US Midterm Elections Results: అధ్యక్షుడిపై తీవ్ర ఆగ్రహం.. 70 శాతం మంది యూత్‌కి ట్రంప్ నచ్చలే..

US Midterm Elections Results: అమెరికా మిడ్‌టర్మ్ (Midterm Elections) ఎన్నికలు అధ్యక్షుడు డొనాల్డ్ ట్రంప్ (Donald Trump) ప్రజాదరణకు ఒక పెద్ద పరీక్షగా మారాయి. ఈ ఎన్నికల్లో తన మద్దతుదారులు స్వయంగా ట్రంపే బరిలో ఉన్నట్లు భావించి ఓటు వేయాలని ఆయన పదే పదే విజ్ఞప్తి చేశారు. అమెరికా ఓటర్లు ట్రంప్ విజ్ఞప్తిని సీరియస్‌గానే తీసుకున్నప్పటికీ, వచ్చిన ఫలితాలు మాత్రం ట్రంప్‌తో పాటు రిపబ్లికన్ పార్టీ (Republican Party) అంచనాలను తలకిందులు చేశాయి. మంగళవారం వెలువడిన ఫలితాల్లో డెమోక్రటిక్ పార్టీ (Democratic Party) పలు కీలక రాష్ట్రాల్లో భారీ విజయాన్ని సాధించింది. జార్జియా, టెక్సాస్, ఒహాయో, మిచిగాన్, నార్త్ కరోలినా, న్యూ హాంప్‌షైర్ వంటి కీలక రాష్ట్రాల్లో రిపబ్లికన్ అభ్యర్థులు ఘోర ఓటమిని మూటగట్టుకున్నారు.

ఈ ఎన్నికల ఫలితాలను ట్రంప్ పాలనా విధానాలు, ఆయన నాయకత్వంపై ప్రజల్లో పెల్లుబికిన అసంతృప్తికి నిదర్శనంగా విశ్లేషకులు భావిస్తున్నారు. ఎన్నికలకు ముందే పెరిగిన ద్రవ్యోల్బణం (Inflation), ఇరాన్‌తో ఉద్రిక్తతలు (Iran Conflict), ట్రంప్ పడిపోతున్న ప్రజాదరణ రిపబ్లికన్ పార్టీని తీవ్రంగా దెబ్బతీశాయి. దాదాపు 75 శాతం మంది ఓటర్లు దేశం పాలనా విధానంపై తీవ్ర నిరాశతో ఉన్నారు. అలాగే, సుమారు 60 శాతం మంది ట్రంప్ పనితీరును పూర్తిగా వ్యతిరేకించారు. ఈ గాలిని అనుకూలంగా మార్చుకున్న డెమోక్రాట్లు, ఇప్పుడు అమెరికన్ కాంగ్రెస్ (US Congress) లోని రెండు సభల్లోనూ స్పష్టమైన మెజారిటీ సాధించే దిశగా బలమైన అడుగులు వేశారు.

