Ragi Ambali Recipe: ఎండకాలం వచ్చేస్తుంది.. ఉపశమనం కోసం ‘రాగి అంబలి’! చేసేయండి ఇలా!

Ragi Ambali Recipe: చలికాలం చివరి దశకు వచ్చింది. వేసవి కాలం మొదలవుతుంది. ఇప్పుడే సూర్యుడు అక్కడక్కడా తన ప్రతాపాన్ని మెల్లగా మొదలు పెట్టేసాడు. మరి ఈ వేసవిలో శరీరానికి చలువ చేసే పానీయాల్లో ‘రాగి అంబలి’కి ప్రత్యేకమైన స్థానం ఉంది. ఇదివరకు పూర్వీకులు ఈ పానీయాన్ని తాగి ఎంతో ఆరోగ్యంగా ఉండేవారు. రాగి అంబలి కేవలం చలువ చేయడమే కాకుండా, శరీరానికి కావాల్సిన అనేక పోషకాలను కూడా అందిస్తుంది. మరి ఈ ‘రాగి అంబలి’ ఎలా చేయాలో చూసేద్దామా..

కావలసిన పదార్థాలు:

* మొలకెత్తిన రాగి పిండి – 1 కప్పు

* నీళ్లు – 4 కప్పులు (మొదట ఉడికించడానికి)

* పెరుగు – 1 కప్పు

* కొత్తిమీర తరుగు

* కరివేపాకు

* ఉల్లిపాయ తరుగు – కొద్దిగా

* అల్లం తరుగు – 1 టీస్పూన్

* పచ్చిమిర్చి తరుగు – తగినంత

* ఉప్పు – రుచికి సరిపడా

తయారీ విధానం:

రాగి పిండి ఉడికించడం:
మొదటగా ఒక కప్పు మొలకెత్తిన రాగి పిండిని తీసుకుని అందులో నాలుగు కప్పుల నీళ్లు పోసి ఉండలు లేకుండా కలుపుకోవాలి. ఆ తర్వాత ఈ మిశ్రమాన్ని పొయ్యి మీద పెట్టి, పిండి చిక్కబడే వరకు సుమారు 15 నిమిషాల పాటు కలుపుతూ ఉడికించాలి. ఉడికిందో లేదో తెలుసుకోవడానికి తడి చేత్తో పిండిని తాకితే చేతికి అంటుకోకుండా ఉండాలి.

నానబెట్టడం:
ఉడికించిన రాగి పిండిని పూర్తిగా చల్లారనివ్వాలి. చల్లారిన తర్వాత ఆ పిండిని పెద్ద ఉండలుగా చేసుకుని, సుమారు 1.25 లీటర్ల నీరున్న ఒక మట్టి పాత్రలో వేసి రాత్రంతా నానబెట్టాలి. ఇలా రాత్రంతా నానబెట్టడం వల్ల శరీరానికి మేలు చేసే మంచి బ్యాక్టీరియా వృద్ధి చెందుతుంది.

అంబలి సిద్ధం చేయడం:
మరుసటి రోజు ఉదయం, ఆ రాగి ఉండలను నీళ్లలోనే మెత్తగా మెదిపేయాలి. ఆ తర్వాత వడకట్టినట్లయితే అంబలి ఉండలు లేకుండా సాఫీగా వస్తుంది.

పెరుగు, ఇతర పదార్థాలు చేర్చడం:
ఒక గిన్నెలో కప్పు పెరుగును తీసుకుని ఉండలు లేకుండా బాగా చిలకాలి. ఈ పెరుగును వడకట్టిన రాగి అంబలిలో కలిపి, రుచికి సరిపడా ఉప్పు వేసి బాగా కలుపుకోవాలి.

పోషకాల కలయిక:
చివరగా ఇందులో సన్నగా తరిగిన కొత్తిమీర, కరివేపాకు, ఉల్లిపాయ ముక్కలు, అల్లం తురుము, పచ్చిమిర్చి ముక్కలు వేసి బాగా కలుపుకోవాలి. అంతే, ఎంతో రుచికరమైన మరియు ఆరోగ్యకరమైన రాగి అంబలి సిద్ధం.

రాగి అంబలి ప్రయోజనాలు:
ఇది శరీరంలోని వేడిని తగ్గించి చలువ చేస్తుంది. ఇంకా జీర్ణక్రియను మెరుగుపరిచి ఆకలిని పెంచుతుంది. విటమిన్లు, ప్రోటీన్లు వంటి అనేక పోషకాలు శరీరానికి అందుతాయి. అలాగే వేసవిలో వచ్చే అలసట నుండి ఉపశమనం కలిగిస్తుంది. ఈ రాగి అంబలిని రోజూ ఉదయం మరియు సాయంత్రం తాగడం వల్ల ఆరోగ్యానికి ఎంతో మేలు జరుగుతుంది. మరి ఇంకెందుకు ఆలస్యం, మీరు కూడా ఈ వేసవిలో రాగి అంబలిని ప్రయత్నించండి.