Virat Kohli: రంజీ ట్రోఫీకి కళ తెచ్చిన విరాట్‌ కోహ్లీ.. కింగ్ కోసం 15 వేల మంది!

టీమిండియా స్టార్ బ్యాటర్ విరాట్ కోహ్లీ రాకతో రంజీ ట్రోఫీ 2025కి కొత్త జోష్‌ వచ్చింది. అంతర్జాతీయ మ్యాచ్‌ మాదిరి అరుణ్‌ జైట్లీ స్టేడియం ‘కోహ్లీ.. కోహ్లీ’ నినాదాలతో హోరెత్తింది. గురువారం ఢిల్లీ, రైల్వేస్‌ జట్ల మధ్య ప్రారంభమైన రంజీ ట్రోఫీ గ్రూపు-డి మ్యాచ్‌లో విరాట్ బరిలోకి దిగాడు. కింగ్ ఫీల్డింగ్ చేస్తేనే అభిమానులు కేరింతలతో మైదానాన్ని హోరెత్తించారంటే.. ఇక బ్యాటింగ్ దిగి బౌండరీలు బాదితే ఇంకేమన్నా ఉందా?. మొత్తానికి విరాట్‌ రంజీ ట్రోఫీ 2025కి కళ తెచ్చాడని చెప్పాలి.

ఈ మ్యాచ్‌లో ముందుగా బ్యాటింగ్‌ చేసిన రైల్వేస్‌ తొలి ఇన్నింగ్స్‌లో 67.4 ఓవర్లలో 241 పరుగులకు కుప్పకూలింది. ఉపేంద్ర యాదవ్‌ (95; 177 బంతుల్లో 10×4, 1×6) తృటిలో సెంచరీ కోల్పోగా.. కర్ణ్‌ శర్మ (50; 105 బంతుల్లో 7×4, 1×6) హాఫ్ సెంచరీ బాదాడు. ఢిల్లీ బౌలర్లలో నవదీప్‌ సైనీ, సుమిత్‌ మాథుర్‌ తలో మూడు వికెట్స్ పడగొట్టారు. ఢిల్లీ మొదటి ఇన్నింగ్స్‌లో 19 ఓవర్లలో ఒక వికెట్‌ నష్టానికి 63 పరుగులు చేసింది. సనత్ సాంగ్వాన్, యష్ ధుల్ ఆడుతున్నారు. ఈ ఇద్దరిలో ఎవరు అవుట్ అయినా విరాట్ కోహ్లీ బ్యాటింగ్‌కు దిగుతాడు. 12 ఏళ్ల తర్వాత కింగ్ దేశవాళీ క్రికెట్‌ ఆడుతుండడంతో అభిమానులు పెద్ద సంఖ్యలో స్టేడియానికి వచ్చారు. కోహ్లీని చూసేందుకు ఏకంగా 15 వేల మంది అభిమానులు వచ్చినట్లు తెలుస్తోంది. రెండోరోజు ఈ సంఖ్య మరింత ఎక్కువ కానుంది.

This is the stardom of Virat Kohli. 🙇‍♂️🐐 pic.twitter.com/zZ5vQGkclC

— Mufaddal Vohra (@mufaddal_vohra) January 31, 2025