ICC: ఐసీసీ సంచలన నిర్ణయం.. ఆ పాకిస్థాన్ స్టార్‌పై నిషేధం.. ఎందుకంటే..?

ICC: పాకిస్తాన్ లెఫ్ట్ ఆర్మ్ స్పిన్నర్ మహ్మద్ నవాజ్ ఐసీసీ (ICC) యాంటీ డోపింగ్ నిబంధనలను ఉల్లంఘించినందుకు గానూ మూడు నెలల నిషేధానికి గురయ్యాడు. అయితే ఆయన ఒక డ్రగ్ అబ్యూజ్ ట్రీట్‌మెంట్ ప్రోగ్రామ్ పూర్తి చేస్తే ఈ నిషేధ కాలాన్ని ఒక నెలకు తగ్గిస్తామని ఐసీసీ మీడియా ప్రకటన ద్వారా వెల్లడించింది. వాస్తవానికి.. 2026 ఫిబ్రవరి 7న శ్రీలంకలోని కొలంబోలో నెదర్లాండ్స్‌తో జరిగిన ఐసీసీ పురుషుల టీ20 వరల్డ్ కప్ మ్యాచ్ ముగిసిన తర్వాత 32 ఏళ్ల మహ్మద్ నవాజ్‌కు డోపింగ్ పరీక్షలు నిర్వహించారు. ఈ పరీక్షల్లో అతను నిషేధిత పదార్థం అయిన ‘కార్బాక్సీ-టిహెచ్‌సి’ (Carboxy-THC) పాజిటివ్‌గా తేలింది. దీనిపై స్పందించిన నవాజ్, తాను తప్పు చేసినట్లు అంగీకరించాడు. అయితే ఈ పదార్థాన్ని తాను మ్యాచ్‌లు లేని సమయంలో (అవుట్-ఆఫ్-కాంపెటీషన్) తీసుకున్నానని, ఆటకు లేదా తన ప్రదర్శనకు దీనికి ఎలాంటి సంబంధం లేదని అతను నిరూపించుకోగలిగాడు.

నవాజ్ తన తప్పును ఒప్పుకోవడంతో పాటు.. మే 1, 2026 నుంచి స్వచ్ఛందంగా తాత్కాలిక సస్పెన్షన్‌లోకి వెళ్లాడు. దీంతో అతని మూడు నెలల నిషేధ కాలాన్ని మే 1 నుంచే అమలు చేసినట్లు ఐసీసీ పరిగణించింది. నిబంధనల ప్రకారం అతను వ్యసన విముక్తి కార్యక్రమానికి హాజరు కావడానికి అంగీకరించడంతో ఇప్పటికే రెండున్నర నెలల సస్పెన్షన్ కాలాన్ని పూర్తి చేసుకున్న నవాజ్‌పై ఉన్న తాత్కాలిక సస్పెన్షన్‌ను ఐసీసీ ఎత్తివేసింది. ఐసీసీ సంతృప్తి చెందేలా సదరు ట్రీట్‌మెంట్ ప్రోగ్రామ్‌ను నవాజ్ పూర్తి చేస్తే.. అతను భవిష్యత్తులో ఎలాంటి అదనపు నిషేధ కాలాన్ని ఎదుర్కోవాల్సిన అవసరం ఉండదు. అయితే, ఐసీసీ యాంటీ డోపింగ్ నిబంధనల ప్రకారం.. ఫిబ్రవరి 7న నెదర్లాండ్స్‌తో జరిగిన మ్యాచ్‌తో పాటు, ఆ తర్వాత మే 1, 2026 వరకు నవాజ్ ఆడిన అన్ని మ్యాచ్‌ల రికార్డులను, గణాంకాలను ఐసీసీ రద్దు (డిస్క్వాలిఫై) చేసింది.