Pune: కొడుకుతో సహా 18వ అంతస్తు నుంచి దూకిన మహిళ.. భర్త మరో పెళ్లి చేసుకోవాలని లేఖ!

Pune:  మహారాష్ట్ర పూణేలో విషాదం చోటుచేసుకుంది. పింప్రి-చించ్వాడ్‌లోని ఓ రెసిడెన్షియల్ బిల్డింగ్ 18వ అంతస్తు నుంచి 33 ఏళ్ల మహిళ తన 6 ఏళ్ల కుమారుడితో దూకి ఆత్మహత్య చేసకుంది. ఈ ఘటన శుక్రవారం జరిగింది. మహిళ ఇంట్లో పోలీసులు 8 పేజీల లేఖ స్వాధీనం చేసుకున్నారు. మృతురాలని ఏక్తా బంగాడ్‌గా గుర్తించారు. ఆమె భర్త మనోజ్ బంగాడ్ పుణెలోని ఓ ఐటీ కంపెనీలో ఇంజినీర్‌గా పనిచేస్తున్నారు. వీరికి ఆరేళ్ల కుమారుడు మాధవ్ ఉన్నాడు. ఈ కుటుంబం పింప్రి-చించ్వాడ్‌లోని సిగ్నేచర్ పార్క్‌లో నివాసం ఉంటోంది. శుక్రవారం సాయంత్రం సుమారు 6.30 గంటలకు ఘటన జరిగినట్లు తెలుస్తోంది. ముందుగా ఏక్తా భవనంలోని 18వ అంతస్తుకు తన కుమారుడిని తీసుకెళ్లి, అక్కడి కారిడార్ నుంచి డక్ట్‌లోకి దూకినట్లు పోలీసులు భావిస్తున్నారు. ఘటన తర్వాత తల్లీబిడ్డ మరణించినట్లు గుర్తించారు.

భర్త మళ్లీ పెళ్లి చేసుకోవాలని లేఖ..

ఈ కేసులో ఏక్తా రాసినట్లు భావిస్తున్న లేఖను పోలీసులు స్వాధీనం చేసుకున్నారు. ఇందులో తన భర్త పట్ల ఉన్న భావాలను వ్యక్తం చేయడంతో పాటు, తన మరణం తర్వాత భర్త మరో పెళ్లి చేసుకుని కొత్త జీవితాన్ని ప్రారంభించాలని కోరినట్లు తెలుస్తోంది. తాను లేకపోతే, తన కుమారుడు తన గురించి పదేపదే అడిగితే భర్తకు ఎలాంటి పరిస్థితి ఎదురవుతుందో అనే భయాన్ని ఆమె లేఖలో వ్యక్తపరించింది. అందుకు తనతో పాటే తన కుమారుడిని కూడా తీసుకెళ్లాలని నిర్ణయించుకున్నట్లు లేఖలో పేర్కొంది. పిల్లవాడు ఉంటే మళ్లీ పెళ్లికి కష్టమవుతుందని రాసినట్లు సమాచారం.

కొన్నేళ్లుగా వెన్నుముక సమస్యతో బాధపడుతున్న ఏక్తా..

ప్రాథమిక నివేదికల ప్రకారం.. కొన్నేళ్లుగా ఏక్తా వెన్నెముక సంబంధిత సమస్యతో బాధపడుతున్నట్లు తెలిసింది. ఆమె దీని కోసం వివిధ ఆస్పత్రుల్లో చికిత్స తీసుకుంటోంది. అయితే, ఎన్నో ఆస్పత్రులకు వెళ్లినప్పటికీ ఈ సమస్యకు పరిష్కారం లభించలేదు. తన దీర్ఘకాలిక ఆరోగ్య సమస్యల్ని కూడా ఏక్తా సూసైడ్ నోట్‌లో ప్రస్తావించింది. ఈ ఘటనపై వాకడ్ పోలీస్ స్టేషన్ అధికారులు దర్యాప్తు చేస్తున్నారు. దీనిని యాక్సిడెంటల్ డెత్ రిపోర్ట్‌గా నమోదు చేశారు.