుకున్న తర్వాత ఆమె నటించిన ఏ సినిమా కూడా కమర్షియల్ సక్సెస్ కాలేదు. దానికి తోడు ఆమె నటించిన లేడీ ఓరియెంటెడ్ మూవీస్ సైతం బాక్సాఫీస్ దగ్గర బోల్తా కొట్టాయి. ఓటీటీలోనూ వాటికి సరైన ఆదరణ దక్కలేదు. ఈ నేపథ్యంలో దర్శకుడు అరుణ్ మాథేశ్వరన్ ఆమెతో ఈ సినిమా తీయడం గొప్ప విషయమే. అయితే అరుణ్ పెట్టుకున్న నమ్మకాన్ని కీర్తి సురేశ్ వమ్ము చేయలేదు. చిన్ని పాత్రకు సంపూర్ణ న్యాయం చేసింది. ఆమెపై ప్రేక్షకులకు ఉండే సాఫ్ట్ కార్నర్ ఇందులోని పాత్రకు బాగా ఉపయోగపడింది. దాంతో ఆమె రివేంజ్ లో భారీ వయొలెన్స్ చోటు చేసుకున్నా వారి నుండి వ్యతిరేకత కనిపించలేదు. ఈ సినిమాలో చెప్పుకోవాల్సిన మరో వ్యక్తి సెల్వ రాఘవన్. దర్శకుడిగా మంచి గుర్తింపు తెచ్చుకున్న సెల్వ రాఘవన్ ఇప్పుడిప్పుడే నటుడిగానూ తనదైన ముద్రను వేసే ప్రయత్నం చేస్తున్నాడు. ఆ మధ్య వచ్చిన విజయ్ ‘బీస్ట్’లోనూ మాజీ పోలీస్ అధికారి పాత్రను పోషించాడు. మిగిలిన నటీనటులు తెలుగు వారికి అంతగా చిరపరిచితులు కాదు. సామ్ సిఎస్ నేపథ్య సంగీతం, యామిని యజ్ఞమూర్తి సినిమాటోగ్రఫీ మూవీని మరో స్థాయికి తీసుకెళ్ళాయి. కీర్తి సురేశ్ అభిమానులకు, దళితవాదాన్ని గౌరవించేవారికి ‘చిన్న’ సినిమా నచ్చుతుంది. అయితే వయొలెన్స్ అధికంగా ఉన్న కారణంగా సాధారణ ప్రేక్షకులు పెదవి విరిచే ఆస్కారం లేకపోలేదు.
రేటింగ్: 2.5 / 5
ప్లస్ పాయింట్స్ :
కీర్తి సురేశ్, సెల్వ రాఘవన్ నటన
సామ్ సిఎస్ నేపథ్య సంగీతం
ఎంచుకున్న కథ
మెనెస్ పాయింట్:
పాత కలహాలను తిరిగి రేపడం
సుదీర్ఘమైన సన్నివేశాలు
ట్యాగ్ లైన్: వయొలెంట్ క్యాస్ట్ వార్!
