Yanamala Krishnudu: తుని రాజకీయాల్లో కీలక పరిణామం.. జనసేనలో చేరిన యనమల కృష్ణుడు!

Yanamala Krishnudu Joins Janasena: తుని రాజకీయాల్లో మరో కీలక పరిణామం చోటుచేసుకుంది. సీనియర్ నేత యనమల కృష్ణుడు జనసేన పార్టీలో చేరారు. జనసేన అధినేత, ఏపీ ఉప ముఖ్యమంత్రి పవన్ కల్యాణ్ సమక్షంలో ఆయన పార్టీ కండువా కప్పుకున్నారు. కృష్ణుడు జనసేనలో చేరబోతున్నారనే ప్రచారం గత కొంతకాలంగా తుని రాజకీయ వర్గాల్లో కొనసాగగా.. తాజాగా అది కార్యరూపం దాల్చింది.

యనమల కృష్ణుడు గతంలో తెలుగుదేశం పార్టీలో కీలకంగా వ్యవహరించారు. 2014, 2019 అసెంబ్లీ ఎన్నికల్లో తుని నియోజకవర్గం నుంచి టీడీపీ అభ్యర్థిగా పోటీ చేశారు. అయితే రెండు ఎన్నికల్లోనూ ఆయన విజయం సాధించలేకపోయారు. 2024 ఎన్నికలకు ముందు టీడీపీలో చోటుచేసుకున్న పరిణామాల నేపథ్యంలో వైసీపీలో చేరారు. ముఖ్యంగా తుని టీడీపీ టికెట్ విషయంలో యనమల కుటుంబంలో నెలకొన్న రాజకీయ పరిణామాలు ఆయన పార్టీ మారడానికి కారణమయ్యాయి. 2024 ఎన్నికల్లో టీడీపీ అధిష్టానం యనమల రామకృష్ణుడి కుమార్తె యనమల దివ్యకు తుని టికెట్ కేటాయించడంతో.. కృష్ణుడు వైసీపీ గూటికి చేరారు.

అయితే వైసీపీలో చేరిన తర్వాత తుని రాజకీయాల్లో యనమల కృష్ణుడికి అనుకున్న స్థాయిలో ప్రాధాన్యం దక్కలేదనే చర్చ సాగింది. స్థానిక వైసీపీ నేతలతో ఆయనకు సఖ్యత లేకపోవడం, పార్టీ కార్యక్రమాలకు దూరంగా ఉంటున్నారనే ప్రచారం కూడా గతంలో వచ్చింది. ఈ నేపథ్యంలోనే కృష్ణుడు జనసేన వైపు అడుగులు వేశారు. నేడు పవన్ కళ్యాణ్ సమక్షంలోనే జనసేనలో చేరారు. కృష్ణుడు జనసేనలో చేరడంతో తుని నియోజకవర్గ రాజకీయాల్లో కొత్త సమీకరణాలకు తెరలేచినట్టైంది. ఆయన వెంట వచ్చే అనుచరులు, స్థానికంగా ఆయనకు ఉన్న రాజకీయ పరిచయాలు జనసేన రాజకీయాలపై ఎలాంటి ప్రభావం చూపుతాయనేది ఇప్పుడు ఆసక్తికరంగా మారింది.