Tirumala: నవరాత్రి బ్రహ్మోత్సవాలకు అంకురార్పణ.. నేటి నుంచి ప్రత్యేక దర్శనాలు రద్దు.!

Tirumala: తిరుమల శ్రీవారి నవరాత్రి బ్రహ్మోత్సవాలకు నేడు అంకురార్పణ జరగనుంది. రాత్రి 7 గంటలకు సేనాధిపతి విష్వక్సేనుడి ఊరేగింపుతో బ్రహ్మోత్సవ కార్యక్రమాలు ప్రారంభమవుతాయి. రేపటి నుంచి ఈ నెల 20వ తేదీ వరకు నవరాత్రి బ్రహ్మోత్సవాలు వైభవంగా నిర్వహించేందుకు టీటీడీ ఏర్పాట్లు చేసింది.

బ్రహ్మోత్సవాల్లో భాగంగా రేపు ఉదయం 9 గంటలకు బంగారు తిరుచ్చి ఊరేగింపు నిర్వహించనున్నారు. రాత్రి 7 గంటలకు పెద్దశేష వాహన సేవ జరగనుంది. నవరాత్రి బ్రహ్మోత్సవాల సందర్భంగా శ్రీవారి ఉత్సవాలు వైభవంగా నిర్వహించేందుకు టీటీడీ అన్ని ఏర్పాట్లు పూర్తి చేసింది. నేటి నుంచి ఈ నెల 20వ తేదీ వరకు ఆర్జిత సేవలు, ప్రత్యేక దర్శనాలు, వీఐపీ బ్రేక్ దర్శనాలను టీటీడీ రద్దు చేసింది. బ్రహ్మోత్సవాల సమయంలో భక్తుల రద్దీ దృష్ట్యా ఈ నిర్ణయం తీసుకుంది.

మరోవైపు తిరుమలలో భక్తుల రద్దీ కొనసాగుతోంది. ప్రస్తుతం 16 కంపార్టుమెంట్లలో భక్తులు వేచి ఉన్నారు. టోకెన్లు లేని భక్తులకు శ్రీవారి సర్వదర్శనానికి సుమారు 8 గంటల సమయం పడుతోంది. నిన్న మొత్తం 79,737 మంది భక్తులు శ్రీవారిని దర్శించుకున్నారు. అందులో 24,326 మంది భక్తులు తలనీలాలు సమర్పించారు. శ్రీవారి హుండీ ఆదాయం రూ.3.71 కోట్లు వచ్చినట్లు టీటీడీ వెల్లడించింది.