INDIA Bloc Rally: ఢిల్లీలో 20 లక్షల మంది వ్యాపారుల్లో ఆందోళన.. INDIA కూటమి ర్యాలీపై సోనియా గాంధీకి లేఖ

INDIA Bloc Rally: నవంబర్ 1న ఢిల్లీలోని రామ్‌లీలా మైదానంలో జరగనున్న INDIA కూటమి ర్యాలీపై వ్యాపార సంఘాలు ఆందోళన వ్యక్తం చేస్తున్నాయి. పండుగల సీజన్‌లో భారీ ర్యాలీ నిర్వహిస్తే వ్యాపార కార్యకలాపాలు నిలిచిపోయే ప్రమాదం ఉందని, ర్యాలీని దీపావళి తర్వాతకు వాయిదా వేయాలని కోరుతున్నాయి. దేశ రాజధాని ఢిల్లీలో నవంబర్ 1న జరగనున్న INDIA కూటమి భారీ ర్యాలీ రాజకీయంగానే కాకుండా వ్యాపార వర్గాల్లోనూ చర్చనీయాంశంగా మారింది.

ఈ ర్యాలీ కారణంగా అక్టోబర్ 31, నవంబర్ 1 తేదీల్లో వ్యాపార కార్యకలాపాలకు తీవ్ర అంతరాయం కలగవచ్చని చాంబర్ ఆఫ్ ట్రేడ్ అండ్ ఇండస్ట్రీ (CTI) ఆందోళన వ్యక్తం చేసింది. ఈ మేరకు కాంగ్రెస్ మాజీ అధ్యక్షురాలు సోనియా గాంధీకి లేఖ రాసింది. ఢిల్లీలో సుమారు 20 లక్షల మంది వ్యాపారులు ఈ పరిస్థితిపై ఆందోళనలో ఉన్నారని CTI పేర్కొంది. ర్యాలీ నిర్వహణతో రవాణా వ్యవస్థపై ఒత్తిడి పెరిగి, హోల్‌సేల్ మార్కెట్లకు సరుకుల రవాణా నిలిచిపోయే అవకాశం ఉందని తెలిపింది.

CTI ఛైర్మన్ బ్రిజేష్ గోయల్ తెలిపిన వివరాల ప్రకారం.. ర్యాలీ జరగనున్న రామ్‌లీలా మైదానం చుట్టూ ఐదు కిలోమీటర్ల పరిధిలో సుమారు 20 ప్రధాన హోల్‌సేల్ మార్కెట్లు ఉన్నాయి. ఈ మార్కెట్ల నుంచి ప్రతిరోజూ దేశంలోని వివిధ ప్రాంతాలతో పాటు విదేశాలకు కూడా కోట్ల రూపాయల విలువైన సరుకులు రవాణా అవుతుంటాయి. ర్యాలీకి సుమారు 10 లక్షల మంది హాజరవుతారని ప్రచారం జరుగుతోందని, అయితే రామ్‌లీలా మైదానం సామర్థ్యం కేవలం 50 వేల మంది మాత్రమేనని బ్రిజేష్ గోయల్ పేర్కొన్నారు. ఈ స్థాయిలో జనసమీకరణ జరిగితే రవాణా సహా నగరంలోని మౌలిక సదుపాయాలపై తీవ్ర ప్రభావం పడే ప్రమాదం ఉందని ఆయన ఆందోళన వ్యక్తం చేశారు. గత 25 రోజుల్లోనే ఢిల్లీలోని వ్యాపార రంగానికి సుమారు రూ.3,000 కోట్ల నష్టం వాటిల్లిందని CTI అంచనా వేసింది. నవంబర్ 1 ర్యాలీ వల్ల మరో రూ.10,000 కోట్ల వరకు నష్టం కలగవచ్చని పేర్కొంది.