డెమోక్రాట్ల ఈ చారిత్రక విజయం వెనుక ప్రధానంగా యువత, హిస్పానిక్ (Hispanic Voters) ఓటర్ల పాత్ర స్పష్టంగా కనిపిస్తోంది. 2024 అధ్యక్ష ఎన్నికల్లో ట్రంప్‌కు గట్టిగా నిలబడిన ఈ వర్గాలు, ఈసారి డెమోక్రాట్ల వైపు మొగ్గు చూపాయి. నివేదికల ప్రకారం.. 30 ఏళ్లలోపు ఉన్న యువ ఓటర్లలో దాదాపు 70 శాతం మంది డెమోక్రటిక్ అభ్యర్థులకే పట్టం కట్టారు. 2024లో ఇదే విభాగంలో ట్రంప్, కమలా హ్యారీస్ (Kamala Harris) మధ్య ఓట్లు సమంగా పక్కకు మారగా, ఇప్పుడు డెమోక్రాట్లు స్పష్టమైన పైచేయి సాధించారు. హిస్పానిక్ ఓటర్లలో కూడా రిపబ్లికన్ల పట్ల ఆదరణ తగ్గింది. వారిలో 60 శాతం మంది డెమోక్రాట్లను సమర్థించడమే కాకుండా, ట్రంప్ ఆర్థిక విధానాల వల్లే అమెరికా ఆర్థిక వ్యవస్థ చిన్నభిన్నమైందని 70 శాతం మంది అభిప్రాయపడ్డారు. ట్రంప్‌ను మనసులో ఉంచుకుని ఓటేసిన వారిలో ఆయన విధానాలను వ్యతిరేకించిన వారే రెట్టింపు సంఖ్యలో ఉన్నారు. అంతేకాక, 70 శాతం మంది ఓటర్లు కాంగ్రెస్‌కు అధ్యక్షుడి అధికారాలపై మరింత నియంత్రణ ఉండాలని కోరుతుండగా, 60 శాతం మంది ట్రంప్ దేశ ప్రయోజనాల కంటే స్వంత ప్రయోజనాలకే ఎక్కువ ప్రాధాన్యత ఇస్తారని భావిస్తున్నారు.

ఈ మార్పు ఫలితంగా జార్జియా నుంచి టెక్సాస్ వరకు డెమోక్రాట్లు జయభేరి మోగించారు. 2024 అధ్యక్ష ఎన్నికల్లో ట్రంప్ పెద్ద ఎత్తున ఆధిక్యం సాధించిన జార్జియా, ఒహాయో, టెక్సాస్ వంటి రాష్ట్రాల్లో డెమోక్రాట్లు సీనెట్ (Senate), గవర్నర్ పదవులను కైవసం చేసుకున్నారు. జార్జియాలో కీషా లాన్స్ బాటమ్స్ రాష్ట్రానికి మొదటి నల్లజాతి మహిళా గవర్నర్‌ (First Black Female Governor) గా నిలిచి చరిత్ర సృష్టించగా, సీనెటర్ జాన్ ఓసాఫ్ తిరిగి ఎన్నికయ్యారు. నార్త్ కరోలినాలో మాజీ గవర్నర్ రాయ్ కూపర్ సీనెట్ స్థానాన్ని గెలుచుకున్నారు. న్యూ హాంప్‌షైర్‌లో గెలిచిన క్రిస్ పప్పాస్ అమెరికన్ సీనెట్‌లో తొలి ఓపెన్ గే (Open Gay Member) సభ్యుడిగా రికార్డుకెక్కారు. ఒహాయోలో మాజీ సీనెటర్ షెర్రోడ్ బ్రౌన్ రిపబ్లికన్ స్థానాన్ని కైవసం చేసుకోగా, గవర్నర్ బరిలో అమీ యాక్టన్.. ట్రంప్ సన్నిహితుడైన వివేక్ రామస్వామిని (Vivek Ramaswamy) చిత్తుగా ఓడించారు. టెక్సాస్‌లో 37 ఏళ్ల జేమ్స్ తలారికో సీనెట్‌కు ఎంపికవ్వగా, జీనా హినోజోసా మూడు సార్లు గవర్నర్‌గా పనిచేసిన గ్రెగ్ అబాట్‌ను ఓడించి రాష్ట్రపు తొలి లాటినా గవర్నర్‌ (First Latina Governor) గా ఘన విజయం సాధించారు. కాన్సాస్‌లో ఆడమ్ హామిల్టన్, సౌత్ కరోలినాలో ఆనీ ఆండ్రూస్ (ట్రంప్ ఎంచుకున్న డార్లీన్ గ్రాహమ్‌పై) విజయం సాధించడం ట్రంప్ వర్గానికి గట్టి దెబ్బగా మారింది.

