Smriti Mandhana: ప్రపంచ క్రికెట్‌లోనే సరికొత్త రికార్డు.. చరిత్ర సృష్టించిన స్మృతి మంధాన..

భారత మహిళా క్రికెట్ స్టార్ బ్యాటర్ స్మృతి మంధాన అంతర్జాతీయ క్రికెట్‌లో ఒక అరుదైన మైలురాయిని అధిగమించింది. ఇంగ్లాండ్‌లోని చారిత్రాత్మక లార్డ్స్ మైదానంలో జరుగుతున్న ఏకైక టెస్ట్ మ్యాచ్‌లో బరిలోకి దిగడం ద్వారా ఆమె తన కెరీర్‌లో 300వ అంతర్జాతీయ మ్యాచ్ మైలురాయిని అందుకుంది. లార్డ్స్ మైదానంలో తొలిసారిగా జరుగుతున్న ఈ చారిత్రాత్మక మహిళా టెస్టులో మంధాన అద్భుతమైన ఇన్నింగ్స్ ఆడింది.

అత్యంత పిన్న వయస్కురాలిగా రికార్డు..
ఈ మైలురాయిని చేరుకోవడం ద్వారా స్మృతి మంధాన మహిళా క్రికెట్ చరిత్రలో పలు ప్రతిష్టాత్మక రికార్డులను తన పేరిట లిఖించుకుంది. త్వరలోనే (జూలై 18న) 30 ఏళ్ల వయసులోకి అడుగుపెట్టబోతున్న మంధాన, 300 అంతర్జాతీయ మ్యాచ్‌లు ఆడిన అత్యంత పిన్న వయస్కురాలైన మహిళా క్రికెటర్గా నిలిచింది. దిగ్గజ ఆటగాళ్లు హర్మాన్‌ప్రీత్ కౌర్ (374 మ్యాచ్‌లు), మిథాలీ రాజ్ (333 మ్యాచ్‌లు) తర్వాత ఈ ఘనత సాధించిన మూడో భారతీయ క్రీడాకారిణిగా నిలిచింది. మహిళా క్రికెట్ చరిత్రలో 300 మ్యాచ్‌ల మార్కును అందుకున్న కేవలం 12వ ఆటగాడిగా మంధాన నిలిచింది.

స్మృతి మంధాన 2013లో బంగ్లాదేశ్‌పై అంతర్జాతీయ అరంగేట్రం (డెబ్యూ) చేయగా, 2014లో ఇంగ్లాండ్‌పై తన మొదటి టెస్ట్ మ్యాచ్ ఆడింది. ప్రస్తుతం ఆమె మూడు ఫార్మాట్లలోనూ భారత జట్టుకు వైస్ కెప్టెన్‌గా వ్యవహరిస్తోంది. ఆమె కెరీర్ రికార్డులు విషయానికి వస్తే.. టెస్ట్ క్రికెట్ లో.. 9 మ్యాచ్‌ల్లో 635 పరుగులు. వన్డే క్రికెట్ (ODI)లో 5411 పరుగులు, టీ20 అంతర్జాతీయ క్రికెట్ లో 4538 పరుగులు చేశారు.

మహిళా క్రికెట్‌లో ప్రస్తుతం భారత కెప్టెన్ హర్మాన్‌ప్రీత్ కౌర్ 374 మ్యాచ్‌లతో ప్రపంచంలోనే అగ్రస్థానంలో ఉంది. ఆ తర్వాతి స్థానాల్లో న్యూజిలాండ్‌కు చెందిన సుజీ బేట్స్ (370 మ్యాచ్‌లు), మిథాలీ రాజ్ (333 మ్యాచ్‌లు), సోఫీ డివైన్ (317), స్టెఫానీ టేలర్ (315), డానీ వ్యాట్-హాడ్జ్ (311), డియాండ్రా డాటిన్ (309), షార్లెట్ ఎడ్వర్డ్స్ (300) ఉన్నారు.

ప్రస్తుతం లార్డ్స్‌లో జరుగుతున్న ఈ మ్యాచ్ ఇంగ్లాండ్ గడ్డపై జరుగుతున్న 56వ మహిళా టెస్ట్ మ్యాచ్ కావడం విశేషం. మూడు ఫార్మాట్లలోనూ కీలక సభ్యురాలిగా ఉన్న మంధాన, భవిష్యత్తులో మహిళా క్రికెట్ చరిత్రలోనే అత్యధిక మ్యాచ్‌లు ఆడిన ఆటగాడిగా నిలిచే అవకాశం ఉంది.