Most Intelligent: 12 ఏళ్ల వయసుకే 180 IQ.. ఐన్‌స్టీన్‌ను మించిన భారతీయ బాలమేధావి..

కర్ణాటకలోని మైసూర్‌కు చెందిన 12 ఏళ్ల బాలుడు రిషి శివ ప్రసన్న అసాధారణ ప్రతిభతో ఎంతోమందికి స్ఫూర్తిగా నిలుస్తున్నారు. ఆయన ఐక్యూ లెవల్ సుమారు 180గా ఉంటుందని, ఇది ఆల్బర్ట్ ఐన్‌స్టీన్ అంచనా వేసిన 160 కంటే కూడా ఎక్కువ అని చెబుతారు. కేవలం 12 ఏళ్ల వయస్సులోనే ఆయన గూగుల్-సర్టిఫైడ్ ఆండ్రాయిడ్ డెవలపర్‌గా ఎదగడమే కాకుండా, ఇప్పటివరకు 8 పుస్తకాలు రాశారు. ఈయన ప్రతిభను గుర్తించిన కేంద్ర ప్రభుత్వం అతనికి ‘ప్రధాన మంత్రి రాష్ట్రీయ బాల పురస్కార్’ అవార్డును కూడా అందజేసింది.

రిషి మొదటి తరగతి చదువుతున్నప్పుడే ‘లెర్న్ విటమిన్స్ విత్ హారీ పోటర్’ పేరుతో తన మొట్టమొదటి పుస్తకాన్ని రాశారు. ఆ తర్వాత సైన్స్, స్పేస్, కాల ప్రయాణం వంటి విభిన్న అంశాలపై ‘టైటానియం టైమ్ ట్రావెలర్స్’ వంటి పుస్తకాల సిరీస్‌ను రూపొందించారు. కేవలం ఐదేళ్ల వయస్సులోనే కోడింగ్ నేర్చుకోవడం ప్రారంభించిన రిషి, చిన్న వయస్సులోనే ‘ఐక్యూ టెస్ట్ యాప్ ఫర్ కిడ్స్’, ‘కంట్రీస్ ఆఫ్ ది వరల్డ్’, ‘కోవిడ్ హెల్ప్ ఫర్ బెంగళూరుటెన్స్’ వంటి మూడు మొబైల్ యాప్‌లను అభివృద్ధి చేశారు. సాంకేతిక రంగంలో ఆయన చేసిన ఈ విశేష కృషికే 2023లో ప్రతిష్టాత్మక ప్రధాని రాష్ట్రీయ బాల పురస్కార్ లభించింది.

ప్రధానమంత్రి నరేంద్ర మోదీ కూడా రిషి ప్రతిభను ప్రత్యేకంగా అభినందించారు. ఆర్టిఫిషియల్ ఇంటెలిజెన్స్ (ఏఐ) గురించి మాట్లాడుతూ.. భవిష్యత్తులో విద్య, వైద్యం , ఇతర రంగాలలో ఏఐ మానవులకు ఎంతో సహాయపడుతుందని రిషి అభిప్రాయపడ్డారు. అంతేకాకుండా, కార్ల నుంచి వెలువడే హానికరమైన పొగను శుభ్రమైన గాలిగా మార్చే ఒక ప్రత్యేక యంత్రాన్ని తయారు చేయాలనే వినూత్న ఆలోచనతో ఆయన ముందుకు సాగుతున్నారు. చిన్న వయస్సులోనే భారీ విజయాలను సాధిస్తూ, యువతకు ఆదర్శంగా నిలుస్తున్న రిషి శివ ప్రసన్న ప్రయాణం ఎంతో అద్భుతమైనది.