బాలీవుడ్ నటి, మండీ నియోజకవర్గ బీజేపీ అభ్యర్థి కంగనా రనౌత్ ఎప్పుడూ వార్తల్లో నిలుస్తుంటారు. ఏదొక వివాదం సృష్టిస్తుంటారు. తాజాగా భారత తొలి ప్రధానిపై ఆమె చేసిన వ్యాఖ్యలు ఇప్పుడు సోషల్ మీడియాలో తీవ్ర దుమారం రేపుతున్నాయి. భారత తొలి ప్రధాని నేతాజీ సుభాష్ చంద్రబోస్ అంటూ ఆమె వ్యాఖ్యానించారు. ప్రస్తుతం ఈ వ్యాఖ్యలు నెట్టింట తెగ వైరల్ అవుతున్నాయి.
కంగనా రనౌత్ ఒక ఇంటర్వ్యూలో మాట్లాడారు. మనకు స్వాతంత్ర్యం వచ్చినప్పుడు తొలి ప్రధాని బోస్ ఎక్కడికి వెళ్లారు..? అంటూ ఆమె వ్యాఖ్యానించారు. దేశం కోసం పోరాడిన ఆయన్ను దేశంలోకి అడుగుపెట్టనివ్వలేదని అన్నారు. అయితే వ్యాఖ్యాత ఆమె మాటలను సరిచేశారు. కంగనా ప్రకటనపై సామాజిక మాధ్యమాల్లో విమర్శలు వ్యక్తం అవుతున్నాయి. ఇలాంటి వారి మాటలు తేలిగ్గా తీసుకోవద్దని, వీరంతా ఎక్కడ చదువుకున్నారంటూ విపక్ష నేతలు, నెటిజన్లు ఆగ్రహం వ్యక్తంచేశారు. ఆమె విద్యాశాఖ మంత్రి అయితే పరిస్థితి ఏంటో..? అంటూ కామెంట్లు పెట్టారు.
గతంలోనూ కంగనా ఇదే తరహా వ్యాఖ్యలు చేశారు. 2014లో మోడీ ప్రధాని అయిన తర్వాతే దేశానికి అసలైన స్వాతంత్య్రం వచ్చిందంటూ వ్యాఖ్యలు చేశారు. ఈ కామెంట్స్‌తో విమర్శల పాలయ్యారు. ఆమెపై దేశద్రోహం కేసు నమోదు చేయాలని అప్పట్లో పలువురు నేతలు డిమాండ్‌ చేశారు.
కంగనా రనౌత్ హిమాచల్ ప్రదేశ్‌లోని మండీ నియోజకవర్గం నుంచి బీజేపీ అభ్యర్థిగా బరిలోకి దిగుతున్నారు. ఇప్పటికే ఆమె ప్రచారం ప్రారంభించారు. ఒక నటిగా కాకుండా.. మీ బిడ్డగా తనను ఆదరించాలని ప్రజలను కోరుతున్నారు.
