Russia-Telegram: టెలిగ్రామ్‌ వ్యవస్థాపకుడిపై ఉగ్రవాద ఆరోపణలు.. రష్యా సంచలన నిర్ణయం

టెలిగ్రామ్ వ్యవస్థాపకుడు, సీఈఓ పావెల్ దురోవ్‌పై రష్యా తీవ్ర ఆరోపణలు చేసింది. ఉక్రెయిన్ నిఘా సంస్థలు టెలిగ్రామ్‌ను ఉపయోగించి రష్యాలో దాడులు నిర్వహించేందుకు యువకులను నియమించుకున్నప్పటికీ.. ఆ కార్యకలాపాలను అడ్డుకోకుండా ఉగ్రవాద చర్యలకు సహకరించారని రష్యా ఫెడరల్ సెక్యూరిటీ సర్వీస్ ఆరోపించింది. ఈ కేసును మరింత తీవ్రతరం చేసిన రష్యా దర్యాప్తు సంస్థలు.. దురోవ్‌పై ఉగ్రవాద కార్యకలాపాలకు సహకరించినట్లు క్రిమినల్ కేసు నమోదు చేసినట్లు వెల్లడించాయి. అంతర్జాతీయ వాంటెడ్ జాబితాలో చేర్చినట్లు పేర్కొన్నాయి.

ఉక్రెయిన్ భద్రతా సంస్థలు నిర్వహిస్తున్నట్లు ఆరోపిస్తున్న కొన్ని టెలిగ్రామ్ ఛానళ్లు, గ్రూప్ చాట్‌లు, బాట్‌లు ఇప్పటికీ అందుబాటులో ఉన్నాయని ఎఫ్‌ఎస్‌బీ పేర్కొంది. వీటి ద్వారా రష్యా భూభాగంలో దాడులకు ప్రణాళికలు రూపొందించడం, యువకులను నియమించుకోవడం వంటి కార్యకలాపాలు జరిగాయని ఆరోపించింది. ఈ దాడుల కారణంగా మహిళలు, చిన్నారులు సహా అనేక మంది ప్రాణాలు కోల్పోయారని, కోట్లాది రూబుళ్ల మేర ఆస్తి నష్టం జరిగిందని ఎఫ్‌ఎస్‌బీ తెలిపింది. అయితే ఈ గణాంకాలను స్వతంత్రంగా ధ్రువీకరించలేదు.

ఈ ఆరోపణల్లో ‘‘డైవింగ్‌చిక్’’ అనే టెలిగ్రామ్ ఆధారిత సేవ కీలకంగా ఉందని ఎఫ్‌ఎస్‌బీ పేర్కొంది. ఉక్రెయిన్‌కు చెందిన ఏజెంట్లు యువతులుగా నటిస్తూ రష్యా యువకులతో పరిచయం పెంచుకుని.. వారిని మోసం చేసి దాడులకు పాల్పడేలా ప్రేరేపించారని ఆరోపించింది. 2025 జూలై నుంచి ఈ సేవతో సంబంధం ఉన్న 46 మందిని రష్యాలోని 16 ప్రాంతాల్లో అదుపులోకి తీసుకున్నట్లు తెలిపింది. వారిపై అగ్నిప్రమాదాలకు పాల్పడటం, పోలీసు అధికారులపై దాడులు చేయడం వంటి ఆరోపణలు ఉన్నాయని పేర్కొంది. అయితే ఈ వివరాలకు కూడా స్వతంత్ర ధ్రువీకరణ అందుబాటులో లేదు.

పావెల్ దురోవ్‌పై ఉగ్రవాద కార్యకలాపాలకు సహకరించినట్లు రష్యా క్రిమినల్ కోడ్‌లోని ఆర్టికల్ 205.1 కింద కేసు నమోదైంది. ఈ ఆరోపణలు రుజువైతే గరిష్ఠంగా 15 ఏళ్ల వరకు జైలు శిక్ష పడే అవకాశం ఉంది. ఈ కేసుకు సంబంధించిన వివరాలు తొలిసారిగా గత ఫిబ్రవరిలో రష్యా ప్రభుత్వ అధికారిక పత్రిక ‘రోసిస్కయా గజెటా’, క్రెమ్లిన్ అనుకూల మీడియా సంస్థ ‘కొమ్సోమోల్స్కయా ప్రవ్దా’లో ఎఫ్‌ఎస్‌బీ ఆధారాలతో ప్రచురితమయ్యాయి.

అయితే రష్యా ఆరోపణలను పావెల్ దురోవ్ తీవ్రంగా ఖండించారు. 2014లో రష్యాను విడిచిపెట్టిన దురోవ్ ప్రస్తుతం ఫ్రాన్స్, యూఏఈ పౌరసత్వాలు కలిగి ఉన్నారు. టెలిగ్రామ్‌పై ఆంక్షలు విధించేందుకు రష్యా ప్రభుత్వం కొత్త సాకులు సృష్టిస్తోందని ఆరోపించారు. ‘‘తమ సొంత ప్రజలనే భయపడుతున్న ఒక ప్రభుత్వానికి ఇది విచారకరమైన ప్రదర్శన’’ అని వ్యాఖ్యానించారు.

ఇటీవల టెలిగ్రామ్‌పై రష్యా ప్రభుత్వం ఒత్తిడి పెంచింది. టెలిగ్రామ్ సేవల వేగాన్ని తగ్గించడంతో పాటు.. యాప్‌లో వాయిస్ కాలింగ్ సేవలను కూడా పరిమితం చేసినట్లు సమాచారం. మరోవైపు ప్రభుత్వ నిఘా వ్యవస్థలతో అనుసంధానమైన ‘మ్యాక్స్’ అనే ప్రభుత్వ ఆధారిత మెసేజింగ్ యాప్‌ను రష్యా ప్రోత్సహిస్తోంది. టెలిగ్రామ్ మాత్రం తమ వేదిక నేర కార్యకలాపాలకు ఆశ్రయం కాదని, తాము పాశ్చాత్య దేశాలు లేదా ఉక్రెయిన్ నిఘా సంస్థలకు సాధనంగా పనిచేయడం లేదని స్పష్టం చేసింది.

ఇదిలా ఉండగా.. పావెల్ దురోవ్‌పై ఫ్రాన్స్‌లో కూడా మరో ప్రత్యేక దర్యాప్తు కొనసాగుతోంది. 2024 ఆగస్టులో పారిస్ సమీపంలో ఆయన అరెస్టైన తర్వాత.. టెలిగ్రామ్ వేదికను నేర కార్యకలాపాలకు ఉపయోగించకుండా నిరోధించడంలో సంస్థ విఫలమైందన్న ఆరోపణలపై ఫ్రాన్స్ అధికారులు విచారణ ప్రారంభించారు. రష్యాలో తాజాగా నమోదైన ఉగ్రవాద సహకార కేసు, ఫ్రాన్స్‌లో కొనసాగుతున్న దర్యాప్తుతో పావెల్ దురోవ్‌పై అంతర్జాతీయంగా చట్టపరమైన ఒత్తిడి మరింత పెరిగినట్లు కనిపిస్తోంది.