Spirit: ‘స్పిరిట్’ ఫాన్స్’కి బ్యాడ్ న్యూస్?

టాలీవుడ్ రెబల్ స్టార్ ప్రభాస్ ప్రస్తుతం వరుస పాన్ ఇండియా ప్రాజెక్టులతో ఫుల్ బిజీగా ఉన్నా, ఆయన లైనప్‌లో అత్యంత ఆసక్తి రేకెత్తిస్తున్న చిత్రం ‘స్పిరిట్’. సెన్సేషనల్ డైరెక్టర్ సందీప్ రెడ్డి వంగ దర్శకత్వంలో తెరకెక్కుతున్న ఈ సినిమాపై అంచనాలు ఆకాశాన్ని తాకుతున్నాయి. తాజాగా ఈ సినిమా విడుదల తేదీకి సంబంధించి ఒక ఆసక్తికరమైన వార్త ఫిల్మ్ నగర్ వర్గాల్లో హాట్ టాపిక్ గా మారింది. నిజానికి ‘స్పిరిట్’ షూటింగ్ ప్రస్తుతం తాత్కాలికంగా నిలిచిపోయింది. ప్రభాస్ ఇప్పటికే కొన్ని కీలక సన్నివేశాల్లో నటించినప్పటికీ, తన మిగతా ప్రాజెక్టుల వల్ల ఈ నిర్ణయం తీసుకున్నట్లు తెలుస్తోంది. ముఖ్యంగా హను రాఘవపూడి దర్శకత్వంలో వస్తున్న ‘ఫౌజీ’ షూటింగ్‌లో ప్రభాస్ బిజీగా ఉండటం ఒక కారణమైతే, ‘కల్కి 2898 AD’ సీక్వెల్ కోసం డేట్స్ కేటాయించాల్సి రావడం మరో కారణం. ‘కల్కి 2’లో అమితాబ్ బచ్చన్‌తో కలిసి నటించే కాంబో సీన్స్ చిత్రీకరణ కోసం ప్రభాస్ ప్రాధాన్యత ఇస్తున్నట్లు సమాచారం.

నిజానికి మేకర్స్ ఈ సినిమాను మార్చి 2027లో విడుదల చేయాలని తొలుత ప్లాన్ చేశారు. కానీ షూటింగ్ ఆలస్యం అవుతుండటంతో విడుదల తేదీ మారే అవకాశం కనిపిస్తోంది. అయితే ఇక్కడే సందీప్ వంగ ఒక మాస్ ప్లాన్ వేశారు. తన గత చిత్రం ‘యానిమల్’ బాక్సాఫీస్ వద్ద ఏ రేంజ్‌లో విధ్వంసం సృష్టించిందో అందరికీ తెలిసిందే. ఆ సినిమా విడుదలైన **డిసెంబర్ 1**వ తేదీనే ‘స్పిరిట్’ను కూడా రిలీజ్ చేయాలని ఆయన భావిస్తున్నారట. “డిసెంబర్ 1వ తేదీ సందీప్ వంగకు బాగా కలిసి వచ్చిన తేదీ. అందుకే అదే డేట్‌ను ప్రభాస్ సినిమా కోసం లాక్ చేయాలని చూస్తున్నారు.” అని టాలీవుడ్ వర్గాల్లో చర్చ జరుగుతోంది. ప్రభాస్ ఒక పవర్ ఫుల్ పోలీస్ ఆఫీసర్‌గా కనిపిస్తున్న ఈ సినిమా కోసం అభిమానులు వెయ్యి కళ్లతో ఎదురుచూస్తున్నారు. మరి జక్కన్న వారసుడిగా పేరు తెచ్చుకున్న వంగ, ప్రభాస్‌ను ఏ రేంజ్‌లో చూపిస్తారో చూడాలి!