సార్వత్రిక ఎన్నికల్లో భాగంగా పోలింగ్ ముగిసిన 48 గంటల్లోగా కచ్చితమైన పోలింగ్ శాతం వివరాలను తెలిపేలా ఆదేశించాలని కోరుతూ.. అసోసియేషన్‌ ఫర్‌ డెమోక్రటిక్‌ రిఫామ్స్‌ (ఏడీఆర్‌) సుప్రీంకోర్టులో పిటిషన్‌ దాఖలు చేసింది. ఆ పోలింగ్ వివరాలు ఈసీ తన వెబ్‌సైట్‌లో అప్‌లోడ్‌ చేసేలా చూడాలని పేర్కొంది. ప్రజాస్వామ్య ప్రక్రియలో తారుమారు చేసే పద్ధతులు ఉండకూడదని అభిప్రాయపడింది. సాధారణంగా ఎన్నికల సంఘం పోలింగ్ రోజే సాయంత్రం ఆ రోజు ఎంత శాతం ఓటింగ్ నమోదైందన్న వివరాలు విడుదల చేస్తుంది.
READ MORE: Ram Pothineni : కన్ఫ్యూషన్ లో రామ్.. తన నెక్స్ట్ సినిమా ఎవరితో అంటే..?
కాని.. కచ్చితమైన పోలింగ్ శాతాన్ని చాలా రోజుల సమయం తర్వాత విడుదల చేస్తోంది. అంతలోపు ఏమైనా జరగొచ్చని అభిప్రాయ పడింది. ప్రస్తుత లోక్‌సభ ఎన్నికలనే తీసుకుంటే.. ఏప్రిల్ 19న తొలి దశ ఎన్నికలు పూర్తవ్వగా, ఆ రోజు సాయంత్రం ప్రాథమికంగా పోలింగ్ శాతాన్ని వెల్లడించింది. ఆ తర్వాత 11 రోజులకు (ఏప్రిల్ 30)న తుది పోలింగ్ శాతాన్ని తెలిపింది. రెండో సారి తెలిపిన వివరాల్లో మార్పులు సంభవించాయి. ఏప్రిల్ 19న చెప్పిన శాతం కంటే.. 30న చెప్పినది 5-6 శాతం ఎక్కువ ఉండటం గమనార్హం. దీంతో రెండ్రోజుల్లోనే కచ్చితమైన వివరాలు తెలిపేలా చర్యలు తీసుకోవాలని అసోసియేషన్‌ ఫర్‌ డెమోక్రటిక్‌ రిఫామ్స్‌ (ఏడీఆర్‌) కోర్టును కోరింది.