Google Pixel 9 Offers: ‘గూగుల్‌ పిక్సెల్‌ 9’ విక్రయాలు ఆరంభం.. 10 వేల రాయితీ!

Google Pixel 9 Launch Offer in Flipkart: మొబైల్ ప్రియులు ఎంతో ఆసక్తిగా ఎదురుచూసిన ‘గూగుల్‌ పిక్సెల్‌ 9′ సిరీస్‌ ఫోన్లు ఆగస్టు 14న రిలీజ్ అయిన విషయం తెలిసిందే. మేడ్‌ బై గూగుల్‌ ఈవెంట్‌లో విడుదలైన ఈ ఫోన్లకు ఆగస్టు 14 నుంచే బుకింగ్‌లు ప్రారంభమయ్యాయి. ఈరోజు నుంచి పిక్సెల్‌ 9, పిక్సెల్‌ 9 ప్రో ఎక్స్‌ఎల్‌ ఫోన్ల విక్రయాలు ఆరంభం అయ్యాయి. ఈ-కామర్స్‌ ప్లాట్‌ఫామ్‌ ఫ్లిప్‌కార్ట్‌లో వీటిని కొనుగోలు చేయొచ్చు. అలానే క్రోమా, రిలయన్స్‌ డిజిటల్‌ స్టోర్లలో కూడా అందుబాటులో ఉంటాయి.

పిక్సెల్ 9 సిరీస్‌లో నాలుగు మోడల్‌లు (పిక్సెల్‌ 9, పిక్సెల్‌ 9 ప్రో, పిక్సెల్‌ 9 ప్రో ఎక్స్‌ఎల్‌, పిక్సెల్‌ 9 ప్రో ఫోల్డ్‌) ఉన్నాయి. పిక్సెల్‌ 9, పిక్సెల్‌ 9 ప్రో ఎక్స్‌ఎల్‌ ఫోన్ల విక్రయాలు మాత్రమే నేడు ఆరంభమయ్యాయి. పిక్సెల్‌ 9 ప్రో, పిక్సెల్‌ 9 ప్రో ఫోల్డ్‌ అమ్మకాలు ఎప్పటినుంచి అందుబాటులోకి వస్తాయని మాత్రం గూగుల్‌ ఇంకా వెల్లడించలేదు. పిక్సెల్‌ 9 ఫోన్ 12జీబీ+256జీబీ వేరియెంట్ ధర రూ.79,999గా కంపెనీ నిర్ణయించింది. పిక్సెల్‌ 9 ప్రో ఎక్స్‌ఎల్‌ 16జీబీ+256జీబీ వేరియెంట్ ధర రూ.1,24,999గా ఉంది.

Also Read: Indra Re Release: ‘అయ్యయ్యయ్యో’ పాటకు పెద్దాయన సూపర్ డాన్స్.. ‘బాస్’ని 100 శాతం మ్యాచ్ చేశాడు!

రిలయన్స్ డిజిటల్‌లో పిక్సెల్‌ 9ను ఎస్‌బీఐ క్రెడిట్‌ కార్డు ద్వారా కొనుగోలు చేస్తే.. రూ.5,000 వరకు డిస్కౌంట్ లభిస్తుంది. పిక్సెల్‌ 9 ప్రో ఎక్స్‌ఎల్‌పై రూ.10,000 వరకు రాయితీ ఉంటుంది. మరోవైపు లాంచ్‌ ఆఫర్‌ కింద ఫ్లిప్‌కార్ట్‌లో ఈ ఫోన్లను కొనుగోలు చేసేవారికి గూగుల్‌ 30 వాట్స్ పవర్‌ అడాప్టర్‌ను రూ.1,999కే అందుబాటులో ఉంచింది. ఐసీఐసీఐ బ్యాంక్ క్రెడిట్‌ కార్డు, ఈఎంఐ లావాదేవీల ద్వారా కొనుగోలు చేస్తే.. పిక్సెల్‌ 9పై రూ.4,000 తక్షణ తగ్గింపు, పిక్సెల్‌ 9 ప్రో ఎక్స్‌ఎల్‌పై రూ.10,000 రాయితీ పొందొచ్చు.