Pakistan Afghanistan Conflict: అర్ధరాత్రి ఆఫ్గానిస్థాపై పాకిస్థాన్ ఎయిర్‌స్ట్రైక్స్.. ఇళ్లపై బాంబులు వర్షం..!

Pakistan Afghanistan Conflict: పాకిస్థాన్ వాయుసేన తూర్పు ఆఫ్గానిస్థాన్‌పై అర్ధరాత్రి వేళ విరుచుకుపడింది. సరిహద్దులకు సమీపంలో ఉన్న కునార్, పక్తికా ప్రాంతాలపై పాక్ యుద్ధ విమానాలు బాంబుల వర్షం కురిపించాయి. కునార్ ప్రావిన్స్‌లోని నూర్గల్ జిల్లాలో గల పతంగ్ అనే ప్రాంతంలో రాత్రి సుమారు 3:30 గంటల సమయంలో ఈ దాడి జరిగింది. చాలా తక్కువ ఎత్తులో దూసుకొచ్చిన పాక్ జెట్ విమానాలు పౌరుల ఇళ్లపై బాంబులు జార విడచడంతో స్థానికులు తీవ్ర భయాందోళనలకు గురయ్యారు. ముఖ్యంగా నూర్గల్ జిల్లాలో నివసిస్తున్న నూర్ మహమ్మద్ అనే సాధారణ పౌరుడి ఇంటిని లక్ష్యంగా చేసుకుని ఈ దాడి జరిగినట్లు తెలుస్తోంది. బాంబుల తాకిడికి ఆ ఇల్లు పూర్తిగా కూలిపోయి మట్టిదిబ్బలా మారిపోయింది.

తీవ్రంగా గాయపడిన పలువురిని ఆస్పత్రికి తరలించారు. దాడి జరిగిన సమయంలో ఇంట్లో ఎంతమంది ఉన్నారు, అసలు ఎంతమందికి గాయాలయ్యాయి, ఎంత మేర నష్టం వాటిల్లిందనే విషయాలపై స్పష్టత రావాల్సి ఉంది. సంఘటనా స్థలంలో స్థానికులు పేలిపోయిన బాంబుల శకలాలను సేకరించారు. ఇక, గత కొంతకాలంగా పాకిస్థాన్, ఆఫ్గానిస్థాన్ మధ్య సరిహద్దుల్లో తీవ్ర ఉద్రిక్త పరిస్థితులు నెలకొన్నాయి. ఈ ఉద్రిక్తతల నడుమే పాకిస్థాన్ ఈ కొత్త దాడికి పాల్పడటం గమనార్హం. అర్ధరాత్రి వేళ ప్రజలంతా తమ ఇళ్లల్లో ప్రశాంతంగా నిద్రపోతున్న సమయంలో జరిగిన ఈ హఠాత్ పరిణామంతో అఫ్గాన్ సరిహద్దు గ్రామాల్లో భయానక వాతావరణం నెలకొంది. ఈ వైమానిక దాడిలో జరిగిన పూర్తి నష్టం, ప్రాణనష్టం వివరాలు ఇంకా తెలియాల్సి ఉంది.