Nani: నాని దర్శకత్వంలో సినిమా? హీరో కాకముందే పూర్తి స్క్రిప్ట్ రాసిపెట్టుకున్న న్యాచురల్ స్టార్!

Nani: న్యాచురల్ స్టార్ నాని కేవలం హీరోగానే కాకుండా తనదైన కథల ఎంపికతో టాలీవుడ్‌లో ప్రత్యేక గుర్తింపు తెచ్చుకున్నారు. పరిశ్రమలోకి నటుడిగా అడుగుపెట్టడానికి ముందే ఆయన డైరెక్షన్ డిపార్ట్‌మెంట్‌లో అసిస్టెంట్ డైరెక్టర్‌గా పనిచేసిన సంగతి తెలిసిందే. అయితే ఆ సమయంలోనే ఆయన స్వయంగా ఒక పవర్‌ఫుల్ యాక్షన్ స్టోరీని సిద్ధం చేసుకున్నారనే ఆసక్తికర విషయాన్ని తాజాగా బయటపెట్టారు. శ్రీకాంత్ ఓదెల డైరెక్షన్‌లో నాని, కయాదు లోహర్ జంటగా నటించిన ది ప్యారడైజ్ సినిమా ప్రమోషన్ల సందర్భంగా జరిగిన ప్రత్యేక ఇంటర్వ్యూలో నాని తన పాత జ్ఞాపకాలను నెమరువేసుకున్నారు.

తాను అసిస్టెంట్ డైరెక్టర్‌గా పనిచేస్తున్న రోజుల్లోనే సొంతంగా ఒక పూర్తి స్థాయి బౌండ్ స్క్రిప్ట్ రాసుకున్నానని వెల్లడించారు. అంతేకాకుండా ఆ కథకు ‘24’ అనే టైటిల్‌ను కూడా అప్పట్లోనే ఫిక్స్ చేసినట్లు పేర్కొన్నారు. “ఆ స్క్రిప్ట్ మొత్తం నా దగ్గరే భద్రంగా ఉంది. పూర్తి స్థాయి యాక్షన్ కథతో దాన్ని సిద్ధం చేసుకున్నాను” అని నాని అన్నారు. ‘రిటన్ అండ్ డైరెక్టెడ్ బై నాని’గా ఎప్పుడైనా ఆ చిత్రాన్ని తెరకెక్కిస్తారా అనే ప్రస్తావన రాగా, ఇప్పుడు కాదని, నిజంగా ఆ స్క్రిప్ట్ ఎవరైనా ఫిల్మ్ మేకర్‌కి నచ్చి చేస్తానంటే చాలా బాగుంటుందని అన్నారు. ‘నేను 18 ఏళ్లప్పుడు రాసుకున్న ఆ స్టోరీని ఇప్పుడు కొన్ని మార్పులు చేసి వాడుకోవచ్చు’ అని వెల్లడించారు. ప్రస్తుతం తన డైరెక్షన్‌లో ఆ సినిమా గురించి ఆలోచించడం లేదని స్పష్టం చేశారు. నాని కథ రాసిపెట్టుకున్న విషయం తెలియడంతో అభిమానులు సైతం ఆశ్చర్యం వ్యక్తం చేస్తున్నారు. భవిష్యత్తులో ఎప్పటికైనా నాని మెగాఫోన్ పట్టి ఆ ‘24’ కథను తెరపైకి తీసుకొస్తే చూడాలని సినీ ప్రియులు ఆసక్తి చూపుతున్నారు.