Israel Lebanon Ceasefire: బిగ్ రిలీఫ్.. కాల్పుల విరమణకు ఇజ్రాయెల్, లెబనాన్ గ్రీన్ సిగ్నల్!

Israel Lebanon Ceasefire: నెలల తరబడి ఇరు దేశాల సరిహద్దుల్లో కొనసాగుతున్న ఉద్రిక్తతలకు ముగింపు పలికేలా.. ఇజ్రాయెల్, లెబనాన్ దేశాలు కాల్పుల విరమణకు (Ceasefire) అంగీకరించాయి. వాషింగ్టన్‌లో జరిగిన కీలక చర్చల అనంతరం ఇరు దేశాలు ఈ నిర్ణయానికి వచ్చినట్లు అమెరికా బుధవారం ఓ సంయుక్త ప్రకటనలో వెల్లడించింది. ప్రాంతీయ శాంతి స్థాపన దిశగా ఇదొక కీలక అడుగు అని పేర్కొంది. అయితే, ఈ ఒప్పందం పూర్తిగా అమలు కావాలంటే ఇరాన్ మద్దతు ఉన్న హిజ్బుల్లా సాయుధ బృందం లెబనాన్ సరిహద్దుల నుంచి కాల్పులను పూర్తిగా నిలిపివేయాల్సి ఉంటుంది. అలాగే సౌత్ లిటాని సెక్టార్ (South Litani Sector) ప్రాంతం నుంచి హిజ్బుల్లాకు చెందిన శ్రేణులన్నీ పూర్తిగా వెనక్కి వెళ్లాలనే నిబంధనకు లోబడి ఈ ఒప్పందం కుదిరినట్లు ప్రకటన స్పష్టం చేసింది. నిజానికి గత నెలలోనే ఇరుపక్షాలు కాల్పుల విరమణకు అంగీకరించినప్పటికీ, క్షేత్రస్థాయిలో దాడులు మాత్రం ఆగలేదు.

ఈ ఏడాది మార్చిలో లెబనాన్‌లోని హిజ్బుల్లా లక్ష్యంగా ఇజ్రాయెల్ సైనిక చర్యను ఉద్ధృతం చేయడంతో ఇరు దేశాల మధ్య ఘర్షణలు తీవ్రరూపం దాల్చాయి. ప్రాంతీయ ఉద్రిక్తతల నేపథ్యంలో ఇరాన్ మద్దతుతో హిజ్బుల్లా ఇజ్రాయెల్ సరిహద్దులపై నిరంతరం దాడులు చేస్తూ వచ్చింది. అయితే, లెబనాన్‌లోనూ కాల్పుల విరమణ ప్రకటిస్తే తప్ప.. అమెరికా, ఇజ్రాయెల్‌లతో కూడిన ఎలాంటి శాంతి ఒప్పందాలకూ తాము మద్దతు ఇచ్చేది లేదని ఇరాన్ పట్టుబట్టింది. ఈ నేపథ్యంలో తాజా ఒప్పందం కుదరడం.. మధ్యప్రాచ్యంలో ఉద్రిక్తతలను తగ్గించడానికి జరుగుతున్న విస్తృత దౌత్య ప్రయత్నాలలో ఒక పెద్ద విజయంగా భావిస్తున్నారు. ఈ కాల్పుల విరమణ ఒప్పందంలో భాగంగా ఇజ్రాయెల్, లెబనాన్ దేశాలు పరస్పర నమ్మకాన్ని పెంచుకోవడానికి, వివాదాలను పరిష్కరించుకోవడానికి మరింతగా నేరుగా చర్చలు జరపాలని నిర్ణయించుకున్నాయి. రాబోయే రోజుల్లో సరిహద్దుల్లో శాశ్వత భద్రతా ఏర్పాట్లు, భవిష్యత్తులో మళ్లీ ఇలాంటి ఘర్షణలు తలెత్తకుండా తీసుకోవాల్సిన చర్యలపై ఈ చర్చలు ప్రధానంగా సాగనున్నాయి. వారాల తరబడి సాగిన తీవ్రమైన యుద్ధ వాతావరణం తర్వాత కుదిరిన ఈ ఒప్పందం.. ఇరు దేశాల మధ్య ఇటీవల కాలంలో సాధించిన అత్యంత అరుదైన దౌత్యపరమైన పురోగతిగా నిలిచింది. ఇది ఈ ప్రాంతంలో మరింత స్థిరత్వాన్ని తీసుకువస్తుందని అంతర్జాతీయ సమాజం ఆశాభావం వ్యక్తం చేస్తోంది.