Mumbai Indians: ఎంఐలో సంచలన మార్పులు.. బ్యాటింగ్ కోచ్‌గా ఉత్తప్ప.. మలింగ స్థానంలో మిచెల్, కొత్త కోచింగ్ స్టాఫ్‌ ఇదే..

Mumbai Indians: ఐపీఎల్‌ 2027 కప్‌ను ఎలాగైనా కైవసం చేసుకోవాలని ముంబై ఇండియన్స్ కంకణం కట్టుకుంది. ఇందు కోసం.. ఐదుసార్లు ఛాంపియన్ అయిన ముంబై తమ కోచింగ్ స్టాఫ్‌లో సంచలన మార్పులు చేసింది. జట్టు కొత్త బ్యాటింగ్ కోచ్‌గా భారత మాజీ క్రికెటర్ రాబిన్ ఉత్తప్పను నియమించింది. ఐపీఎల్‌లో ప్లేయర్‌గా సుదీర్ఘ అనుభవం ఉన్న ఉత్తప్ప, గతంలో కోల్‌కతా నైట్ రైడర్స్‌తో కలిసి ట్రోఫీ కూడా గెలిచారు. అయితే కోచ్‌గా ఆయనకు ఇది తొలి అసైన్‌మెంట్ కావడం విశేషం. దీనికి ముందే హెడ్ కోచ్‌గా ఉన్న మహేళ జయవర్ధనే స్థానంలో కీరన్ పొలార్డ్‌ను ఆ బాధ్యతల్లోకి ప్రమోట్ చేసిన సంగతి తెలిసిందే.

ఈ లీగ్ మొదటి సీజన్ (2008)లో ముంబై ఇండియన్స్ తరఫున ఆడిన రాబిన్ ఉత్తప్ప, మళ్లీ ఇన్ని సంవత్సరాల తర్వాత అదే ఫ్రాంచైజీకి బ్యాటింగ్ కోచ్‌గా తిరిగొచ్చారు. ఇక బౌలింగ్ విభాగానికి వస్తే, లసిత్ మలింగ స్థానంలో న్యూజిలాండ్ మాజీ ఫాస్ట్ బౌలర్ మిచెల్ మెక్‌క్లెనగన్ (Mitchell McClenaghan)కు బాధ్యతలు అప్పగించారు. ఈయన 2015 నుంచి 2020 వరకు ఎంఐతో అనుబంధం కలిగి ఉన్నారు. జట్టు నాలుగు సార్లు విజేతగా నిలవడంలో కీలక పాత్ర పోషించారు. భారత జట్టు మాజీ ఫీల్డింగ్ కోచ్ టి. దిలీప్‌ను ఫీల్డింగ్ కోచ్‌గా, ముంబై మాజీ పేసర్ ధవల్ కులకర్ణిని డెవలప్‌మెంట్ బౌలింగ్ కోచ్‌గా నియమించారు. కులకర్ణి కూడా గతంలో ఎంఐ ప్లేయర్‌గా 2013, 2020 ట్రోఫీ విజయాలలో భాగస్వామిగా ఉన్నారు.

గత కొన్ని సీజన్లుగా ఆశించిన స్థాయిలో రాణించలేక తీవ్రంగా శ్రమిస్తున్న ముంబై ఇండియన్స్, ఈ వరుస వైఫల్యాల వల్లే కోచింగ్ సిబ్బందిపై కఠిన నిర్ణయం తీసుకున్నట్లు కనిపిస్తోంది. ఇందులో భాగంగానే హెడ్ కోచ్ మహేళ జయవర్ధనేతో పాటు బౌలింగ్ కోచ్‌లు లసిత్ మలింగ, పారస్ మాంబ్రే, అలాగే ఫీల్డింగ్ కోచ్ కార్ల్ హాప్‌కిన్సన్‌లపై వేటు పడింది. ముంబై ఇండియన్స్ ఫ్రాంచైజీకి తమ మాజీ ఆటగాళ్లను గౌరవించే సుదీర్ఘమైన సంప్రదాయం ఉంది. జట్టు కోసం మైదానంలో అత్యుత్తమ సేవలు అందించిన క్రీడాకారులను సగౌరవంగా వీడ్కోలు పలకడానికి, వారిని రిటైర్ చేయించి కోచ్‌లుగా నియమిస్తుంటుంది. అలా వారి అనుభవాన్ని కొత్త తరం ఆటగాళ్లను తీర్చిదిద్దడానికి ఉపయోగిస్తుంది. ఈ క్రమంలోనే లసిత్ మలింగ ఎంఐ చరిత్రలోనే సర్వకాలీన అత్యుత్తమ బౌలర్లలో ఒకరిగా నిలిచిపోనున్నారు. ఆటగాడిగా జట్టుకు నాలుగు ఐపీఎల్ టైటిళ్లు అందించడంతో పాటు 2011 ఛాంపియన్స్ లీగ్ టీ20 విజయంలోనూ కీలక పాత్ర వహించారు.