దీపావళి తర్వాత ర్యాలీ నిర్వహించాలని విజ్ఞప్తి

CTIతో పాటు మరికొన్ని వ్యాపార సంఘాలు కూడా INDIA కూటమి నాయకత్వానికి విజ్ఞప్తి చేశాయి. దీపావళి పండుగ ముగిసిన తర్వాత ర్యాలీ నిర్వహించేలా కాంగ్రెస్ నాయకత్వంతో మాట్లాడాలని కోరాయి. ఫెడరేషన్ ఆఫ్ సదర్ బజార్ ట్రేడర్స్ అసోసియేషన్, కిరాణా కమిటీ ఢిల్లీ వంటి సంఘాలు కూడా ఈ అంశంపై ఆందోళన వ్యక్తం చేశాయి. పండుగల సమయంలో వ్యాపారాలు పుంజుకునే అవకాశం ఉంటుందని, ఇలాంటి సమయంలో భారీ ర్యాలీలు, ట్రాఫిక్ ఆంక్షలు విధిస్తే వ్యాపారులకు నష్టం తప్పదని తెలిపాయి. ఈ మేరకు సమాజ్‌వాదీ పార్టీ నేత అఖిలేశ్ యాదవ్, తృణమూల్ కాంగ్రెస్ అధినేత్రి మమతా బెనర్జీలకు కూడా లేఖలు రాసినట్లు సమాచారం. ఈ రెండు పార్టీలూ INDIA కూటమిలో భాగంగా ఉన్నాయి.

ధన్‌తేరస్ నుంచి దీపావళి వరకు ఢిల్లీలో సుమారు రూ.25,000 కోట్ల విలువైన వ్యాపారం జరుగుతుందని వ్యాపార సంఘాలు తమ లేఖల్లో పేర్కొన్నాయి. సెప్టెంబర్, అక్టోబర్ నెలల్లో జరిగిన నిరసనలు, ర్యాలీలు, ట్రాఫిక్ ఆంక్షల కారణంగా ఇప్పటికే సుమారు రూ.3,000 కోట్ల నష్టం వాటిల్లిందని తెలిపాయి. ఇప్పుడు పండుగల సీజన్‌లో మరో భారీ జనసమీకరణ జరిగితే అదనంగా రూ.10,000 కోట్ల వరకు నష్టం కలగవచ్చని అంచనా వేశాయి. రామ్‌లీలా మైదాన్‌కు ఐదు కిలోమీటర్ల పరిధిలో సదర్ బజార్, ఖారీ బావోలీ, చాందినీ చౌక్ వంటి ప్రముఖ హోల్‌సేల్, రిటైల్ మార్కెట్లు ఉన్నాయని గుర్తుచేశాయి. రాజకీయ కార్యక్రమాలను మరో తేదీకి మార్చుకోవచ్చని, కానీ ఏడాదిలో అత్యంత కీలకమైన పండుగల వ్యాపార సీజన్‌లో అమ్మకాలు కోల్పోతే వ్యాపారులు తీవ్రంగా నష్టపోతారని సంఘాలు పేర్కొన్నాయి. నవంబర్ 8న దీపావళి ముగిసిన తర్వాత ర్యాలీ నిర్వహించాలని కోరాయి.

ఇదిలా ఉండగా, ఓటర్ల జాబితాల ప్రత్యేక సమగ్ర సవరణ (SIR) ప్రక్రియలో అవకతవకలు జరిగాయన్న ఆరోపణల నేపథ్యంలో ప్రధాన ఎన్నికల కమిషనర్ జ్ఞానేశ్ కుమార్‌పై INDIA కూటమి అక్టోబర్ 30న కార్యక్రమం నిర్వహించనుంది. కాంగ్రెస్ అధ్యక్షుడు మల్లికార్జున ఖర్గే నివాసంలో ఈ కార్యక్రమం జరగనున్నట్లు సమాచారం. ఈ కార్యక్రమం అనంతరం ‘ఓట్ చోరీ’కి వ్యతిరేకంగా ‘ఢిల్లీ చలో మార్చ్’ చేపట్టి, నవంబర్ 1న రామ్‌లీలా మైదాన్‌లో భారీ ర్యాలీతో ముగించాలని కూటమి ప్రణాళిక రూపొందించింది. అయితే, ఈ ర్యాలీ వల్ల వ్యాపారాలు, రవాణా వ్యవస్థపై ప్రభావం పడుతుందన్న వ్యాపార సంఘాల ఆందోళనలపై కాంగ్రెస్ నాయకత్వం ఎలా స్పందిస్తుందో చూడాలి.