ఈ ఊపుతో డెమోక్రటిక్ పార్టీ ఇప్పుడు అమెరికన్ కాంగ్రెస్ లోని రెండు సభలనూ (Senate and House of Representatives) తమ గుప్పిట్లోకి తెచ్చుకోవడానికి వ్యూహాలు రచిస్తోంది. ప్రస్తుతం సీనెట్‌లో రిపబ్లికన్లకు 53, డెమోక్రాట్లకు 47 సీట్లు ఉండగా, మెజారిటీ కోసం డెమోక్రాట్లు తీవ్రంగా శ్రమిస్తున్నారు. ఇక ప్రజా ప్రతినిధుల సభ (House of Representatives) లో రిపబ్లికన్లకు అతి స్వల్ప మెజారిటీ (220-215) మాత్రమే ఉంది. దాంతో 60కి పైగా స్థానాలపై దృష్టి సారించిన డెమోక్రాట్లు విజయం దిశగా దూసుకుపోతున్నారు. ఒకవేళ కాంగ్రెస్‌లోని రెండు సభల నియంత్రణ ఒక పార్టీ నుంచి మరో పార్టీకి మారితే, అది రెండో ప్రపంచ యుద్ధం తర్వాత కేవలం నాలుగోసారి (గతంలో 1946, 1994, 2006లలో మాత్రమే) జరిగినట్లవుతుంది.

ఇక్కడ విచిత్రమేమిటంటే, రిపబ్లికన్లకు అనుకూలంగా ట్రంప్ పన్నిన ఎన్నికల వ్యూహమే ఇప్పుడు రివర్స్ కొట్టింది. గత ఏడాది టెక్సాస్‌లో రిపబ్లికన్లకు ఎక్కువ సీట్లు వచ్చేలా నియోజకవర్గాల సరిహద్దుల పునర్విభజన (Gerrymandering / Boundary Changes) ప్రక్రియను ట్రంప్ ప్రోత్సహించారు. దీనికి పోటీగా కాలిఫోర్నియా గవర్నర్ గావిన్ న్యూసోమ్ కూడా తన రాష్ట్రంలో మార్పులు చేశారు. కాగితాలపై ఈ వ్యూహం రిపబ్లికన్లకు 9 అదనపు స్థానాలను ఇస్తుందని భావించినప్పటికీ, ప్రాక్టికల్‌గా అది విఫలమైంది. ఫ్లోరిడాలో రిపబ్లికన్ల ప్రయోజనం కోసం మార్చిన 3 స్థానాల్లోనూ డెమోక్రాట్లే జయభేరి మోగించడం గమనార్హం. అయితే, ఈ విజయాల వెనుక డెమోక్రటిక్ పార్టీకి కూడా కొన్ని అంతర్గత సవాళ్లు లేకపోలేదు. ఏపీ (AP) సర్వే ప్రకారం ఇప్పటికీ దాదాపు 50 శాతం మంది అమెరికన్లకు డెమోక్రాట్లపై ప్రతికూల అభిప్రాయం ఉంది (రిపబ్లికన్లపై ఇది 60 శాతంగా ఉంది). పార్టీలో లిబరల్, ప్రోగ్రెసివ్ వర్గాల మధ్య సిద్ధాంతపరమైన విభేదాలు కొనసాగుతున్నాయి. పెంసిల్వేనియా గవర్నర్ జోష్ షాపిరో, మేరీల్యాండ్ గవర్నర్ వెస్ మూర్‌లు తిరిగి గెలవడం లిబరల్ వర్గానికి బలాన్నిచ్చింది. వీరిద్దరినీ 2028 అధ్యక్ష ఎన్నికల (2028 Presidential Election) రేసులో ముందంజలో ఉన్న నాయకులుగా చూస్తున్నారు. మొత్తానికి ఈ మిడ్‌టర్మ్ ఫలితాలు ట్రంప్ వైఫల్యాలకు అద్దం పడుతూనే, రాబోయే 2028 పోరుకు స్పష్టమైన రాజకీయ దిశను నిర్దేశిస్తున్నాయి.