Balakrishna: పారితోషికంలో నిర్మాతల కోసం.. బాలయ్య స్ట్రాంగ్ డిసిషన్

నందమూరి బాలకృష్ణ అంటే కేవలం సిల్వర్ స్క్రీన్ పై గర్జించే సింహం మాత్రమే కాదు, నిర్మాతల కష్టాలను అర్థం చేసుకునే గొప్ప మనసున్న వ్యక్తి అని మరోసారి నిరూపితమైంది. ప్రస్తుతం టాలీవుడ్‌లో టాప్ హీరోలు తమ రెమ్యునరేషన్లను కోట్లకు కోట్లు పెంచుకుంటూ పోతుంటే, బాలయ్య మాత్రం అందుకు భిన్నంగా తన పారితోషికాన్ని తగ్గించుకుని అందరినీ ఆశ్చర్యపరిచారు. గతేడాది డిసెంబర్‌లో విడుదలైన ‘అఖండ-2’ బాక్సాఫీస్ వద్ద మంచి వసూళ్లను రాబట్టినప్పటికీ, భారీ బడ్జెట్ (రూ. 120-125 కోట్లు) కారణంగా నిర్మాతలు ఆశించిన స్థాయిలో లాభాలను అందుకోలేకపోయారు. ఈ విషయాన్ని గమనించిన బాలయ్య, తన తదుపరి చిత్రంపై ఆ భారం పడకూడదని నిర్ణయించుకున్నారు.

‘అఖండ-2’ కోసం రూ. 40 కోట్లు తీసుకున్న బాలయ్య, గోపీచంద్ మలినేని దర్శకత్వంలో తెరకెక్కుతున్న #NBK111 చిత్రం కోసం కేవలం రూ. 30 కోట్లే తీసుకుంటున్నారట. ఒక్క సినిమాకే దాదాపు రూ. 10 కోట్ల పారితోషికాన్ని తగ్గించుకోవడం అంటే సామాన్యమైన విషయం కాదు. నిర్మాత శ్రేయస్సు కోరి ఆయన తీసుకున్న ఈ నిర్ణయంపై ఇండస్ట్రీలో ప్రశంసలు వెల్లువెత్తుతున్నాయి. ఈ వార్త బయటకు రావడంతో సోషల్ మీడియాలో నందమూరి అభిమానులు #JaiBalaiah అంటూ ట్రెండ్ చేస్తున్నారు. “మా బాలయ్య బంగారం.. నిర్మాతలను కాపాడే రియల్ హీరో” అంటూ కామెంట్లతో హోరెత్తిస్తున్నారు. సినిమా రిజల్ట్ తో సంబంధం లేకుండా రెమ్యునరేషన్ డిమాండ్ చేసే హీరోలు ఉన్న ఈ కాలంలో, బాలయ్య వ్యవహరించిన తీరు ఆదర్శప్రాయమని విశ్లేషకులు చెబుతున్నారు.