Madhuranagar Police Arrested Jabardasth Artist Nava Sandeep: జబర్దస్త్ ఆర్టిస్ట్, గాయకుడు నవ సందీప్ అరెస్ట్ అయ్యాడు. మధురానగర్ పోలీసులు సందీప్‌ను అరెస్ట్ చేశారు. ప్రేమ పేరుతో యువతిని వంచించి.. లైంగికంగా వాడుకున్న ఆరోపణలపై సందీప్‌ను పోలీసులు అరెస్ట్ చేశారు. యువతి ఇచ్చిన పిర్యాదు మేరకే సందీప్ అరెస్ట్ అయ్యాడు. ప్రేమ పేరుతో సందీప్ తనను మోసం చేశాడంటూ మధురానగర్ పోలీసులకు ఇటీవల ఓ యువతి ఫిర్యాదు ఇచ్చిన విషయం తెలిసిందే.
2018లో ఓ యువతితో జబర్దస్త్ కమెడియన్ నవ సందీప్ పరిచయం పెంచుకున్నాడు. ఆమెతో ప్రతిరోజు వాట్సాప్ చాటింగ్ చేసేవాడు. ఆ క్రమంలో ఇద్దరి మధ్య పరిచయం ప్రేమగా మారింది. సందీప్ ఆ యువతిని ఊరి నుంచి హైదరాబాద్‌కు రప్పించాడు. సందీప్‌ను నమ్మిన ఆమె హైదరాబాద్‌ వచ్చి షేక్‌పేటలోని ఓ హాస్టల్‌లో నాలుగేళ్లుగా ఉంటోంది. త్వరలో పెళ్లి చేసుకుంటానని నమ్మించి.. సందీప్ తన కోరిక తీర్చుకున్నాడు.
యువతి పెళ్లి ప్రస్తావన తేగానే నవ సందీప్ ముఖం చాటేశాడు. ఆమెను దూరంగా పెట్టడం మొదలుపెట్టాడు. చివరకు తాను వేరొకరిని పెళ్లి చేసుకోబోతున్నానని చెప్పాడు. దీంతో తాను మోసపోయానని గ్రహించిన యువతి.. మధురానగర్ పోలీసులకు ఫిర్యాదు చేసింది. కేసు నమోదు చేసుకున్న పోలీసులు.. దర్యాప్తు చేపట్టి సందీప్‌ను అరెస్ట్ చేశారు. సందీప్ గోల్కొండ ప్రాంతంలో నివసిస్తున్నట్లు తెలిసింది.
Also Read: Varalakshmi Vratham 2023: వరాలనొసగే ‘వరలక్ష్మీ వ్రతం’ పూజా విధానం.. మీ భక్తి టీవీలో లైవ్‌‌లో చూడండి!
పాటలతో పాటు కామెడీతో నవ సందీప్ తనదైన స్థాయిలో గుర్తింపు తెచ్చుకున్నాడు. జబర్దస్త్ షోతో పాటు పలు టీవీ షోలలోనూ సందీప్ కనిపించాడు. శ్రీదేవి డ్రామా కంపెనీ, పటాస్‌ వంటి షోలలోనూ పాల్గొన్నాడు. సందీప్ ఓ అమ్మాయిని మోసం చేశాడని తెలిసిన నెటిజన్లు అతడిపై ఆగ్రహం వ్యక్తం చేస్తున్నారు.
