Ponnam Prabhakar: బడ్జెట్‌ను అడ్డుకోవడం అంటే.. హైదరాబాద్ అభివృద్ధిని అడ్డుకున్నట్టే!

గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) బడ్జెట్‌ను అడ్డుకోవడం అంటే హైదరాబాద్ అభివృద్ధిని అడ్డుకున్నట్టే అని హైదారాబాద్ ఇన్చార్జి, రవాణా మరియు బీసీ సంక్షేమ శాఖ మంత్రి అన్నారు. జీహెచ్ఎంసీ బడ్జెట్ సమావేశాలను అడ్డుకోవడం రాజ్యాంగాన్ని అపహస్యం చేయడమే అని పేర్కొన్నారు. బడ్జెట్ సమావేశాలు అడ్డుకోవడంపై బీఆర్ఎస్ నాయకత్వం జవాబు చెప్పాలని డిమాండ్ చేశారు. హైదరాబాద్ నగరంలో గత పది ఏళ్లలో లేని అభివృద్ది ఇప్పుడు జరుగుతుంటే ఈర్శగా ఉందా? అని మంత్రి పొన్నం విమర్శించారు.

జీహెచ్‌ఎంసీ కౌన్సిల్ సమావేశంలో రసాభాస నెలకొంది. బడ్జెట్‌ ఆమోదం తర్వాత ప్రజా సమస్యలపై చర్చించాలని బీఆర్ఎస్ పట్టుబట్టింది. ఈక్రమంలో కాంగ్రెస్‌, బీఆర్ఎస్ కార్పొరేటర్లకు మధ్య వాగ్వాదం జరిగింది. నలుగురు బీఆర్ఎస్ కార్పొరేటర్లను మార్షల్స్‌ బయటకు తీసుకెళ్లగా.. పోలీసులు వారిని అదుపులోకి తీసుకున్నారు. మిగతా బీఆర్ఎస్ కార్పొరేటర్లు మేయర్‌ పోడియాన్ని చుట్టుముట్టి క్షమాపణ చెప్పాలని డిమాండ్‌ చేశారు. అదుపులోకి తీసుకున్న కార్పొరేటర్లను తీసుకువచ్చి సభను నిర్వహించాలన్నారు. జీహెచ్ఎంసీ కౌన్సిల్ సమావేశంలో బీఆర్ఎస్ వ్యవహరించిన తీరుపై మంత్రి పొన్నం ప్రభాకర్ అసహనం వ్యక్తం చేశారు.

‘జీహెచ్‌ఎంసీ బడ్జెట్ సమావేశాలను బీఆర్ఎస్ అడ్డుకోవడం రాజ్యాంగాన్ని అపహస్యం చేయడమే. జీహెచ్ఎంసీ బడ్జెట్ హైదరాబాద్ అభివృద్ధికి సంబంధించిన అంశం. హైదరాబాద్ బ్రాండ్ ఇమేజ్ కాపాడడానికి సీఎం రేవంత్ రెడ్డి గారి నేతృత్వంలో ప్రజా పాలన ప్రభుత్వం శ్రద్ధతో పని చేస్తుంది. మేయర్‌పై అవిశ్వాసం పెట్టుకునే హక్కు అందరికీ ఉంది. అవిశ్వాసం ఎదుర్కోవడానికి కాంగ్రెస్ సిద్ధంగా ఉంది. బడ్జెట్‌ను అడ్డుకోవడం అంటే హైదరాబాద్ అభివృద్ధిని అడ్డుకున్నట్టే. బడ్జెట్ సమావేశాలు అడ్డుకోవడంపై బీఆర్ఎస్ నాయకత్వం జవాబు చెప్పాలి. హైదరాబాద్ నగరంలో గత 10 ఏళ్లుగా (తెలంగాణ ఏర్పడిన తరువాత) జరగని అభివృద్ది ఇప్పుడు జరుగుతుంది కాబట్టి దానిని నిరోధించే ప్రయత్నం చేస్తున్నారు. గతంలో లేని అభివృద్ది హైదరాబాద్లో ఇప్పుడు జరుగుతుంటే ఈర్శగా ఉందా?’ అని మంత్రి పొన్నం పేర్కొన్నారు.