Muslim CM Demand: యూపీకి ముస్లిం సీఎం కావాలి.. అఖిలేష్‌కు షహబుద్దీన్ అల్టిమేటం..

Muslim CM Demand: ఉత్తర్ ప్రదేశ్ అసెంబ్లీ ఎన్నికలకు రాజకీయ పార్టీలు సిద్ధమవుతున్న వేళ కొత్త డిమాండ్ తెర పైకి వచ్చింది. సమాజ్‌వాదీ పార్టీ(ఎస్పీ)పై మౌలానా షహబుద్దీన్ తీవ్ర విమర్శలు చేశారు. పార్టీ తరుఫున ముఖ్యమంత్రి అభ్యర్థిగా ముస్లిం నేతను ప్రకటించాలని డిమాండ్ చేశారు. 150 అసెంబ్లీ స్థానాల్లో ముస్లిం నేతల్ని బరిలోకి దించాలని కోరారు. తన డిమాండ్లపై అఖిలేస్ యాదవ్ స్పందించేందుకు 30 రోజులు టైమ్ ఇచ్చినట్లు చెప్పారు. ఉత్తర్ ప్రదేశ్‌లో ముస్లింలు, యాదవుల కన్నా ఎక్కువ ఉన్నారని, అలాంటప్పుడు అఖిలేష్ యాదవ్ ముఖ్యమంత్రి అభ్యర్థిగా ఎందుకు ఉండాలని ప్రశ్నించారు.

రాష్ట్రంలో ముస్లింలు 22 శాతం, యాదవులు కేవలం 7 శాతం ఉన్నారు, అలాంటప్పుడు అఖిలేష్ ఎందుకు సీఎం అభ్యర్థి..? అంటూ ప్రశ్నించారు. తన డిమాండ్లపై అఖిలేష్ స్పందించడం లేదని, తన ప్రశ్నలకు సమాధానం ఇవ్వడం లేదని షహబుద్దీన్ అన్నారు. ఇదే కాకుండా, ఎస్పీకి చెందిన పలువురు నేతలు వక్ఫ్ ఆస్తుల్లో అవినీతి చేస్తున్నారని ఆరోపించారు. ఈ అంశంపై కూడా ఎస్పీ చీఫ్‌ను ప్రశ్నించినా సమాధానం రాలేదని ఆరోపించారు. రాష్ట్రంలో 150 అసెంబ్లీ నియోజకవర్గాల్లో ముస్లింలు గణనీయమైన సంఖ్యలో ఉన్నారని అన్నారు. 30 రోజుల్లో తమ డిమాండ్లను అంగీకరించకపోతే అఖిలేష్‌కు వ్యతిరేకంగా ప్రచారం చేస్తామని హెచ్చరించారు.