OTR: హుజూరాబాద్‌లో బైపోల్ వస్తుందా? కౌశిక్ రెడ్డి కేసులో తాజా పరిణామం

ఖైరతాబాద్‌తో పాటు తెలంగాణలోని మరో అసెంబ్లీ నియోజకవర్గానికి కూడా బైపోల్‌ జరిగే అవకాశం ఉందా? ఆ సెగ్మెంట్‌ కేంద్రంగా మారుతున్న పరిణామాలు ఇదే విషయం చెబుతున్నాయా? ఆ ఎమ్మెల్యే తీరుపై ఎథిక్స్‌ కమిటీ కూడా వీలైనంత త్వరగా నివేదిక ఇచ్చే పనిలో ఉందా? ఏదా నియోజకవర్గం? అక్కడి ఎమ్మెల్యే మీద వేటేయాలని డిమాండ్‌ చేసే దాకా ఎందుకు వెళ్ళింది వ్యవహారం?

తెలంగాణలో ఉప ఎన్నికల సబ్జెక్ట్‌ ఇప్పుడు హాట్‌ హాట్‌గా నడుస్తోంది. ఆ విషయమై డిఫరెంట్‌ యాంగిల్స్‌లో చర్చోప చర్చలు జరిగిపోతున్నాయి. ఖైరతాబాద్ ఎమ్మెల్యే దానం నాగేందర్‌పై హై కోర్ట్‌ అనర్హత వేటేయడంతో… ఆ నియోజకవర్గానికి ఉప ఎన్నిక జరగాల్సి ఉంది. అటు సుప్రీంకోర్టు కూడా… హైకోర్ట్‌ నిర్ణయాన్ని సమర్ధిస్తూ…. ఉప ఎన్నిక జరపండని ఆదేశించడంతో… ఇక అక్కడ బైపోల్‌ అనివార్యం. అయితే… ప్రస్తుతం రాష్ట్రంలో SIR ప్రక్రియ నడుస్తున్న క్రమంలో… ఉప ఎన్నికను ఏ ప్రాతిపదికన నిర్వహిస్తారన్నది చూడాలి. ఓటర్ల జాబితా ఫైనల్ అయ్యేవరకు వేచి చూస్తారా..? లేక పాత లిస్ట్‌తోనే ముందుకు వెళ్తారా అన్నది చూడాలి.

అదంతా ఒక ఎత్తయితే…. ఖైరతాబాద్ నియోజకవర్గంతో పాటు హుజూరాబాద్‌కు కూడా ఉప ఎన్నిక జరిగే అవకాశం ఉందా అన్నది లేటెస్ట్‌ హాట్‌. హుజూరాబాద్ ఎమ్మెల్యే పాడి కౌశిక్ రెడ్డి అసెంబ్లీలో సభ్యుల పట్ల అనుచితంగా ప్రవర్తించారన్న అంశంపై ఎథిక్స్ కమిటీ విచారణకు ఆదేశించారు స్పీకర్‌. కమిటీ ఇప్పటికే విచారణ కూడా ప్రారంభించింది కూడా. అటు ఎమ్మెల్యే కౌశిక్ రెడ్డి కూడా కమిటీని కొంత గడువు అడిగారు. ఆ మేరకు టైమ్‌ ఇచ్చే అవకాశం కనిపిస్తోందని అంటున్నారు. ఆ తర్వాత అయినా… ఎథిక్స్ కమిటీ కౌశిక్ రెడ్డి మీద చర్యలకు సిఫారసు చేయవచ్చన్న అంచనాలు గట్టిగానే ఉన్నాయి. అదే గనక జరిగితే… హుజూరాబాద్‌ ఎమ్మెల్యే మీద వేటు పడుతుందన్నది రాజకీయవర్గాల అంచనా.

మరోవైపు కౌశిక్‌ రెడ్డి విషయంలో విచారణ పూర్తి చేసి నివేదిక ఇచ్చేందుకు కమిటీకి మూడు నెలల గడువు ఇచ్చారు స్పీకర్. దీంతో… ఆ టైంలోపు విచారణ ముగించాలని ఎథిక్స్‌ కమిటీ కూడా నిర్ణయించుకున్నట్టు తెలుస్తోంది. ఇదే జరిగితే ఎమ్మెల్యే పాడిపై వేటు తప్పదనే చర్చ పొలిటికల్ సర్కిల్స్‌లో జరుగుతోంది. దీంతో…అటు హుజూరాబాద్… ఇటు ఖైరతాబాద్ నియోజకవర్గాలు రెండిటికీ ఉప ఎన్నికలు తప్పకపోవచ్చన్న డిస్కషన్స్‌ నడుస్తున్నాయి.ఆ రెండు చోట్ల బైపోల్‌ జరిగితే రాజకీయ పరిణామాలు ఎలా ఉండబోతున్నాయన్నది కొత్త రాజకీయ చర్చ.